Halin sa bulan sang Agosto 2026 tubtob subung nga bulan sang Oktubre, wala-puas ang pagpang-atake sang 62nd IB kag 94th IB sa mga komunidad sang mga mangunguma sa mga banwa sang Isabela, Moises Padilla kag La Castellana sa Negros Occidental kag Guihulngan City, Canlaon City kag Vallehermoso sa Negros Oriental.

Oktubre 16 alas 12:00 sa udto, iligal nga gin-aresto sang mga katapo sang 62nd IB si Bandoy Serenio, senior citizen kag mangunguma sang Sityo Plasan, Barangay Guba, Vallehermoso, Negros Oriental samtang naga-arado ini sa iya kaugalingon nga uma. Suno sa mga residente kag pamilya sang biktima, wala sang “warrant of arrest” kag iban pa nga papeles nga ginpakita ang militar kag pilit nila ini nga gindala ang biktima sa Barangay Guba AFP detachment. Pwersa siya nga gin-interogar kag pilit man nga ginapaako nga katapo sang NPA.

Oktubre 2 alas 5:30 sang kaagahon, ginlusob man sang mga katapo sang 62nd IB upod sa mga surenderi nga sila Willy Sabio kag Orlan Dela Pena ang komunidad sang mga mangunguma sa mga Sityo sang Matal-e, Nasunugan kag Tabago tanan sakop sang Barangay Sandayao, Guihulngan City. Iligal nga ginpangsaka-saka ang nga panimalay kag ginpang-interogar. Ginsulod sang militar ang balay ni Nelboy Sulay isa ka mangunguma kag pilit ini nga ginkuhaan sang litrato. Samtang ginkadto man sang militar ang balay ni Estrilita Magallano, ugangan ni Nelboy kag ginpasibangdan nga nagapatulog sa mga NPA. Kadungan man sini ang paglusob sa balay ni Tony Gelacio. Pilit man siya nga ginapatudlo sa presensya sang NPA sa lugar.

Septyembre 28 sang kagab-ihon, ginlusob man sang nasambit nga militar ang balay ni Ronie Dela Pena. Pilit nga ginapaako kag itudlo ang presensya sang NPA sa lugar. Gintalanaan ini nga magreport sa detachment pagkaaga matapos nga ginlusob ang iya panimalay.

Agosto 7 alas 7:00 sang gab-i, ginsaka man ang balay ni Julie Bardoc. Pilit siya nga ginpasuksukan sang bandolier, ginpa-uyat sang M4 rifle kag ginkuhaan sang litrato kag ginhambalan nga magreport sa mga militar sa Sityo Parkingan, Barangat Trinidad, Guihulngan, Negros Oriental.

Agosto 15 sugod man nga ginlusob sang militar ang mga komunidad sang mangunguma sa mga Sityo sang Bonbon, Nahilig kag Crossing Bonbon tanan sang Barangay Hinakpan, Guihulngan. Subongman ang mga Sityo sang Binataan, Tiyos, Oway-oway kag Nakurohan sakop sang Barangay Quintin Remo, Moises Padilla. Kadungan sini ang paglusob man sang militar sa mga komunidad sang mangunguma sa mga Sityo sang Maluy-a sakop sang Barangay Sandayao, Sityo Libas sakop sang Barangay Imelda, tanan sang Guihulngan City.

Pilit nga ginapatawag ang mga indibidwal kaangay ni Tata Pajardo sang Sityo Nakurohan, Barangay Quintin Remo kag si Jerum Dingcong sang Sityo Libas, Barangay Imelda, Guihulngan. Suno pa sa kay Tata kag Jerum upod sa ila pamilya nga ginaperwisyo sila sang militar sang sige patawag sa ila sa pasulit-sulit nga interogasyon. Gintug-an man nila nga nga si Renante Mission alyas “Karding” upod sa mga militar ang masami nagapatawag sa ila. Halos indi na sila ka panguma para mabuhi ang ila pamilya tuga sang paghasol kag pagperwisyo sa ila kag pagpanginto.

Sa subong Oktubre 21, nagapabilin pa ang presensya sang militar sa mga Sityo sang Paluhan, Tinubdan, Nasunugan, Tabago, Matal-e kag Maluy-a sakop sang Barangay. Sandayao. May ara man nga kolum sa sityo Agpapataw, Barangay Binobohan. Subongman sa mga sityo sang Sinayahan, Tulu-tulo, Mag-aso kag Mantuna sakop sang Barangay Trinidad tanan sang Guihulngan City. Samtang may mga tropa militar man sa Barangay Proper sang Barangay Guba, Vallehermoso kag sityo Natuling sang Barangay Budlasan, Canlaon City tanan sang Negros Oriental.

The post Militarisasyon sa Central Negros, Perwisyo sa mga Mangunguma appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.