Mahugot nga ginkukundenar han mga rebolusyunaryo nga pwersa ha Eastern Visayas an ginkasa nga Kasangga war games ha Hinabangan, Samar. An haros usa kabulan nga war games giutan han mga tropa han Australia ngan Pilipinas nagseserbe ha katuyuanan han United States nga mas pakusgon pa an tensyon ngan panunulsol han gerra kontra ha China.

An war games, nga gintikangan hadton Oktubre 19 ha 8th Division Training School (DTS), paaprtisiparan han 144 nga tropa han Philippine Army ngan 90 nga sundalo han Australian Army. An mga tropa nga Pilipino nagtikang ha mga yunit han 8th DTS, 63rd Infantry Battalion, 543rd Engineer Construction Battalion, 7th Cavalry Company, ngan han 803rd Community Defense Center.

Gintatampalasan hini an soberaniya han Pilipinas ngan sukwahi ha prinsipyo han palisiya nga pan-gawas nga natipa ha imperyalista nga gerra. Hinumdumi nga an Australia kaparte han alyansa militar nga AUKUS (Australia-United Kingdom-United States) nga ginbug-os han US agud pakusgon an presensya militar hini ha Asya-Pasipiko. Insulto na liwat ini ha katawhan nga Waraynon nga hadton Mayo la ginsamok han Tomahawk nga misayl han US kahuman paluparon tikang Tacloban ngadto ha Luzon. Sugad hadton Balikatan, piho nga hihibangon liwat han Kasangga an katalwasan ngan panginabuhi han mga taga-Hinabangan ngan kasapit nga bungto.

An mga war games sugad han Kasangga nagseserbe liwat ha kampanya kontra-insurhensya han pasista nga rehimen Marcos. Han iglansar an Kasangga 2026-1 ha Camarines Sur, Bikol hadton Mayo 26, nakapokus ini ha operasyon nga paniktik ngan kombat ha mga komunidad. Ginsulod han mga langyaw nga tropa an mga komunidad ngan ginhugtan an gios ngan pagpapakabuhi han mga parag-uma ngan parupangisda. Ha Barangay Balogo ha Pasacao, pwersahay nga ginpaebakwet an mga residente para ha live-fire exercises. Nagdurot hin kahadlok an mga pagsabog ngan pagpapabuto ha ligid han dagat ngan nakahibang ha ecosystem han kadagatan han prubinsya.

Gin-aatentar han Kasangga war games ngan han todo nga panginyupo han rehimen Marcos ha US nga paraon an pira kasiglo han kontra-kolonyal nga tradisyon han katawhan nga Samareño. Diri sugad han ira kaapuy-apuyan nga mabayanihon nga ginpasulong an gerra han katawhan kontra ha mga pasista ngan kolonyalista nga Amerikano hadton Gerra nga Pilipino-Amerikano, an mga dinastiya nga pulitika ha Samar yana ngan an 8th Infantry Division malipayon nga ginkakarawat an mga langyaw nga tropa. Mas grabe pa, an pasista nga terorismo nga gin-eksport han imperyalismo nga US ngan hadton 1902 nagpatay ha 25,000 nga Samareño kaupod an kababayin-an, kabataan, ngan kalagsan, ira pa gintatahuban ngan ginpapadayon ha igkasi Pilipino.

Nalarga an war games ha Pilipinas kadungan han natikagrabe nga sumpakiay giutan han mga maka-US nga burukrata kapitalista nga Pilipino, ngan han embahada han China ha nasud. Ginsasakyan han pira nga oportunista nga pulitiko an kontra-China nga sentimyento nga duso han US ngan waray pili (blanket) nga gin-iinsulto an mga nananawagan han murayaw nga resolusyon komo “DDS,” “maka-China” o “komunista.” Ha ira black-and-white nga pagpinsar, diri nira akos kundenahon an China ha mga pagsasayop hini kadungan han pagkilala ha pira kasiglo nga kultural ngan pan-ekonomiya nga sumpayan. Waray bisan usa ha ira nga nagluwas han diplomatiko nga resolusyon ha isyu han South China Sea nga usa nga maritime dispute diri la ha China, kundi hasta ha iba pa nga nasud nga kaapi han Association of Southeast Asian Nations nga diri man hul-os nga nanginginyupo ha US. Samtang, grabe an ira pagigin mamingaw ha 80 katuig nga bagakolonyal nga pagsakop han imperyalismo nga US nga baga hin natuo hira “ha paghigugma han usa nga puta.”

Kinahanglan kundenahon han ngatanan nga patriyotiko nga Pilipino labina han katawhan nga Waraynon an Kasangga war games ha Samar. Kinahanglan nira papagbaydon hi Marcos ha iya pagtraydor ngan ibuksas an maka-US nga huyob han mga oportunista nga pulitiko nga Pilipino nga nagsusungo ha posibilidad han gerra ha rehiyon. Kinahanglan ibuksas an pagigin buwa han ira patriyotismo, lingion an tradisyon han mga Pilipino han pag-ato ha mga mananakop, ngan igbandera an tinuod nga palisiya nga nakaglulugaring ha ekonomiya, pulitika, ngan kultura.

The post Kundenahon an PH-Australia war games ha Samar! Ipakigbisog an nasyunal nga soberaniya, palayason an tanan nga langyaw nga tropa! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.