Nagrarayhak an katawhan han San Jose de Buan ha madinaugon nga kontra-opensiba han Bagong Hukbong Bayan ha mga opensiba nga operasyon han 8th Infantry Division ha mga erya han nasering nga bungto. Napatay an usa nga sundalo han makaengkwentro han duha nga Pula nga mangaraway an tropa han 8ID hadton Septyembre 27 dapit alas-4:30 han kulop ha Barangay Hiduroma, San Jose de Buan. Nakaduok an BHB ha namamahuway nga sundalo ngan duha nga magkasunod nga ginpabuthan han kalibre .45 nga pistola nga nagresulta ha layon hini nga pagkamatay. Samtang, usa pa nga sundalo an napatay ngan duha pa an samaran kahuman makaengkwentro han BHB an usa pa kakolum han sundalo nga nakaambus ha dalan dapit 5:30 han kulop hiton gihapon nga adlaw. Una nga kumita ngan nakapagpabuto an BHB nga nagresulta ha layon nga pagkamatay han tinigdaan nga sundalo.

An mga pasista nga tropa haros usa kasemana na nga nag-ooperasyon ha mga apiki nga lugar. Buwa an ginhihinambog han 8ID nga nagresponde hira ha report han masa. An kamatuoran, ginhaharas na nira yana an masa ha lugar ngan gin-aakusaran an mga tawo nga nakupkop ha BHB amo nga naambus ngan namatyan hira.

Samtang, ginkukundenar han katawhan an ira alkalde nga hi Crystal Elizalde ha pagsering nga diri hira angay mabaraka basta diri hira guamwas han ira mga balay. Waray pangabat ngan waray pulos an sugad hini nga mga pahayag. Baga diri maaram hi Elizalde nga panahon han pangani diri poyde nga diri tumukad an mga parag-uma, kun diri madudunot an ginpagalan nga mga humay. Imbes nga depensahan an kinabuhi ngan pananag-iya han iya nasasakupan, baga hin niyutiyo nga nanginginyupo hi Elizalde ha mga sundalo ha ngaran han Municipal Task Force-Elcac. Diri sadang an iya mga pitad sugad han mga relief ngan caravan nga kapareho han ginhimo ha Barangay Can-Aponte agud tahuban an destroso han mga sundalo ha paninanum han mga parag-uma. Yana naatubang an mga parag-uma ha hulga han Super El Niño, nga dugang pa ha mas mapanhibang pa nga hulga ha pakabuhian nga mga peste nga sundalo nga dirudiretso nga naghahadi-hadian ha ira lugar.

The post 2 nga sundalo patay, 2 samaran ha engkwentro ha San Jose de Buan, Samar appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.