Nagpapatuloy ang walang puknat na operasyong militar sa mga bayan ng Camarines Norte matapos maganap ang labanan sa pagitan ng isang yunit ng Bagong Hukbong Bayan at pwersang militar ng reaksyunaryong gubyerno sa Barangay Tigbinan, Labo, Camarines Norte nitong Agosto 1 bandang alas-5 ng umaga. Magiting na lumaban ang mga Pulang mandirigma at ligtas na nakamaniobra sa tangkang pagdurog sa kanila ng AFP.

Sa gitna ng paninibasib sa kanayunan ng reaksyunaryong AFP sa ilalim ng inutil at papet na rehimeng US-Marcos II, patuloy naman ang masikhay na pagmumulat, pag-oorganisa at pagpapakilos sa mamamayan ng magigiting na Pulang mandirigma kasabay ang iba pang rebolusyonaryong pwersa para palakasin ang pagkakaisa at buuin ang solidong lakas na masang magsasaka para ipaglaban ang kanilang karapatan sa buhay, lupa at kabuhayan.

Nanatiling hikahos at pinababayaan ng reaksyunaryong gubyerno ang magsasaka sa niyugan sa kabila ng bilyong kinulimbat sa kanila mula pa ng rehimeng Marcos Sr sa pamamagitan ng coco levy na hanggang ngayon ay hindi pa rin naibabalik sa kanila. Sa ilalim ng kasalukuyang rehimen, pawang panlilinlang sa magniniyog at mga paimbabaw na programa ang inihahain nito at walang kaginhawaang natamo ang masang magniniyog kundi lapak sa kamay, butas na bulsa at lalong pagkalubog sa kumunoy ng kahirapan.

Sa apat na taon nang panunungkulan ng ilehitimong pangulo na si Marcos Jr wala itong makabuluhang ginawa para iahon ang masang magsasaka sa nararanasang epekto sa kanila ng imperyalistang globalisasyon na lalong nagpahina sa industriya ng niyog at sa pangkalahatang sektor sa agrikultura, kundi ang manahimik at magpakatuta sa imperyalistang US, umiwas sa pananagutan at manatili sa poder sa gitna ng labis na pagkasuklam sa kanya taumbayan dahil sa talamak na korapsyon at pagkayanig ng ekonomiya at politika sa bansa.

Ramdam ng masang magbubukid at iba pang mamamayan sa malawak na kanayunan ng Camarines Norte at maging sa marami pang bayan sa rehiyon ang epekto ng pagsirit ng presyo ng langis at ang kaakibat na pagtaas ng presyo ng pangunahing bilihin sa harap ng patuloy na barat na presyo ng kanilang produktong bukid, mababang sahod ng mangagawang bukid at kawalan ng hanapbuhay ng marami sa kanayunan.

Walang ginawa ang pasistang rehimen kundi ang pakawalan ang hayok sa dugong mga berdugong militar at ilunsad ang sustenido at malawakang focus military operations saan man naroon ang mga rebolusyonaryong hukbo ng mamamayan. Sa halip na laanan ng signipikanteng pondo ang makabuluhang serbisyo para sa mamamayan, mas pinili ng rehimen sa utos ng amo nitong imperyalismong US na patuloy na supilin at tugisin ang lumalabang mamamayan at mga rebolusyonaryong pwersa para isulong ang tunay reporma sa lupa at pambansang industriyalisasyon na siyang tanging landas sa kaunlaran ng isang bayang malakolonyal at malapyudal na resulta ng imperyalistang pandarambong.

Pilit ipinangangalandakan ng reaksyunaryong estado na terorismo ang lahat na pagsisikap ng mamamayan para sa tunay na kalayaan at demokrasya at sa gayo’y ginagawang lehitimo ang pamamaslang, pagkulong at iba pang karumal-dumal na krimen na kinasasangkutan ng mga ahente estado at pwersang militar laban sa mamamayang lumalaban.

Hindi pwedeng takpan ang katotohanan na nag-aarmas ang mamamayan sa kanayunan dahil sa labis na kahirapan. Lalong hindi terorismo ang organisahin ang sariling rebolusyonaryong lakas ng masa, itayo ang mga organo ng kapangyarihan ng mamamayan para makamit ang tunay na pagbabago sa ilalim ng isang lipunang ilang dekada nang pinahihirapan ng neoliberalismo at imperyalismo. Walang maaasahan ang mamamayan sa bulok na sistema at lansakang pangangayupapa ng rehimeng Marcos II sa kagustuhan at interes ng US na lalung nagbabaon sa krisis ng lipunang malakolonyal at malapyudal.

Insulto din sa maraming naghihikahos na manggagawang bukid at maralitang magsasaka at iba pang inaaping uri sa kanayunan na ilagay ang Pilipinas sa upper-midle-income country (UMIC) status gayong kalakhan sa kanila ay nakakaranas ng gutom at kahirapan.

Nananawagan ang rebolusyonaryong kilusan sa mamamayan ng Camarines Norte na patuloy na manindigan at huwag pasindak sa golpe-de gulat na atake ng berdugong militar sa kanayunan, bagkus ay palakasin ang hanay at ipaglaban ang kanilang mga karapatan. Walang kapayapaan hangga’t lugmok sa kahirapan at patuloy na inaapi at pinagsasamantalahan ang uring magsasaka at iba pang uri at sektor sa kanayunan at kalunsuran. Mananatiling determinado ang Bagong Hukbong Bayan na palakasin ang sarili kasabay ng paglawak at paglaki ng solidong lakas ng magsasaka para isulong ang digmang bayan hanggang sa tagumpay!

The post Mamamayan ng Camarines Norte, labanan ang walang puknat na paninibasib ng berdugong militar sa gitna ng krisis ng naghaharing sistema appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.