Ang maragtason nga paghimakas para sa katumanan sang matuod nga reporma sa duta ang isa ka makatarunganon nga kawsa nga madugay na ginahandom sang malapad nga masang mangunguma. Ang Negros ginakilala nga bastyon sang landlordismo kag pagluntad sang makasaysayan nga pagpang-agaw sang dutang ulomhan kag tuman nga pagpamigos kag paghimulos sang mga mangunguma nga amo ang nagbun-ag sang Negros bilang sugar bowl kag bulkan sosyal sang pungsod.

Ang paghimakas sa duta isa ka maduguon nga hambalanon para sa sahing mangunguma nga wala sang ikasarang magbato sa mga poderoso nga mga agalon may duta nga protektado sang estado. Ang pagluntad kag pagbaskog sang armadong paghimakas sa kaumhan amo ang sabat kag solo nga hinganiban sang mga mamumugon kag mangunguma upod sa iban nga sahing ginahimuslan para ipakigbato ang ila kinamatarung batok sa tanan nga porma sang inhustisya.

Ginagamit sang estado ang tanan nga pamaagi para proteksyonan ang interes sang nagahari nga sahi kag upangan ang pag-abante sang rebolusyonaryong kahublagan nga magapukan sang iya mapiguson nga gahum. Nagagamit ini sang lain-lain nga eskima sang mga pagpatalang nga nagatiplang sa mga malain nga elemento sa kubay sang mangunguma nga nagakahaylo sa kwarta kag pabor kabaylo sa kawsa nga ginapakig-away sang mga manguguma kag nagahalit diri.

Lapnagon subong sa kaumhan ang mga pagpangharas, pagpangdakop kag masaker sa mga masa kag lider mangunguma nga mabaskog nagapamatok sa mga proyektong neoliberal nga nagadislokar sa ila palangabuhian kag nagapalayas sa ila dutang ulumhan. Kaangay sang 6,600 ektarya nga plantasyon sang oil palm sa banwa sang Candoni sang pamilya Consunji kag malagpad nga solar farm sang pamilya Aboitiz sa norte sang Negros.

Ang pagpatuman sang rebolusyonaryong hustisya batuk sa mga malain nga elemento sa kubay sang mangunguma, mga nagahari nga sahi nga mga agalon may duta-dalagkong kumprador burges-burukrata kapitalisa kag mga mapintas nga aparatu sang estado makatarungan kag pagdampig kag pagpangapin sang ila interes. Naga-agi ini sa isa ka maid-id nga proseso sang pagtaral sa korte sang rebolusyonaryong gahum pangpulitika sang gobyerno sang pumuluyo sa kaumhan. Pagkatapos nga makalab-ot sa pagpamatbat ginapatuman ini sang NPA nga amo ang armadong hinganiban sang hustisya sang pumuluyo.

Ang PKM bilang rebolusyonaryong organisasyon kahublagan sang mga mangunguma sa kaumhan mabaskog nga nagatib-ong sang rebolusyonaryong armadong paghimakas sa pagsulong sang pangmalawigon nga inaway banwa sa kaumhan nga mayormente nagabandera sang handum sang mayoriya sang pumuluyo nga mangunguma nga makaangkon sang dutang ulumhan. Amo ini ang mayor nga tuburan sang NPA nga naga-armas upod sa iban nga ginahimuslan kag ginapigos nga sahi sa halintang sang demokratikong rebolusyon sang banwa nga isa ka inaway sang mangunguma. Bilang kabahin sang rebolusyonaryong gobyerno sang pumuluyo sa kaumhan upod sa NPA nagapatuman ini sang rebong hustisya para pangapinan ang interes sang pumuluyo kag rebolusyon.

Gani, ang rebolusyonaryong armadong paghimakas kag pagpatuman sini sang rebong hustisya nagapaseguro nga mapangapinan ang interes sang pumuluyo kag para malab-ot ang matuod nga kalinong kag katawhayan sa pungsod.

The post Rebolusyonaryong hustisya: Pagpangapin kag Pagdampig sa interes sang masang mangunguma appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.