Bangud lapit nalang ang 2028 nga eleksyon, doble ang paninguha sang rehimen ni Marcos Jr nga wasakon ang CPP-NPA-NDF nga amo ang tunok sa iya administrasyon. Kadungan sang pagbubu sang madamo nga tropa militar sa erya sang Central Negros ang nagalala nga pagpanglapas sa tawhanon nga kinamatarung sang pumuluyo.

Petsa 12 sang Septyembre, may nag abot nga 1 ka kolum sang 94th IB sa Sityo Haroy, Barangay Alingasaw Moises Padilla, Negros Occidental. Nagatiner sila sa eskwelahan sa amo nga lugar, kabangdanan nga nagakahadlok ang mga estudyante nga magpalapit diri.

Magluwas diri, may iban pa nga grupo sang pasistang militar nga nagaoperasyon sa Sityo Manlama, sakop sa nasambit nga barangay kag Proper sang Barangay Macagahay, Moises Padilla.

Sa banwa sang Isabela, gin-okupar sang mga militar ang Sityo Cross kag Laguna, Barangay Mansablay. Sang nanligad nga mga binulan, madumduman nga ginsaka sini ang mga panimalay sa amo nga lugar kag gintayaan sang armas ang mga residente samtang ginaimbestigar.

Sadtong Septyembre 11, may nag-abot nga tropa sang berdugong 62nd IB sa balay ni Boboy Lozada sa Sityo Amomoyong, Barangay Trinidad, Guihulngan City. Padayon ang ila pagtiner diri tubtub subong bisan sa pagdumili sa tagbalay.

Samtang sang Septyembre 13, nagapangterorisa sa mga pumuluyo ang amo gihapon nga batayon sa Sityo Malatanglan, Barangay Budlasan, Canlaon City.

Padayon naton nga pamatukan ang militarisasyon sa kabukiran. Palayason ang 94th kag 62nd IB nga amo ang matuod nga terorista sa Central Negros.

The post 94th IB kag 62nd IB ang matuod nga terorista sa Central Negros appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.