Mabaskog nga ginakondenar sang Leonardo Panaligan Command-New People’s Army sa Central Negros ang “hugas-kamot” nga pahayag ni Lt. Col. Rio Mallanao sang 94th IB kaangot sang pagpamahug sang yunit sang CAFGU idalom sa 62nd IB sa isa ka pamilya sa Purok Louisa sa Brgy Maao, Bago City, Negros Occidental sadtong Septyembre 7.

Suno pa ni Lt. Col Rio Mallanao, ” Tao po ito nga 62nd IB working for 94th IB, ” apang daw “wiper ang ulo” ni Mallanao nga gilayon gintudlo sa 62nd IB kag ginpatuto tanan nga kapalpakan sa yunit sang CAFGU idalom sini nga batalyon ang nasambit nga pagpamahug suno pa sa gin-upload nga video sang mga biktima sa social media.

Indi ini mahimo sang mga katapo sang CAFGU kon wala sang pahanugot ukon pagmando sang mga opisyal militar diin sila ang nagapaidalom. Nangin kalakaran na sang Armed Forces of the Philippines, Philippine National Police kag paramilitar ang pagpang-abuso, pagpamahug kag pag-interbenir sa mga nagaluntad nga land dispute sa tunga sang mga tenants kag nagapakilala nga agalon may duta bangud tatak kag kinaiya sang militar ang pasista kag mersenaryo ukon bayaran kag tigdampig sa despotikong agalon may duta nga nagabayad sa ila sang kantidad sang kwarta batok sa mga magagmay nga mangunguma nga makatarunganon nagatindog sa ila kinamatarung.

Ang 94th IB kag 62nd IB sa isla sang Negros ang pareho nga may mga malaba nga rekord sa pagpang-abuso, pagpamahug kag pagpamatay sa mga inosenteng sibilyan. Pareho man ini nga may mga rekord sa makasiligni nga pagmasaker kaangay sa pagpamasaker sang mga tropa sang 94th IB sa pamilya Fausto sa Himamaylan City, Negros Occidental diin nalakip ang mga minor de edad nga nga kabataan sang biktima. Amo man ang 62nd IB nga brutal nga nagmasaker sa pamilya Jacolbe sa sityo Banderahan, Brgy Trinidad sa Guihulngan City, Negros Oriental sadtong tuig 2022 nga ginkamatay ni Cristina Jacolbe kalakip sa minor de edad nga anak sini nga si Everly Kee Jacolbe kag Rodan Montero nga isa man ka mangunguma sa lugar.

Ang pagpanghugas-kamot ni Lt. Col. Mallanao sa sini nga hitabo isa ka muklat nga paggwa sa iya kaugalingon sa accountability kag command responsibility bilang mataas nga opisyal sang 94th IB nga ululupod nga nagatrabaho sa mga tropa sang 62nd IB sa sina nga panahon.

Samtang ang Commanding officer sang 62nd IB nga si Lt. Col Divar L. Crisostomo ang “tikom-bibig” sa sini nga hitabo nga pagpamahug sang ila mga subordinates.

Ang paglupok sini nga isyu sa Hda Louisa, Brgy Maao amo ang nagpukaw sa maathag nga girian sa tunga sang 94th IB kag 62nd IB nga gusto hinabunan ni Brigadier General Joey A. Escanillas sang 3IDPA paagi sa pag-pacify sa nasambit nga mga batalyon. Apang indi ini matago bangud ini ang klaro nga manipestasyon sang padayon nga nagasingki nga krisis sa ekonomiya kag pulitika sang reaksyonaryong estado kag malapuyot nga banggi-anay sa kaangay nga mga korap, pasista, tuta kag inutil nga pamilya Marcos kag Duterte.

Gani, ginpanawagan sang LPC-NPA sa tanan nga mga CAFGU idalom sa mga batalyon nga indi gid magtuman sa mga mahigko kag iresponsable nga mando sang inyo mga matag-as nga opisyal kay kamo lang ang ila pasakaan sang kaso administribo sa pihak sang ila mga kapalpakan kag ka pritso. Dapat mangin maanting kamo sa pagbantay kay himuon kamo nga  gatasan sang inyo mga opisyal kabaylo sa areglo nga bayad sang mga agalon batok sa mga tenants nga ginapigos kag ginahimuslan sang mga ini.

Ginpanawagan man sang LPC-NPA sa mga biktima nga maisog nga magtindog sa tawhanon nga kinamatarung sa pagpangapin sa duta nga palangabuhian dira sa ululupod nga paghiliusa kag pag-organisa sang inyo hanay sa balayon sa pagpatuman sang matuod nga reporma sa duta kag pungsornon nga industrialisasyon.

Ginamanduan man sang LPC-NPA ang mga malapit nga yunit sini nga maghimo sang nagakaigo nga imbestigasyon sa matuod nga hitabo agud pormal nga mapasaka ang kaso sa Rebolusyonaryong Korte sang Pumuluyo para pasabton ang may mga kahilabtanan para ihatag nagakaigo nga hustisya sa mga biktima.###

The post “Hugas-kamot” nga Pahayag ni Lt. Col. Rio Mallanao sang 94th IB, Ginakondenar sang LPC-NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.