Madinaugon nga nahilansar han Bagong Hukbong Bayan (BHB) an operasyon haras kontra ha mga pasista nga tropa han 93[rd] IB hadton Septyembre 10 ha Barangay Caridad, Baybay City, Leyte dapit alas-6 han kulop. Tulo nga sundalo han militar an kumpirmado nga namatay samtang waray kaswalti an Pula nga hukbo.

An atritibo nga aksyon han BHB pagpakyas nira ha pursuit operations han 93[rd] IB kasunod han ira kontra-ambus hadton Septyembre 8 ha pareho nga baryo. Samtang ungod nga namartir hini nga agway an Pula nga mangaraway nga hi Erwin Maceda (Ka Romnik), diri ungod mayda nakumpiska tikang ha iya nga riple nga M-16. Padayon an modus nga “tanim-baril” ni Brig. Gen. Pompeyo Jason Almagro, kumander han 802nd Infantry Brigade, agud maglara hin buwa labina tikang ha syahan nga agway upat na nga tropa nira an namatay. Waray naman la hira respeto ha pamilya han mga namatay agud igsapubliko an nahitabo ha ira ha ngaran han maraut nga kontra-rebolusyunaryo nga gerra.

Ginsasaludaran namon an maisugon nga paglalansar han opensiba han yunit han BHB. Nahimo nira ini ha butnga han pira na kabulan nga focused and sustained military operations ha mga baryo ha Baybay ngan kasapit nga Ormoc City, Albuera, Burauen, Jaro ngan Carigara. Diri nira ini mahihimo kun diri nira natatagamtaman an hilarum nga atabay han suporta han masa.

Angay subaron ini han iba nga yunit pinaagi han mahugot nga pagkatin ha ginerilya nga taktika, pasuntukon ha hangin an kaaway, ngan tabrugon an ira mga tropa ha mga sona ngan prente gerilya.

Mabuhay hi Ka Romnik! Mabuhay an Bagong Hukbong Bayan!
Pankatinan an ginerilya nga taktika, pakyason an FSMO han kaaway!

The post Pula nga saludo ha pagpupursige han BHB ha Baybay, Leyte! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.