Madinalag-on nga napanaugan sang silot kamatayon ang rapist nga si Jonathan Sumanion, sobra 50 anyos, nga nagapuyo sa Purok 1, Barangay Yaoyao, banwa sang Cauayan, Negros Occidental sadtong Oktubre 4, 2026 sa alas-5 sang aga sa lugar mismo sa iya puluy-an.

Si Jonathan Sumanion alias Natan may kaso nga pagpang-rape sa isa ka minor de edad sadtong mga tuig sang 2024 pasaka. Kun madumduman, wala sang nagakaigo nga tikang ang reaksyonaryo nga sistema hudisyal batok sini nga kaso sa nakaligad amo gilayon nga gintratar sa talatapan sang rebolusyonaryo nga korte sandig sa mga ginpasaka nga mga reklamo.

Sandig sa nagakaigo nga proseso sang imbestigasyon, pagpat-ud sa kaso kag sa pagtaral, napadagdagan sang silot nga kamatayon si alias Natan sa rebolusyonaryo nga hukmanan. Apang ginpamatian ang nangin apelasyon sa mga natungdan nga indibidwal kag ginhatagan sang kahigayonan nga magbag-o sa iya kaugalingon kag indi na magliwat sa amo nga krimen.

Apang sumugod sang 2026, ginliwat na naman ni Natan ang iya pangpang-rape sa amo man gihapon nga biktima nga menor de edad sa pasulit-sulit sang makapila ka beses kag nagpamahug pa sa biktima nga kun manugid sa mga ginikanan, patyon ini kag iya pamilya.

Sa amo nga basehan, dala na nagpangduha-duha ang talatapan sang rebolusyonaryo nga Korte sang pumuluyo sa paghukom kag pagpadagdag sa silot kamatayon batok kay Jonathan Sumanion. Gilayon ini nga ginpatuman sang isa ka yunit sang NPA sa idalom sang Armando Sumayang Jr. Command bilang lehitimo nga ahensya sang pagpatuman sa hukom sang rebolusyonaryong Korte sang pumuluyo.

Sa subong nga panahon nga nagalala kag nagadalom ang sosyo-ekonomiko nga krisis sang sosyedad Pilipino tuga sang imperyalistang kontrol kag opensiba sa garuk nga kultura, nagdata na ang mga kriminalidad sa aton sosyedad kaangay sang pagpamatay, pangpang-rape, pagpangsunog, pagpang-espiya, pagpangawat sang dalagku nga mga kasapatan pareho sang baka kag karabaw, pagpangawat sa pundo publiko kag iban pa nga hinimoan nga makahalit sa kabuhi kag pangabuhi sang pumuluyo. Lakip na diri ang pagdata sang druga nga nagaguba sa utok ilabina sang aton mga pamatan-on, ang pagguba sang aton kapalibutan kag pagpangawkaw sa aton mga dunang manggad sa mga dalagku nga korporasyon sa mina kag plantasyon kaangay sa oil palm.

Ang nagahari nga sistema upod a iya mapiguson nga mga makinaryas lakip na ang mga reaksyonaryong gobyerno kag armadong pwersa indi manegar sa kasaysayan nga ang mga yara sa poder lakip na ang ila reaksyonaryo nga armadong pwersa ang nagpanguna sa pagpaluntad sini nga mga krimen batok sa katawhan.

Ang kasaysayan sang aton sosyedad nagapakita nga ang rebolusyonaryo nga kahublagan tampad sa pagtratar kag pagsulbad sa mga kasong krimen batok sa mga kriminal nga nagaluntad sa sosyedad kag sa pagpangapin sa interes sang pumuluyo kag soberanya sang pungsod. Duna sa isa ka lehitimo nga pwersa nga nagapakig-away batok sa isa ka mahimuslanon nga sistema, nagatamod ini sa mga internasyunal nga layi angot sa sistema sa hustisya kag sa mga internasyunal nga koda sang mga krimen antes ipadagdag ang nagakaigo nga silot sandig sa mga aktwal panghitabo kag sa mga makapamag-an kag makapabug-at sa kaso nga ginatatratar tuhay sa mga ginapalapta sang kaaway nga ang rebolusyonaryong hustisya isa ka “kangaroo court”. Saksi Ang pumuluyong Pilipino kag internasyunal nga komunidad sa ini nga kamatuoran.

Mabuhay Ang CPP-NPA-NDF kag ng masang ginpigos kag ginahimuslan!

The post Madinalag-on nga pagsilot sa isa ka rapist natigayon sang NPA-Southwest Negros appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.