Kaangay sang ginhambal sang dungganon nga komunistang manunudlo nga si Mao Zedong, “kon wala ka sang pagpangusisa, wala ka sang kinamatarung nga maghambal.” Ini ang prinsipyo nga ginasapraktika sang isa ka matuod nga Komunista labina sa pagtalakay kag pag-atubang sang lain-lain nga porma sang problema sa bisan diin nga rebolusyonaryong paghikot. Nangin kabuhi sang tanan nga rebolusyonaryo ang padayon nga sosyal nga pag-imbestiga kag pag-analisa sa sahi ukon Social Investigation and Class Analysis (SICA) sa bisan diin kita nagahulag. Makabig nga kalag sang Marxismo ang ini nga prinsipyo kag ini ang ginauyatan sang CPP-NPA-NDF sa sulod sang 57 na ka tuig nga pagsulong sa Demokratikong Rebolusyon sang Banwa paagi sa Pangmalawigon nga Inaway Banwa ilabina subong nga ara kita sa paglunsar sang ikatatlo nga kahublagan panadlong.

Ignorante ang argumento sang BKFI nga paano makahimo nga mag-imbestigar ang Pulang hukbo kon sige lang ini tago. May tatlo ka integral nga hilikuton ang hukbo nga amo ang pagpalapad sang baseng masa, paglunsar sang armadong paghimakas, kag agraryong rebolusyon paagi sa pagpamuklat, pag-organisa, kag pagmobilisa sang pumuluyo. Bangud ginasabat sini ang interes sang pumuluyo, ginapasiguro sang pumuluyo ang seguridad sang hukbo bangud sila man mismo ang biktima sa nagkalain-lain nga porma sang kapintas sang reaksyonaryong estado kaangay sang pag-pang-agaw duta, red-tagging, harassment, ilegal nga pag-aresto, extrajudicial killings, kag iban pa, bunga sang kontra-rebolusyonaryong aktibidad nga ginahimo sang pipila ka mga indibidwal kag sang mga institusyon nga nagapagamit sang pwersa sang estado. Gani, kaya nga himuon sang NPA nga buta kag bungol ang pasistang pwersa nga AFP, PNP, NTF-Elcac kag iban pa nga makinaryas sini paagi sa suporta sa malapad kag madalom nga baseng masa.

Indi mabudlay ilabina ang pagtigayon sang ma-id-id kag madalom nga pag-imbestiga sang mga kaso nga ginasumiter sang mga organisasyong masa, abyan sa rebolusyon kag sa tanan nga network sini indi lang sa kabukiran tubtob sa kasyudaran. Kag ang ginahambal nga pagpanago, isa ka estratehiya kag taktika sang gerilyang pakig-away nga ginalunsar sang NPA sa naglabay kapin lima na ka dekada. Indi ini upang kag gani amo ini ang paagi para sa padayon nga pagtungod sa rebolusyonaryong hilikuton.

Dugang diri, ang “three person command” nga ginhambal sang BKFI amo ang hinimoan sang RPA-ABB nga amo ang nagtukod sang Buklod Kapayapaan upod sang NTF-elcac. Ang RPA-ABB ang notoryus sa mga kaso sang pagpamatay nga wala nagaagi sang husto nga proseso kag base lang sa mando sang ila amo nga amo. Gani, nangin praktis na sang RPA-ABB ang mangin goons ukon bayaran sang mga nagaharing sahi kaangay sang mga agalon mayduta kag mga dalagkung komprador burgesya, kabangdanan nga indi na kita matingala nga ara sila subong sa hanay sang reaksyonaryong gobyerno.

Indi man lipod sang pumuluyong Negrosanon nga nagapamahug ang armadong makinarya sang estado dira sa mga pumuluyo agud sila mag-untat suporta sa rebolusyonaryong kahublagan kag mag-surrender.

Ang ginatinikal sini nga isip sang miyembro, kon matuod man ini, sigurado kita nga ang mayorya sang BKFI indi boluntaryo kundi resulta sang pagpang-ipit nila sa pumuluyo paagi sa pagpasaka sang pato-pato nga kaso, pagpaniplang kag pagpamahug agud magsugot nalang nga magpagamit sa NTF-Elcac nga amo ang nangunang tigpatuman sini. Nangin gatasan ini sang dalagko nga opisyal sa militar nga kon diin mas dako ang isip nga mapresentar nga surrenderees, mas dako man ang kwarta nga mabulsa.

Kaladlawan man ang ila pagpanghunaw kamot sang ginsumahan na sila sa ila mga krimen bangud indi ang kadugayon sang organisasyon ang basehan sini, kundi ang hinimoan sang ila mga miyembro ilabina ang ara sa pamunuon nga boluntaryong nagsungka sa reaksyonaryong gobyerno bangud nasilaw sa kwarta. Halimbawa sini, ang isa sa mga nagtukod sang ila organisasyon amo si Veronica Tabara, asawa sang inila nga tulisan sang Negros kag traydor sa rebolusyon nga si Arturo Tabara. Ara man nagapalikod sini si Stephen “Carapali” Paduano nga sadto congressman sang Abang Lingkod Partylist kag pareho man nga traydor sa rebolusyon.

Bisan ano pa man ang iwakal sang mouthpiece sang reaksyonaryong gobyerno, indi na ini mainto ang pumuluyong Negrosanon bangud sila mismo ang nakakita kag nabiktima sang hinimoan sang mga ido-ido sang PNP, AFP, kag NTF-Elcac kag sa mga nasambit nga pasistang institusyon. Nakatatak na sang libro sang kasaysayan ang mga ngalan sang traydor sa rebolusyon nga may mga utang nga dugo sa pumuluyo nga sa unahan mag-atubang sa ila kaso dira sa rebolusyonaryong korte para mahatagan sang hustisya ang ila mga biktima.

The post Indi na mainto ang pumuluyo sa mga mouthpiece sang reaksyonaryong gobyerno kaangay sang BKFI—AGC-NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.