Kun makag-akusar hi Philbert Tan, alkalde han Las Navas, Northern Samar, hin extortion (pangikil) kasunod han mga nahireport nga agway giutan han pasista nga militar ngan New People’s Army (NPA) ha bungto nga iya ginlulupgupan, baga hin gililimpyuhi han pira kadekada nga pamumuno niya ngan han iya pamilya. An tinuod, sobra-sobra hira nga nagpahimulos ha ira pwesto ngan pangongorap ha pondo han katawhan, samtang nagpapabilin ha lusak han kakablasan an ordinaryo nga katawhan.
Kinahanglan ig-eksplikar ni Philbert ha katawhan an ₱67.5 kamilyon nga balor han mga proyekto han munisipyo, kadak-an ha imprastruktura, nga ginsusnan han Commission on Audit hadton 2024 tungod ha kwestyunable nga implementasyon. Kinahanglan liwat niya ig-eksplikar kun nahingain an diri mamenos ha ₱119 kamilyon ha ilarum han Support to Barangay Development Program han National Task Force-Elcac nga ginbuhos ha 35 han 53 barangay hadton 2021-2024.
Kinahanglan liwat niya mag-eksplikar hiunong ha palpak ngan diri human nga irigasyon ha ilarum han Help for Catubig Agricultural Advancement Project (HCAAP). Hadton 2001 pa igin-gawas han Japan International Cooperation Agency (JICA) an pautang nga Yen3.924 kamilyon diin ginpartehan an munisipalidad han Las Navas komo usa ha mga “benepisyaryo” han programa. Labot ha irigasyon, ginlupgop liwat han programa an mga national road, “farm-to-pocket road,” pantalan, ngan serbisyo nga tubig. Kundi JICA mismo an nagsering nga “diri makurukarawat” an kabug-usan nga resulta han HCAAP. Nadiskubrehan liwat han usa nga bulag nga pag-aram nga pipira nga agaron maytuna ngan negosyante la an nagpulos ha proyekto.
Kinahanglan liwat mag-eksplikar hi Philbert kun tiunan-o nagpupulos an iya dadâ ha akses han munisipyo ha bulot nga pagpalit han barato nga medisina agud mahibaligya ha mas hitaas nga presyo. Kay ano nga diri liwat hiya mag-eksplikar hiunong ha conflict of interest nira han iya batâ nga hi Don Jose, nga napautang ha mga parag-uma ha hitaas nga porsyento ngan ginpeprendahan han honorarium han mga barangay official ngan ATM card han mga pampubliko nga magturutdo? Ginhimo nira nga normal an pakigkonsabuhay ha municipal ngan mga barangay treasurer para otomatiko nga ibanan an mga honorarium ngan makuha ni Don Jose an iya parte. Conflict of interest liwat ngani an pagmonopolyo han pamilya Tan ha negosyo han pagpalit han abaka ngan kopras ha bungto.
Burukrata kapitalista na ngani, ipokrito pa hi Philbert Tan. Gin-gagamit niya ngan han ira pamilya an pusisyon ha reaksyunaryo nga estado komo ligal nga tahub ha sistematiko ngan “ligalisado” nga pangikil ha katawhan, pagbubursa han pampubliko nga pondo, agud ha urhi makapagpariko han kalugaringon. Gintataglawas nira an grabe kabaho ngan dunot nga sakit han burukrata kapitalismo ha sistema nga bagakolonyal ngan bagapyudal.
Pakuri na ngani, niyutiyo pa hira han militar. Gin-uundong han mga Tan an mga pasista nga palisiya han panmatay, panmomba, ngan pan-gigipit ha katawhan nga Las Navasnon, tubtub nga 4,000 pamilya o 22,000 nga indibidwal an napailarum ha militar nga paghahadi hadton 2018-2025. Sunud-sunuran ha 8th Infantry Division hira Philbert ngan an mga kaurupdan niya nga nagin meyor liwat bisan kun diri mamenos ha upat kabeses nga ginhimo han militar an aerial bombing ha mga umhanan ha Las Navas tikang 2019.
An mga pakuri, korap ngan pasista nga pulitiko nga sugad han dinastiya nga Tan kinahanglan ginpapatalsik ha pwesto. An mga sugad ha ira an nahatag-rason ha rebolusyunaryo nga armado nga pakig-away nga ginpapasulong han NPA. Ini an armado nga pag-ato nga, sukwahi ha akusasyon han 8th ID ngan mga Tan komo “extortion,” hukas ha kasingkasing nga ginsusuportahan han katawhan nga Las Navasnon ngan Nortehanon agud ha sugad mabungkag an reaksyunaryo nga estado ngan matukod an Demokratikong Gubyernong Bayan.
The post Baton han NDF-EV kan Las Navas meyor Tan: Hin-o an tinuod nga extortionist? appeared first on PRWC | Philippine Revolution Web Central.
From PRWC | Philippine Revolution Web Central via This RSS Feed.