Madinalag-on nga gintigayon sang isa ka yunit sang NPA-Southwest Negros (Armando Sumayang Jr. Command) ang silot kamatayon batok ni Vergilio alyas Billy Icunas, nagapuyo sa Sitio Gabok, Barangay Basak, banwa sang Cauayan sadtong Oktubre 12, 2026.

Si Vergilio alyas Billy may mabug-at nga kaso bilang utok kag nag-upod sa aktwal nga pagpatay ni Dominador alyas Boboy Tilad, 46 anyos, nga nagapuyo man sa pareho nga lugar, nga isa man ka naga-uma kag nag-upod sa paghimakas sa amo nga duta.

Sila Vergilio alyas Billy Icunas, Juvy alyas Bebe Icunas nga bata man ni Billy kag si Luis Pit-oy nga parehong nagapuyo sa nasambit nga lugar ang gingamit ni Haidee Tresreyes bilang mga armadong goons sumugod sadtong 2021 pasaka sang gin-angkon ni Haidee Tresreyes ang 16 ka ektarya sa sulod sa 80 ka ektarya ni Mauro Ledesma sa amo nga lugar. Bangud kay ang amo nga duta may ara mga nagapanguma nga mga lehitimo man nga tenants ni Ledesma humalin pa sa tuig 1954, nangin masupog kag mapintas nga makinaryas ni Haidee Tresreyes ang mag-amay nga Icunas kag si Luis Pit-oy sa pagpamahug sa mga mangunguma kag pagpang-agaw sa duta nga ila gintala-uma. Madugay na nga nagapamahug ang mag-amay sa mga mangunguma nga kuno may ara sila tumbahon kag nagapahayag kag nagapakita nga makig-away sila sa kay sin-o man nga mangapin sa mga mangunguma lakip na diri ang mga NPA.

Madumduman nga nagdangop na ang mga biktima sa reaksyonaryong ahensya sang Department of Agrarian Reform ukon DAR agud maduso ang ila kinamatarung bilang tenants sa amo nga duta. Gani, ginpanaug sang DAR ang desisyon nga indi sila pahalinon bangud kay napamatud-an nga sila mga lehitimo nga tenants ni Mauro Ledesma. Bisan man gani nga wala pa napamatud-an kun bala ligal ang pagsulod ni Haidee sa amo nga duta apang ang mga mangunguma naghatag na sa iya sang parte sa duta, rason nga nagpadayon ang pagka lehitimo sa mga mangunguma bilang tenants sa amo nga duta. Gipatindog sa mga mangunguma ang ila kooperatiba agud maglig-on ang ila hanay sa tunga sang pagpabaya kag pagpabungol-bungol kag bulag sa mga opisyal sa reaksyonaryong gobyerno halin sa barangay nga lebel pasaka angot sini nga kaso.

Sadtong Hulyo 21, 2026, gintiro patay na lamang ni Rudy Kabigon, taga Taculing, Bacolod City, isa ka gun for hire upod nila Billy, Bebe kag Luis si Boboy Tilad didto sa tyangge sa kooperatiba sa Sitio Gabok, sa nasambit nga barangay sa alas 6 sang kagab-ihon. Matapos nila mapatay si Boboy, namahug si Billy sa mga mangunguma nga may idason pa sila nga patyon nga 9 ka bilog sa amo nga lugar rason nga nakaagum sang tuman nga kahadlok, kakugmat kag kahangawa ang mga pumuluyo sa lugar. Wala man sang nahatag nga seguridad ang mga kapulisan sa banwa para sa mga biktima nga mangunguma kay kuno, ara na sa reaksyonaryo nga korte ang kaso. Saksi man ang pumuluyong Pilipino kun ano kahinay nga mas sobra pa sa ba-o ang lakat sang hustisya sa reaksyonaryo nga estado. Pwera na lang kun may madamo ka nga kwarta kag koneksyon kag halin ka sa pamilya sa mga bantugon nga manggaranon sa pungsod kag banwa kay pat-ud ang hustisya sang kaso mo.

Sandig sini, sang nabaton ang reklamo kaangot sa kasong pagpatay kay Boboy, maid-id nga gintigayon sa talatapan sang rebolusyonaryong hukmanan ang mga nagakaigo nga imbestigasyon agud palutawon ang kamatuoran sa amo nga kriminal nga kasong pagpatay, nagakaigo nga proseso sa pagtukod sa rebolusyonaryong korte kag nagakaigo nga pagtaral sa mga pareho nila ni Billy kag Rudy nga armado, peligroso kag indi magpaidalom sa sistema kag proseso sa rebolusyonaryong hustisya. Kag gani, nakab-ot ang hukom sa Korte sang Pumuluyo ang silot kamatayon batok kay Rudy Kabigon (nga “At Large” sa subong) kag Vergilio Alyas Billy Icunas sa kasong Pagpatay nga walay duhaduha (ukon “beyond reasonable doubt”) nga napamatud-an sandig sa rebolusyonaryo nga kodigo penal sang mga kriminal nga kaso.

Bilang mga matuod nga soldado sang pumuluyong pigos, hinimuslan, pigado kag wala sang kalaban-laban, gilayon nga ginpatuman sang NPA ang desisyon sang rebolusyonaryong hukmanan batok sa mga nasambit nga nahukman nga may kriminal nga sala.

Ginapanawagan sa talatapan sang rebolusyonaryo nga korte sa sakop sang ASJC ang tanan nga talatapan sang rebolusyonaryo nga korte sa bug-os nga isla nga ipanaug ang desisyon nga silot kamatayon batok kay Rudy Kabigon sa tion nga masapwan ini sa ila mga ginasakopan nga lugar.

Madalom nga nahangpan sang NPA kag bug-os nga rebolusyonaryo nga pwersa nga tubtob magpabilin ang mapiguson kag mahimuslanon nga mala kolonyal kag mala pyudal nga sistema, magdamo pa ang mga kriminal nga kaso nga magaluntad diin ang yara mismo sa poder nga amo man ang nagpanguna sini magagamit sa mga pigado kag hinimuslan nga maghimo sang krimen batok sa kapareho nila samtang sa mata sa reaksyonaryo nga sistema sa hustisya, sila nga mga nagahari amo pa man gani ang una nga ma-abswelto.

Amo nga ginapanawagan man sang ASJC-NPA kag sa bug-os nga rebolusyonaryo nga kahublagan sa isla ang tanan nga mga nagapagamit bilang mga armado kag mapintas nga goons sang mga agalon may duta, dalagku nga komprador, lokal kag dumuluong nga mga kumpaniya nga nagahalit sa kabuhi kag nagadislokar sa palangabuhian sang mga pumuluyo nga untaton na ukon likawan ang paghimo sang kalakasan kag krimen batok sa pumuluyo. Ang rebolusyonaryo nga hustisya permi nga tampad, pursigido kag handa sa pagsakdag sa mga biktima sa mga kalakasan kag pagpahimulos sa idalom sini nga garuk nga sistema sang sosyedad.

Mabuhay Ang CPP-NPA-NDF!

Mabuhay Ang Masa nga Padayon nga Nagahimakas!

The post Isa ka masupog kag mapintas nga armadong goons gipahamtangan sang silot kamatayon sang ASJC-NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.