Ginapadayaw na naman sang AFP, sang ila Alpha Battery sang 3rd Artillery Battalion nga nakabase sa Camp Leon Kilat sa Tanjay City, Negros Oriental ang lain naman nga artillery live firing sa Barangay Manlucahoc, Sipalay City, Negros Occidental bilang kabahin kuno sa ila military training kag exercises sining October 29-31, 2026.

Duna sa isa ka armadong pwersa nga maglunsar sa amo sini nga mga military trainings kag exercises bilang kabahin sa pagpauswag sang ila ikasarang sa inaway. Apang kun ang mga ini ginalunsar sang isa ka reaksyonaryo, berdugo kag pasista nga armadong pwersa, dugang lang ini nga perwisyo para sa pumuluyo kag pagwaldas sa kaban sang publiko nga pundo. Bangud kay ang ini nga mga military nga paghanas kag ehersisyo nagatarget mismo sa pumuluyong Pilipino ilabina yadtong mga aktibo nga nagapamatok sa kahiwian kag kagarukan sang sistemang malakolonyal kag malapyudal sang sosyedad Pilipino, yadtong mga nagahimakas para sa ila pungsodnon kag demokratiko nga interes lakip na ang nagaduso sa soberanya sang aton nga pungsod, imbes nga itaya ang buka kag kanyon sang ila mga hinganiban sa mga matuod nga kaaway sang pumuluyo kag pungsod kaangay sang mga manughimulos, nagapamintas kag nagalapas sa tawhanon nga kinamatarung, nagapangurakot, nagalapak sa soberanya sang pungsod kag nagaguba sa kapalibutan kag nagapangawkaw sa kaban sang publiko kag iban pa nga kriminalidad batok sa katawhan.

Wala sang pulos ang ini nga mga tinguha kun ang mismo pumuluyo kag soberanya sang pungsod nga kun tani, amo ang ila ginasumpaan nga pangapinan kag amligan, ang amo man ang ila igoon. Ang mga mangunguma, mamumugon kag iban pa ang adlaw-adlaw nga nagabayad sang buhis paagi sa ila balhas kag dugo agud gastuhan ang sweldo, benepisyo, mga kagamitan militar lakip na ang mga ginakurakot nga pundo sang mga opisyal sang sini nga reaksyonaryong armado, amo pa ang ila ginatarget sa sini nga mga armas kag bomba.

Indi na mapanas sa kasaysayan sang aton sosyedad ang nangin notorious nga rekord sang reaksyonaryong AFP, PNP kag ila mga paramilitari sa ila kalakasan kag pagpanglapas sa tawhanon nga kinamatarung kag internasyunal nga layi sang gera. Bantugon ang ini nga mga reaksyonaryong armado sa paghimo sang kalainan batok sa pumuluyong nagahimakas kaangay sang mga extrajudicial killings (EJK), paturagas nga pagpalupok kag pagpamusil ukon indiscriminate firing, aerial bombing kag artillery shelling nga naga-igo kag nagadislokar sa kabuhi kag pangabuhi sang pumuluyo kag nagatuga sang grabeng nga kakugmat kag kahadlok sa ila hanay. Nagatuyo man ini sa pagpamahug kag saywar batok sa pumuluyo agud mahawanan ang alagyan sa pagsulod sang mga dumuluong nga operasyon sang mina, plantasyon kag iban pa sa syudad sang Sipalay kag mga katambi sini kag bangud sa tuman nga kahadlok, indi na makareklamo ang mga mangunguma kag pumuluyo batok sini.

Dugang pa, wala huya man nila nga ginapanginwala kag ginatabunan ang ini nga mga kalakasan kag kriminalidad, kag masami ginapasibangud pa sa mga NPA kag sa bug-os nga rebolusyonaryo nga kahublagan agud idiskaril ang matuod nga hustisya nga ginapatuman sang rebolusyonaryong korte kag ginabansagan ini nga”kangaroo court”kag kuno EJKs man. Apang maski anhon pa man nila, indi matago sa mata sang pumuluyo ang kamatuoran kun sin-o ang matuod nga nagadala kag nagapangapin sa ila interes kag kaayuhan.

Dumdumon nga sa nakaligad nga tuig, may mga propyedad sang mga masa nga nahalitan kag kasapatan kaangay sang karabaw ang napatay nga wala man sang nagakaigo nga danyos ang ginbayad sa mga reaksyonaryong armadong pwersamg AFP sa ila.

Padayon nga ginapadayaw sang AFP Ang “waldas-pundo” nga mga military exercises sa balibad nga kuno paghanda ini para sa external territorial defense batok sa China apang ang matuod, mga paghanda kag pagsalakay ini sa mga sibilyan nga komunidad ilabina yadtong mga eryas diin ang pumuluyo aktibo nga nagapamatok sa mga makahalit nga operasyon sang mina, plantasyon sang mga dumuluong pareho sang Oil Palm kag iban pa nga proyekto sa idalom sang neoliberal nga mando sang mga imperyalistang punsod kaangay sang US kag China paagi sa reaksyonaryong rehimeng US Marcos II.

Nagareplekar man sa pungsodnon nga budget sang reaksyonaryo nga gobyerno nga mas ginapaboran ang modernisasyon sang AFP kag PNP sa alokasyon kag sa interes sang mga dumuluong nga kapitalista gamit ang mga layi pabor sa ila, kaysa sa pagsabat sa kakulangan kag pagpauswag sa mga sandigan nga serbisyo sosyal kaangay sa edukasyon, ikaayong lawas kag iban pa. Samtang nagakatunaw ang paglaum nga manabat ang mga imbolbado sa dakung korapsyon sa flood control projects kag iban pa nga pagpangawkaw sa pundo sang publiko.

Nagaupod ang bug-os nga rebolusyonaryo nga kahublagan sa pagkundena kag pagpamatok sa live firing exercises kag iban pa nga military nga paghanas nga ini kag nanawagan sa pagpa-untat sa militarisasyon sa kaumahan nga nagadepensa sa mga dumuluong nga proyektong mina, plantasyon, windmill kag iban pa nga nagahalit kag nagadislokar sa kabuhi kag palangabuhian sang pumuluyo.

Itib-ong nga Integridad kag soberanya sang pungsod Pilipinas!

Ipatuman nga matuod nga Reporma sa Duta kag pungsodnon nga Industriyalisasyon!

Isulong Ang Demokratikong Rebulosyon sang Banwa paagi sa Pangmalawigon nga Inaway Banwa agud makab ot nga matuod nga demokrasya, kahilwayaan kag hustisya sosyal!

Mabuhi Ang CPP NPA NDF! Ang mga matuod nga tigpangapin kag nagahimakas sa interes sang malapad nga masang pigos kag hinimuslan!!!

The post Artillery Live firing sang AFP sa Sipalay City, lain naman nga perwisyo para sa pumulyo kag dugang waldas sa kaban sang publiko appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.