An pagdaup ngan pag-hostage han 93rd Infantry Battalion ha pamumuno ni Lt. Col. Frank Sayson ha 7-anyos nga anak han Pula nga mangaraway nga hi Erwin Maceda (Ka Romnik) ha Kananga, Leyte usa la ha mga makarima-dima nga pagtalapas hini ha international humanitarian law (IHL). An menuson ini komo simple nga “pagbulig” insulto diri la ha nasering nga bata, kundi hasta ha ngatanan nga iba pa nga kabatan-unan ngan menor de edad nga Pilipino nga sistematiko nga gintatarget han panharas ngan pangabuso han pasista nga militar ha ngaran han “kontra-insurhensiya.”

Pagrarason ni Lt. Col. Sayson, an pamilya kuno han bata, pinaagi han apoy nga nag-aataman ha iya, an dinaup ha 93rd IB agud maghangyo hin birthday party han bata. Hin-o daw nga sibilyan nga pamilya an madaup ha usa nga institusyon nga militar agud maghangyo hin birthday party? Tiunan-o daw la hini matatanggal an kasubo han bata ha pagkamatay han iya amay? Karuyag ba pagawason han 93rd IB nga diri akos han nag-aataman ha bata nga tagan ini hin simple nga selebrasyon para ha iya kaadlawan, amo nga hinangyo ini ha mga nagpatay ha iya amay ngan nananawagan han pagsurender han iya iroy? Napalusot na la hi Sayson kahuman mabuksas ha publiko an paggamit nira ha bata para ha saywar. Gin-gamit pa niya an lokal nga gubyerno han Kananga para ha “fact-finding” ha ngaran han ira dunot ngan maraut nga naratibo.

An pagbalandra han 93rd IB ha nawong ngan ngaran han bata ha internet, nga waray pa ngani hul-os nga gintanggal lugod “gin-archive” la, usa la ha mga pagtampalasan ha pamilya ni Ka Romnik. Direkta nira nga ginkadto an bata ha iya balay, lugar nga talwas unta nga espasyo para ha iya komo bata ngan sibilyan, agud epektibo nga himuon nga hostage ngan pasurenderon an iroy nga aada pa ha aktibo nga serbisyo ha NPA. Klaro hini nga ginpapakita nga target an mga sibilyan ha kontra-insurhensiya, sukwahi ha ginsesering han Geneva Conventions nga ginseseguro an absoluto nga katungod han mga sibilyan labina han kabataan ha ispesyal nga pagrespeto ngan proteksyon.

Labot pa, gintamak-tamakan nira an hinumduman han iya namatay nga amay sugad liwat han mabayanihon nga pagpursige han iya iroy ha dalan han armado nga pakig-away. Buwa an mga pamostura nira han “makatawo nga pagtrato” ha mga rebolusyunaryo—hadton Septyembre la ginbalandra han 8th CMO an litrato han mga patay nga lawas han martir nga Pula nga mangaraway ha usa nga porum nga saywar ha Leyte Normal University.

Sistematiko ngan tinuyo an pagtarget han militar ha mga bata. Ha nakalabay nga mga bulan ginharas han 93rd IB an magturutdo han 3-anyos nga anak ni Brenda Lagado samtang ginlamba naman han kahoy ngan ginkwelyuhan an iya 16-anyos nga patod. Hadton Nobyembre 2024 gin-ukab han mga tropa han 20th IB an nakalubong nga patay nga lawas han usa kasemana nga puya ha Barangay Sulitan, Catubig, Northern Samar ha butnga han operasyon kombat.

Ayaw liwat kita hingalimot han pagpatay han 63rd IB kan Jason Padullo ha Borongan City; pag-istraping han 20th IB ha duha nga menor de edad nga paraglukad ha Catubig; paghostage han 74th IB ha mga menor de edad han pamilya Arnesto ha Palapag; pagsurender han 43rd IB ha mga menor de edad han pamilya Yanay ha Las Navas; pagsikmit ngan paggamit komo hostage han 8th Infantry Division ha mga bag-o nga iroy nga Pula nga mangaraway ha Catbalogan; ngan damo nga iba nga kaso. Diri pa kalakip dinhi an pagkayer han mga tropa ha baryo hin dulse ngan uyasan ha mga bata agud pug-an hin impormasyon hiunong ha lokasyon han NPA.

Ha pinakadagmit nga panahon kinahanglan bayaan na han 93rd IB an anak ngan mga kaurupdan ni Ka Romnik. Nananawagan kami ha iba nga mga tag-undong han tawhanon nga katungod nga makig-usa ha panawagan nga papagbatunon an mga responsable ha pagtalapas ha ira mga katungod. Ginsusuportahan namon an inisyatiba han NDFP Special Office for the Protection of Children nga magsalawad hin reklamo ha mga independyente nga upisina kasumpay hini nga kaso. Diri angay pasagdan an ira pangabuso.

An pahayag mismo ni Lt. Col. Sayson nga “pagsurender an dalan ngadto ha kamurayawan” dugang nga pamatuod nga dinhi gud la interesado an militar ngan pasista nga estado. Waray hira labot ha pagbaton ha kakablasan, kawaray hustisya ngan kawaray demokrasya nga gamot han armado nga sumpakiay ngan rason han pag-aarmas han mga sugad kanda Ka Romnik. Tubtub nga nagpapabilin ini nga kamutangan, padayon nga magpupursige an NPA ha Leyte ngan ha Eastern Visayas ha paghasog ha dalan han armado nga pakig-away tubtub nga maperdi an pasista nga militar nga nag-uundong ha naghahadi nga dunot nga sistema.

The post Desperado na an 93rd IB nga tahuban an mga pagtalapas ha IHL appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.