Nakikig-usa kami ha pakigbisog han mga estudyante han University of Eastern Philippines ha Northern Samar kontra ha gin-aatentar nga komersyalisasyon han unibersidad pinaagi han pagbabag-o han tsarter hini. Kaangayan an ira panawagan nga igbasura an House Bills 9861 ngan 9414 nga ginsalawad han mga burukrata kapitalista nga hira Marcelino Libanan, Christopher Sheen Gonzales ngan Jude Acidre, nga nagtutumuyo nga igpahirayo an pampubliko nga unibersidad tikang ha mga estudyante ngan katawhan nga angay ginseserbihan hini.
An gin-aatentar nga komersyalisasyon han UEP gintatahuban han proposisyon nga ngaranan ini komo National University for Sustainability Studies. Kun aanalisaron hin maupay an mga ginpoproponer nga balaud, kapareho ini han ginhimo ha University of the Philippines nga nagbansag ha unibersidad komo “national university” hadton 2008. Gintagan hin piskal nga otonomiya an UP ngan mas gin-abandona han estado an pagpopondo dinhi. Kada tuig dirudiretso nga gin-ibanan an badyet, tubtub nga naduso ini nga magpatuman hin mga buwa nga programa sugad han Socialized Tution and Financial Assistance Program o STFAP agud ipasa ha mga estudyante ngan ha mga komersyal nga aktibidad an pagpondo ha operasyon hini.
Sugad hini nga iskema an namamangpangan ha UEP. Yana pala damo na nga kabatan-unan an diri nakakaabot ha kolehiyo. Kun babag-uhon pa an tsarter han UEP, mas magigin limitado an ira oportunidad ngan akses ha edukasyon.
Ha magbaysay nga lenggwahe han pagigin “globally-competitive,” tuyo nga itadong an edukasyon han UEP ngadto ha langyaw nga merkado imbes nga ha lokal nga panginahanglan han mga Nortehanon ngan han katawhan Pilipino. Samtang karuyag magserbe han kabatan-unan ha kalugaringon nga nasud, gintatabrog naman hira han estado ngan baga hin mga epektos nga gin-aandam para ig-eksport komo barato nga kusog-pagtrabaho.
Santop han mga estudyante han UEP ini nga katuyuanan sanglit hadton Septyembre 17, adlaw han Balik Kampus 2026 han unibersidad, ginsab-ong han mga estudyante ha pangunguna han pankampus nga mantalaan nga The Pillar an balatengga nga nagrerehistro han ira pagtipa ha mga ginproponer nga balaud. Kundi ha estilo nga tiraniko, ginpatanggal ini han presidente han unibersidad nga hi Dr. Cherry Ultra. Karuyag ni Ultra nga tahuban an pira katuig na na nga pagsukna ha iya palpak nga pamumuno labina nga lanat niya nga pahilawigon an termino ilarum han bag-o nga tsarter han UEP. Pagtalapas ini ha katungod ha libre nga pamamahayag han mga estudyante.
An ginhimo nga pananabotahe ni Ultra gintapo hin makusog nga protesta han mga estudyante. Napiritan an unibersidad nga ibalik an balatengga, kundi komo pagbulos, ginkansela hini an Balik Kampus 2026. Waray na mahidayon an mga aktibidad han mga estudyante ngan nakarag an maiha nira nga pangangandam. Klaro nga kalugaringon nga interes ngan interes han mga kakunsabo nga burukrata kapitalista an ginpapasulong ni Ultra imbes nga pamatian an mga estudyante ngan komunidad han UEP. Waray na ngani ini magbaton ha pagkakaaksidente han estudyante nga nahulugan hin tiles ha ulo ha sulod han unibersidad hadton Agosto 26, ginduduso pa hini an dugang nga pag-abandona han estado ha responsabilidad nga maghatag hin tinuod nga libre, dekalidad ngan makanasud nga edukasyon.
Saludaran naton an mga estudyante han UEP ngan makig-usa kita ha ira pakigbisog. Maaram hira nga an unibersidad kinahanglan nagseserbe ha mga estudyante ngan ha katawhan. Diri hira angay magpahadlok ha mga pag-atentar han administrasyon han UEP nga pamingawon hira. Kinahanglan suportahan hira han mga estudyante ha magkalain-lain nga dapit han nasud ha mabayanihon nira nga pagtindog agud depensahan an pampubliko nga kinaiya han unibersidad. Kinahanglan ipakigbisog han mga kabatan-unan-estudyante, magturutdo, ngan komunidad an patriyotiko, siyentipiko ngan makamasa nga edukasyon ngadto ha pagtatalwas ngan pagpapauswag han nasud.
House Bills 9861 ngan 9414, ibasura!
Katungod ha edukasyon ngan libre nga pamamahayag, ipakigbisog!
Patriyotiko, siyentipiko ngan makamasa nga edukasyon, ipakigbisog!
The post Komersyalisasyon han UEP, atuhan! House Bills 9861 ngan 9414, igbasura! appeared first on PRWC | Philippine Revolution Web Central.
From PRWC | Philippine Revolution Web Central via This RSS Feed.