Hugot nga ginakundena sa National Democratic Front-Far South Mindanao Region (NDF-FSMR) ang nahitabong pagpatay sa 6th ID Philippine Army ug sa Philippine National Police (PNP)-South Cotabato kay Ka Noel Pamaong (Ka Lauro/Ka Julio), 60, niadtong gabii sa Byernes, Oktubre 30.
Larawan ni Noel Pamaong (Ka Lauro/Ka Julio), 60
Dakong bakak ang gipagawas ug gipasiatab sa 6th ID nga balita nga dunay gunit nga armas nga kalibre .45 ug granada si Ka Lauro ug kuno nga misukol o nakig-pinusilay pa kini sa tropa sa 6th ID. Dugay na nga wala sa yunit sa New People’s Army (NPA) si Ka Lauro. Gipahiluna siya sa masa niadto pang 2024 ug walay gigunitang armas tungod sa kahimtang panglawas. Aduna siya’y high blood pressure, acute ulcer, rheumatism, common chronic kidney disease ug diabetes.
Lapas sa international humanitararian law (IHL) ang pagpatay sa usa ka masakiton, walay armas, ug wala sa posisyon nga makasukol ug naa sa medical leave, gawas sa overkill kaayo ang pwersa nga gigamit sa 6th ID sa maong operasyon. Sa maong operasyon, naggamit ang 6th ID og 1st Mechanized Infantry Brigade, 603rd Brigade ug PNP-South Cotabato.
Niadtong higayona, mobisita unta si Ka Lauro sa iyang paryente nga naa sa Polomolok, South Cotabato. Nasamdan sa pagpamusil ug naa sa kritikal nga kahimtang ang kinabuhi ni Laurence Porras (Biboy), sibilyan nga kuyog ug maoy naghatod kay Ka Lauro. Aron ipakita nga lehitimo ang ilang operasyon, gitamnan og pusil ug granada ang patay’ng lawas ni Ka Lauro, usa ka karaan og modus operandi sa militar ug pulis aron tabunan ang ilang kamangtas, pagkaberdugo ug uhaw sa dugo ug pagpanglapas sa tawhanong katungod.
Nakahibalo kaayo ang katawhan sa tibuok erya sa FSMR nga usa lamang si Ka Lauro sa daghan na kaayong na biktima sa pagpamatay ug pagpanglapas sa tawhanong katungod nga ginahimo sa Armed Forces of the Philippines (AFP) nga hangtod karon nagpadayon ug walay nakuha nga hustisya. Sayod usab ang katawhan ilabina sa mga nakaila sa pagkamaayo, buotan, pagkakugihan ug pagkasuod sa masa ni Ka Lauro.
Ang gipanghambog sa 6th ID nga accomplishment sa pagpatay kay Ka Lauro nga usa ka hors de combat ug pagkasamad sa usa ka sibilyan, mga tataw nga paglapas sa IHL ug balaod sa gubat. Nanawagan ang NDF-FSMR sa tanang human rights advocates ug usa ka patas nga pag-imbistiga ug patas nga pagtratar ug paghatag hustisya kay Ka Lauro ug Biboy.
The post Usa ka hors de combat, gipatay sa 6th ID; usa ka sibilyan, samaron sa pagpamusil appeared first on PRWC | Philippine Revolution Web Central.
From PRWC | Philippine Revolution Web Central via This RSS Feed.