Sa atubang sang masingki nga operasyon militar sa sakop sang larangan gerilya sa Central Negros, madinalag-on nga ginpatuman sang isa ka yunit sang Leonardo Panaligan Command-New People’s Army (LPC-NPA) ang pagpahamtang sang silot-kamatayon kay Junard Mansalon, 42, sang Sityo Namutang, Barangay Makilignit, Isabela, Negros Occidental sadtong Oktubre 16, 2026 alas 4:00 sang hapon.

Napamatud-an si Mansalon nga isa ka masupog nga asset militar sang gintalakay ini nga kaso sa rebolusyonaryong korte sang pumuluyo sadtong tuig 2008. Bisan pa man sa pihak sang iya kasupog diin siya ang naggiya sa militar sa pagpa-ambus sa isa ka elemento sang New People’s Army sa sakop sang Barangay Makilignit, Isabela sadtong tuig 2007, gintinguhaan pa nga maistorya siya sang NPA agud pamatian ang iya panaysayon kag mga sirkumstansya sang ini nga hitabo. Lubos nga gin-angkon ni Junard ang iya nahimo nga amot sa pagpa-ambus sa NPA sa nasambit na nga tuig. Ini ang rason sa pagpamag-an sa iya kaso nga pagtraydor sa rebolusyon. Ginsaway, gin-edukar kag ginpaandaman sandig sa iya nakomiter nga kaso sa rebolusyonaryong kahublagan.

Apang tuig 2008 padayon gihapon ini sa pagpaniktik sa masa kag sa hulag sang NPA sa lugar. Bangud sang iya kasupog sa gihapon, liwat nga gin-istorya siya sang NPA kag ginpapanaug ang “destiero” ukon pagpalayas sa natungdan sa lugar sa gintalana nga panahon para nga magbag-o sa iya kaugalingon.

Wala pagrespeto sa hublag, pilit ini nga nagbalik sa lugar nga wala sang maathag nga rason kag nagpabilin sa iya indi maayo nga gawi kaangay sang pagpanakit sa pamilya kag kabataan, pagpanghimulos sa kaugalingon nga kadugo kag pagpabilin nga pagpagamit sa militar kabaylo sang kwarta kag iban pa nga pasalig sang militar.

Si Junard Mansalon ang naglugos kag nagpabusong sang iya kaugalingon nga pakaisa sadtong tuig 2008. Siya man ang nagpatay sa iya lola nga si Colassa Mansalon paagi sa pagbitik sang pisi sadtong tuig 2022. Sini lang nga tuig 2026, iya man ginlabo ang iya 13 anyos nga bata kabangdanan sa pagkapilas sang tiil sini. Samtang padayon sa iya trabaho sa pagpaniktik sa hulag sang mga rebolusyonaryong masa, NPA kag bug-os nga rebolusyonaryong kahublagan. Si Mansalon ang direkta nagareport sa detatsment sang Barangay Linantuyan, Guihulngan City AFP Patrol Base.

Sa gihapon, bukas ang NPA sa pag-atubang sa tanan nga may salabton nga kaso sa masa kag rebolusyon para sa inyo nga pagbag-o. Sa magapabilin sa anti-sosyal kag kontra-hublag nga gawi, ang NPA sa absoluto nga pagpamuno sang Communist Party of the Philippines, indi gid mag-untat nga maglagas kag wala duha-duha nga magsilot sa inyo sandig sa kabug-aton sang kaso nga inyo nakomiter.

The post Masupog nga Asset sang AFP sa Isabela, Ginsilotan sang NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.