Padayon nga nagakomiter sang mga pagpanglapas sa tawhanon nga kinamatarung ang 94th kag 62nd IB sa mga pumuluyo sa bukiron nga mga barangay sang Central Negros. Naglala ini idalum sa pagpatuman sang kontra-insurhensyang programa ni Presidente Bongbong Marcos nga gindikta sang Imperyalistang US paagi sa National Action Plan for Peace and Development (NAP-UPD). Tuyo sini nga papason ang CPP-NPA-NDF antes ang tuig 2028.

Tuman kadesperado na ang AFP kag PNP nga kon anu-ano na lang ang ila pamaagi agud malab-ot ang ila luyag nga matabo kag bangud sini, nagataas ang isip sang mga paglapas sa tawhanon nga kinamatarung indi lang sa isla sang Negros kundi sa bilog pungsod Pilipinas.

Isa sa ila mga biktima si Edgar Antonio sang Sityo Haroy, Barangay Alingasaw, Moises Padilla nga pirmi ginabalik-balikan sang mga berdugong militar halin sang Hulyo tubtub subong agud ipaidalum sang imbestigasyon.

Samtang si Deonaldo Ramires, minyo kag taga-Sityo Napilu-an, Barangay Quinten Remo, Moises Padilla ang ginapangita sang duha ka ahente sang militar nga nakasuksuk sang bonnet. Nagpagawas man sang istorya ang mga malain nga elemento nga ginapangita nila si Ramires bangud siya kuno ang gahi sa lugar kabangdanan nga nagakabalaka ang biktima sang iya seguridad.

Ginareklamo man sang mga residente sang Sityo Haroy, Barangay Alingasaw, sa amo gihapon nga barangay ang 94th IB nga nagaperwisyo sa ila. Nangin padron na nila ang pagpanilag sa mga kabalayan dis-oras na sang gab-i tubtub nga matugbaw ang pagpahuway sang mga pumuluyo.

Dugang diri, nagapanghaylo man sila sa Sityo Tamwag, Barangay Kanggabo, La Libertad. Nagpalapta sila sang istorya nga kon sin o ang makatudlo kon diin ang mga NPA kag bisan bakat lang sang ila gintineran ukon ginaagian, hatagan nila sang 15,000 kada bulan.

Wala sang lugar ang 94th kag 62nd IB sa mga komunidad sang Central Negros. Ginapanawagan man naton ang aton mga abyan upod sang mga malapad nga masang mangunguma kag mamumugon nga ipakigbato ang ila tawhanon nga kinamatarung kag padayon nga manindugan batok sa militarisasyon.

The post 94th kag 62nd IB padayon nga nagapalapnag sang terorismo sa Central Negros appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.