Makukunsidera nga buwa ngaduha an nagin deklarasyon nga “stable internal peace and security condition” (SIPSC) ha bungto han Palapag, ngan an kasunod nga pahayag nira Mayor Fawa Batula ngan Northern Samar Governor Harris Ong hadton Septyembre 18 nga nagin “madinaugon” an ira paningkamot agud makab-ot an “kamurayawan.” Hadton Hulyo la gindeklara an unang distrito ng Northern Samar komo SIPSC.

Ipokrito hira Ong ngan Batula nga napostura ngan gintatanyag an mga kalugaringon komo tag-undong han “kamurayawan, serbisyo ha katawhan ngan kauswagan,” lugod mga hunyango hira nga pulitiko nga nahibutang ha poder gamit an hiluagan nga vote-buying ngan political patronage – mga kinaiya nga nagpapadig-on ha dinastiya ngan nagseserbe ha makadirigwa nga burukrata kapitalismo. Diri la kwestyunable an ira sinseridad, waray liwat nira siyentipiko nga admi ngan ginreresolba an gamot han kawaray pagtapod ha gubyerno ngan pag-aalsa han katawhan nga Nortehanon ngan Palapagnon.

Komo mga burukrata, hul-os hira nga natuo nga makakab-ot la an kamurayawan pinaagi han pandarahug, panmuypoy ngan pagpapasamwak hin terorismo han estado ha katawhan nga makatadungan nga naato ngan naalsa. Nagin suklananan nira ha pagkab-ot han “kamurayawan” an dako nga ihap han mga “nayutralisa” nga sibilyan ngan mga kaapi han rebolusyunaryo nga organisasyon pinaagi han pwersahay ngan palansi nga pagpapasurender, iligal nga pag-aresto, panhostage, pakyas nga pagpatay ngan ektrahudisyal nga pagpatay ngan pagpapailarum ha mga komunidad ha militar nga paghahadi. Danay napatarahiti hira han talagudti nga “bulig” agud uwaton, buhagon ngan igpahirayo ha dalan han makatadungan nga pakigbisog an mga Nortehanon ngan Palapagnon.

Tikang han pirmahan ni Duterte an EO 70 hadton 2018 agud tukuron an National Task Force-Elcac, nagin tangkod nga tagasunod ngan tagapagpatuman hira Ong ngan Batula kabakyang an 8th Infantry Division. Diri mamenos ha 217,000 katawo ngan 47,000 nga pamilya nga Nortehanon ha 17 nga bungto ngan 240 nga barangay an ginlupgop han kampanya nga terorismo han estado nga nagtamas-tamas ha mga kaayusan ngan tawhanon nga katungod ha mga komunidad. Ha tanan nga prubinsya, ha Northern Samar nahilista an pinakadamo nga pagtalapas ha tawhanon nga katungod samtang ha tanan nga bungto ikatulo an Palapag. Kaupod hira Ong ngan Batula ha mga sinuporta ha palisiya han 803rd Infantry Brigade nga shoot-to-kill order ha mga sibilyan nga parag-uma nga diri “mapaklir.” Ha pahayag mismo han JTF-Storm, inabot ha 13,862 nga sibilyan nga parag-uma an ira “napasurender,” kaupod na an mga Nortehanon.

Ang pagkatig nira Ong ngan Batula ha “kamurayawan” nga nakabasar ha terorismo han estado ginpapamatud-an han makaluluoy pa gihapon nga kamutangan han ekonomiya han prubinsya, himubo nga kalidad han panginabuhi, ngan mailaw nga akses ha serbisyo. Ngaduha nira ginrarakudako an legasiya han pag-isa han income class han ira nalulupgupan samtang padayon nga gin-iinsulto ngan gin-uuripon an katawhan. Diri maabat han mga Nortehanon an ginsesering nga paghitaas han rebenyu han prubinsya nga tikang 2014-2024 la nakatirok hin diri mamenos ha ₱17 kabilyon.

Tikang 2015 tubtub 2025 nakuntento na an dinastiya ni Ong ngan hi Batula ha dugang nga ura-ura kaguti nga ₱35 para umabot ha abereyds nga ₱100 nga balor han panginabuhi kada adlaw, nga para ha gubyerno sadang na ngan diri na makukunsidera nga kablas an usa nga Nortehanon. Haros 70% han mga pamilya an nakita hin mas himubo pa ha ₱891 nga kinahanglan agud mabuhi hin disente an usa kapamilya nga mayda lima nga membro. Hira liwat an prinsipal nga nag-aantos han 25%-70% nga paghitaas ha gastos han pamilya hadton 2025 tanding hadton 2015.

Dunot an mga pampubliko nga serbisyo ha prubinsya. Duha la siyam nga pampubliko nga ospital ha Northern Samar an makukunsidera nga mayda kapas maghatag hin “first-level” nga serbisyo. Mas naghimubo pa an bed capacity han Northern Samar Provincial Hospital (NSPH) tikang 350 hadton 2016 ngadto 237 hadton 2024. Hadton Oktubre 2025 temporaryo nga hinunong ha pagkarawat hin pasyente an NSPH tungod ha overcapacity. Ha sektor han edukasyon, 472 la han 569 nga barangay an mayda pampubliko nga elementarya samtang 42 nga barangay an tubtub grade 4 la an natututduan.

Pira kadekada na nga diri nareresolba an problema ha hiluagan nga kawaray tuna. Siyam ha kada 10 nga parag-uma nga Nortehanon an waray kaseguruhan ha iya tuna nga ginhuhulad. Kaupod dinhi an dako nga ihap han mga tuna nga aada ha kategoriya nga “owner-type possession” ngan nakapailarum ha pagigin tenant. Waray pa 1% han mga parag-uma an natagan hin CLOA ha ilarum han buwa nga programa ha reporma ha tuna.

An tinuod, an mga deklarasyon nga SIPSC han dinastiya nga Ong ngan ni Batula, nga nakabasar ha dunot nga konsepto han kamurayawan, nagseserbe agud ihagudalan an mga proyekto nga huthutan han korapsyon, sugad han Support the Barangay Development Program diin diri mamenos ha ₱816 kamilyon an ginbuhos ha prubinsya. Pan-engganyar liwat an SIPSC ha pagsulod han pribado nga pamumuhunan han dagko nga kumprador ngan langyaw nga kompaniya. Ginbuhos ha Northern Samar an diri mamenos ha ₱129.3 kabilyon nga balor han pamumuhunan diin minimal an bahagdan han sektor han agrikultura samtang pinakadako an ha “renewable energy.” An dinastiya nga Ong membro han National Unity Party han trilyonaryo nga hi Enrique Razon nga damo an mga negosyo kalakip na an ha renewable energy.

Masirom ngan masalimuok an eksperyensya han katawhan ha pandarahug ngan panmuypoy han estado ngadto ha pagkab-ot hin buwa nga kamurayawan. Diri la ini angay ibuksas ngan atuhan; labaw ha tanan, kinahanglan ini magserbe komo materyal nga basaranan agud bug-uson an nagkakaurusa nga kusog han tanan nga katawhan nga Norterhanon, hira nga mga ginbiktima ngan padayon nga ginbibiktima han pasista nga estado. An riko nira nga eksperyensya ha pagrerebolusyon angay purutan hin leksyon, magserbe nga basaranan agud utro nga tukuron an organisado nga kusog ngan magpursige para ha pagpapasulong han rebolusyunaryo nga armado nga pakig-away. Kinahanglan hin rebolusyunaryo nga pagpupursige agud makab-ot an makatadungan nga kamurayawan nga nakabasar ha pagkawara ha tanikala han pangunguripon nga paniniyupi han mga dinastiya ngan burukrata kapitalista.

The post Buwa ngan nagseserbe ha burukrata nga pandambong an SIPSC ha Palapag ngan Northern Samar appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.