Wala sang kalinong kag kauswagan nga naagum ang Negrosanon ilabe na ang mga pumuluyo sa Central Negros sa halos masobra isa ka tuig nga implementasyon sang National Action Plan for Unity, Peace and Development (NAP-UPD) sang rehimeng US-Marcos II kundi puno sang perwisyo, kakugmat kag padayon nga pagpanglapas sa tawhanon nga kinamatarong sang mga mangunguma kag inosenteng sibilyan nga residente sa nabukid nga bahin sang Central Negros sa pagpanguna sang pasistang 62nd kag 94th IB.

Sa baylo, may nabiktima sang pilit nga pagpasurender, puguso nga ginapatawag para himuon nga asset militar, ginapanilagan ang ila panimalay sa tion sang kagab-ihon kag may iban man nga ginakuha kag ginapamatay ang ila mga kasapatan kaangay sang manok, karabaw kag baka sang pasista kag desperadong militar.

Sa tunga sang grabe nga krisis kag miserable nga pangabuhian sang mga mangunguma sa kawad-on sang duta kag palangabuhian, ginaperwisyo pa sila sang mga berdugong militar sa mga masunod nga kalapasan sa ilang dunang kinamatarung:

A. Pilit nga pagpatawag, pagpasurender kag ginapilit nga himuon asset militar:

  1. Hunyo 23, 2026 alas 5:00 sang kaagahon, ginkadtuan si Vicente Canoy kag ginransak ang iya balay sang 6 ka mga katapo sang 62nd IB sa Sityo Bucano, Barangay Imelda, Guihulngan City, Negros Oriental. Hunyo 28 liwat sya ginbalikan sang mga katapo sang 62nd IB kag ginpahug nga kon may armas nga makita sa iya balay dal-on siya sang militar. Nagtuga ini sang kahadlok kag pagkabalaka sa biktima.

Antis pa man Hunyo 18, pilit man nga ginpatawag sang mga katapo sang 94th IB sila Lean Cantela kag JR Quinanolas sang sityo Nakuruhan, Barangay Quintin Remo, Moises Padilla. Pilit sila nga himuon asset sang militar. Pilit nga ginhatag ang cellphone kag kwarta kabaylo sang ila tahas sa pagpanilag sa NPA. Wala nila ini ginbaton kag ginpahug sila nga pamatyon kon may mapatay nga militar sa ila lugar. Nagdulot sang kahadlok kag kakugmat sa mga biktima.

  1. Si Jessie Lacadman sang Sityo Bucano, Barangay Imelda, Guihulngan City, Negros Oriental ang segi-segi man nga ginkadtu-an sa iya balay sang mga katapo sang 62 d IB kag sulit-sulit nga ginapamangkot bahin sa presensya sang mga NPA sa lugar. Nakabatyag man sang kahadlok ang biktima upod sa iya pamilya.

  2. Si Soping Isola, minyo, sang Sityo Magnawi, Barangay Villegas, Guihulngan City, Negros Oriental ang ginpatawag sang mga katapo sang 62nd IB didto sa Manjuyod, Negros Oriental. Gin-interogar siya bahin sa iya nahibaloan sini sa mga rebolusyonaryong kahublagan. Nagkahangawa ang biktima sa iya seguridad.

  3. Si Joel Carbajal mangunguma kag mqy pamilya sang Sityo Tampa, Barangay Nagsaha, Guihulngan City, Negros Oriental ang masami ginapanilagan sa iya balay panahon sa kagab-ihon nga nagahatag sang kahadlok sa biktima.

  4. Sining bulan sang Hulyo 2026, Si Jekel Landesa may asawa kag kabataan sang Sityo Punong, Barangay Trinidad, Guihulngan City, Negros Oriental ang ginpatawag man sang mga katapo sang 62nd IB sa Batallion HQ sang 62nd IB nga ara sa nasambit nga lugar kag ginpamangkot sya sa iya nahibaloan sa presensya sang NPA.

  5. Si Jelmar Sta. Ana sang Sityo Titip Daku, Barangay Sandayao, Guihulngan City, Negros Oriental ang ginpatawag naman liwat sang 2 ka nakasibilyan nga katapo sang 62nd IB paagi sa Barangay Kapitan sang Barangay Sandayao nga si Tony Callora kag ginhambalan sya nga makig istorya niya sila sa Barangay Hall sa sang nasambit nga lugar sadtong Hulyo 12, 2026. Nakabatyag sang kahadlok kag perwisyo ang biktima upod sa kapitan kay wala man sang militar nga nag-atubang sa ila.

  6. Si Jerome Dingcong sang sityo Matandugo, Barangay Sandayao halos kada semana ang ginapatawag man sang militar magsugod sadtong Enero 2026 tubtob karun bulan sang Hulyo. Pilit siya nga himuon asset militar batok sa rebolusyonaryong kahublagan kabaylo sang kwarta kag iban pa nga pasalig kag pagpanginto.

  7. Masami man nga ginalusob kag gintineran sang militar ang balay ni Dating Gabriel sang sityo Libas, Barangay Imelda, Guihulngan City, Negros Occidental. Gina-interogar man siya sa iya nahibaluan bahin sa NPA. Naghatag ini sang trauma sa biktima ilabe na kay senior citizen na.

B. Pagpanghalit kag pagpamatay sang mga kasapatan sang mga mangunguma:

  1. Hulyo 4, 2026-ginkadtuan sang naga-operasyon nga tropa sang 62nd IB ang balay ni Belen Carbajal sang sityo Tampa sakop Barangay Nagsaha, Guihulngan City. Pilit nga ginkuha ang hinigtan nga manok para gamiton sa adlaw sang anak sang biktima nga wala sang pahanugot sa nasambit nga tag-iya. Ginteniran sang militar ang iya kamaisan kag uma nga wala man sang pagpahanugot.

Sini nga bulan sang Hulyo asud-asod nga ginpamatay ang baka kag karabaw sang mga biktima sa sityo, Punong kag Batung-buang tanan sang Barangay Trinidad, Guihulngan. Ginpamatay ang nasambit nga de kantidad nga mga kasapatan matapos nagdeklarar ang mga tropa sang 62nd IB nga magpatigayon sang Curfew sa lugar magsugod alas 9:30 sang gab-i.

Napamatud-an nga mga malain nga elemento upod sa mga surenderees nga gintukod sang militar ang may kahimuan sang sini nga makahalalit nga kalakasan batok sa pangabuhian sang mangunguma sa lugar.

Antis kag durante sang Hulyo 16, halos 4 ka baka kag isa ka karabaw ang nagkalamatay paagi sa pagbuno kag paglabo. Isa sa mga biktima si Benito Billions kag 4 pa nga iban nga residente sa nasambit nga lugar.

Nagadisturbo sa kalinong kag Katawhay sang pumuluyo:

Halos isa ka bulan na nga nagatiner ang militar sa Sityo Kambairan, Barangay Trinidad, Guihulngan gikan pa sadtong ulihing semana sang Hunyo 2026. Ginhimo nga kamo militar ang sentro sang sityo lakip na ang Kambairan Elementary School. Ini ang nagadisturbo sa pagtuon sang mga kabataan upod sa ila mga maistro kag maistra. Nagdisturbo man ini sa mga residente sa lugar kag naghatag sang kahadlok sa kadam-an nga pumuluyo bangud sang grabe nga pagpahubog, pagmaoy, ginahud sang videoke sang mga katapo sang 62nd IB sa tion dis-oras sang kagab-ihon. Dugang pa ang pagpanglapta sini sang basura indi lang sa sentro sang sityo kundi lakip na ang nasambit nga buluthuan.

Labaw sa tanan, ang ginahimo nga pagpangsaka-saka sa mga kabalayan sa tion sang kagab-ihon kag panahon sang operasyon militar.

Ang madata nga paglapas sa tawhanon nga kinamatarung sang mga sibilyan kag mangunguma sa Central Negros ang repleksyon pangkabilugan kag matuod nga dagway sang NAP-UPD sang rehimeng US-Marcos Jr kag desperasyon sang pasistang Armed Forces of the Philippines nga dug ukon ang CPP-NPA.

Gani, ang PKM-CN ang lubos gid nagakondenar sa ginahimo nga kalakasan sang militar batok sa pumuluyo. Dapat nga maghiliusa sa pagpakigsumpong ang malapad nga pwersa sang pumuluyo batok sa pasismo sang estado sa Pagpamintas sang ila mga idu-ido nga berdugong 62nd IB kag 94th IB.

Suportahon ang armadong paghimakas kag magpasakop sa New People’s Army!

The post NAP-UPD sang Rehimeng US-Marcos Jr, Nagtuga sang Pagdamo sang Pagpanglapas sang Tawhanon nga Kinamatarong sa Central Negros sa Pagpanguna sang Kumbinado nga pwersa sang 62nd IB kag 94th IB appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.