Sadtong Agosto 04, 2026, naglunsar sang kuno “Fact-Finding Mission” ang Buklod Kapayapaan Federation Inc. (BKFI), isa ka organisasyon sang mga traydor sa rebolusyon nga gapangatubang sang mabug-at nga kaso sa rebolusyonaryong korte bangud sa ila halit nga gintuga sa pumuluyong Negrosanon kag sa bilog rebolusyonaryong kahublagan sa isla. Kaundan sang ila aktibidad ang pasulit-sulit nga pagpalapnag sang naratibo nga nagapatalang kag nagapanginto sang pumuluyo. Partikular diri ang ila daw guba nga plaka nga propaganda sang ‘spy-tagging’ nga amo kuno ang ginahimo sang New People’s Army (NPA) sa Negros.

Kaladlawan ini bangud wala sang integridad ang amo nga organisasyon nga maghambal sang matuod kon basehan ang kasaysayan kag praktika nila ilabina ang institusyon nga ila giluhod-luhuran. Ang BKFI upod ang PNP, AFP, kag NTF-ELCAC ang matuod nga may salabton sang pumuluyo sang ila indi matago nga papel sa ilegal nga pag-aresto, pagpasaka sang pato-pato nga kaso, tubtub sa pagmasaker sang mga sibilyan nga nagpakigbato para sa ila tawhanong kinamatarung. Nakatatak na sa pamensaron sa mga pumuluyo ilabina sang pamilya sa ila mga biktima ang ila pagmasaker sa mga mangunguma idalom sang Oplan Sauron (panahon ni anay presidente Rodrigo Duterte), brutal nga pagpatay sa pamilyang Jacolbe sadtong 2022 kag pamilya Fausto sang 2023. Pinakabag-o sang listahan sang ila krimen ang pagmasaker sa mga hors de combat kag mga sibilyan sa Toboso nga nag-utas sang 19 ka kabuhi. Ini nga mga hinimoan ang matuod nga nagapalapnag sang kahadlok kag kawad-on sang hustisya sa mga komunidad sa isla.

Makahambal man kita nga tuman kadamol ang mga guya sang mga traydor sa rebolusyon kag ila mga amo para ipagawas nga inosente ang mga ginpamatbatan sang silot kamatayon sang korte sa pumuluyo. Antes naglab-ot sa amo nga desisyon, pino kag maid-id ang proseso sa pagkuha sang mga mapuslanon nga datus halin sang nagpasaka sang kaso, ginpasakaan sang kaso, kag mga witness. Sunod diri ang pagpungko sang 9 ka mga indibidwal nga amo ang magtalakay ukon magtaral sang mga imbolbado sang kaso. Isa sa kinatuhay sa rebolusyonaryong korte kumpara sa reaksyonaryong korte ang paghari sang husto kag hustisya sa korte sa pumuluyo kon diin indi mabayran sang mabayran sang kwarta sang akusado o mga napamatbatan ang nasambit nga korte.

Magluwas diri, ang halos tanan nga napamatbatan sang silot kamatayon nga ginpatuman sa mga yunit sang NPA athag nga mga lehitimong target militar sa hublag bangud sa ila mga krimen nga nagatuga sang kahalitan sang pumuluyo, labina ang mga masupog nga asset kag intel. Mayorya sa mga target nga ini ang nakuhaan sang mga armas luthang halin sa ila posisyon nga amo ang gamit sa ila kontra-hublag nga mga aktibidad. Pipila man sa ila ang mga tig-a nga mga malain nga elemento sa lugar kaangay sang mga rapist kag mga kawatan sang mga dagkung propyedad.

The post Mga aktibidad sang Buklod Kapayapaan Federation Inc. (BKFI), pagpatalang sa pumuluyong Negrosanon appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.