Mariing kinukundena ng National Democratic Front of the Philippines sa Cagayan Valley ang planong pagpapalawig ng pagmimina hanggang 2037 ng Canadian-Australian mining company na OceanaGold.

Noong Hulyo 4, sa kaniyang state visit sa Canada, buong pagmamalaking inanunsyo ni President Ferdinand Marcos Jr. kasama ang mga upisyal ng kumpanyang OceanaGold ang kanilang kasunduan sa US$ 1.9 bilyong pamumuhunan upang palawigin ang operasyong Didipio Gold-Copper Mine hanggang 2037. Muli, nagpirma na naman si Marcos Jr para sa pagyurak sa ating karapatan sa ating likas na yaman.

Ang Didipio Gold-Copper Mine sa Kasibu, Nueva Vizcaya, na may lawak na 27,000 ektarya ay pinaniniwalaang may 1.41 milyong onsa ng ginto at 169,400 tonelada ng tanso. Pinatatakbo ito ng Australian-Canadian na kumpanyang OceanaGold. Pagkatapos ng maraming taon ng kanilang operasyon, nanganganib ngayon ang sistema ng patubig sa mga komunidad dito, na kritikal para sa kanilang pamumuhay at kabuhayan sa pagsasaka at sa ekosistema sa paligid nito.

Ipinangalandakan ni Marcos ang US$ 1.9 bilyong dayuhang pamumuhunan bilang “malaking panalo” para sa lokal na ekonomya. Subalit kailanman ay hindi ito nagdudulot ng tunay na pag-unlad para sa mamamayan, kundi isang malakihang operasyong pagmimina na nangangamkam at nangwawasak sa likas na rekurso, mineral, lupa at kabuhayan at nagpapalayas sa mga residente mula sa kanilang tahanan at nagtutulak sa kanila sa mas malalim na kahirapan at pang-aapi.

Ang mga pangmatagalang pinsala sa kapaligiran ay komon sa mga open-pit mining. Sa panahon ng tumitinding krisis sa klima, ang malawak na pagkakalbo sa mga kabundukan at lupa ay nagpapalala sa mga pagbaha at pagguho ng lupa kung may malalakas na pag-ulan at bagyo. Ang open-pit mining ang nagdudulot din ng malalang peligro sa kalusugan. Ang mga alikabok, mine tailings at kontaminadong tubig ay nagdudulot ng mga sakit sa paghinga, sakit sa balat at iba pang seryosong sakit lalo na sa mga bata at nakakatanda.

Ang mahigit-kumulang 4,000 katutubong mamamayan na naninirahan sa mga komunidad ng Didipio at Alimit, sa bayan ng Kasibu, sa prubinsya ng Nueva Vizcaya ay tuloy-tuloy na naglunsad ng mga protesta sa operasyong pagmimina ng OceanaGold sa mga nakalipas na taon. Gayundin sa Dupax del Norte, ang mamamayan ay nagbabarikada laban sa Woggle Corporation. Subalit ang mga ganid na dayuhang kumpanyang ito ay nakakapagpatuloy at magpapatuloy pa sa kanilang operasyong pagmimina dahil sa pakikipagsabwatan ng rehimeng Marcos Jr.

Palaki ng palaki ang pangangailangan ng mga monopolyo kapitalista sa mga mineral habang palakas ng palakas ang kanilang produksyon para sa kalakalan, modernong teknolohiya at para sa imperyalistang digmaan. Sa pamamagitan ng patakarang neoliberal na ipinapataw ng imperyalistang US, ang sektor sa pagmimina ng Pilipinas ay maluwag na naibubukas sa malalaking dayuhang korporasyon. Nababawasan ang mga restriksyon sa mga dayuhang pamumuhunan na nagpaparaya sa kanilang 100% na pag-aari sa mga malakihang operasyong pagmimina ng mahahalagang mineral gaya ng ginto, tanso at nikel.

Kagaya ito ng bagong kasunduang Pax Silica initiative na lalong nagpapatindi sa dayuhang pangangamkam sa mga rekursong mineral ng Pilipinas. Ang mga kasunduan kagaya ng Pax Silica na nagtatali sa atin sa pang-aalipin sa mga imperyalista kagaya ng US at mga alyado nitong Canada at Australia, ay kailangang kagyat na maibasura.

Ang nagpapatuloy na pakikipagsabwatan ni Marcos Jr. sa OceanaGold, Woggle at iba pang dayuhang kumpanyang mina sa pangangamkam sa ating rekursong mineral ay nagpapatampok sa pangangailangan na paigtingin ang ating paglaban sa malalaki at mapanirang dayuhang pagmimina. Ang korapsyon at pagsusunod-sunuran ni Marcos Jr. sa mga dayuhang mamumuhunan ang nagpapaunlak sa pagpapalawig at pagpapalawak ng mapanirang pagmimina.

Ang kayamanan mula sa tubig, lupa, kagubatan at kabundukan ang buhay at kabuhayan ng mamamayan. Ang mga mineral at iba pang natural na rekurso ang base para sariling industriyalisasyon ng ating bansa upang tayo ay makaalpas mula sa kronikong krisis, na nilikha at pinapalawig ng imperyalistang kontrol ng US sa Pilipinas.

Nananawagan ang NDF-CV sa mamamayan ng Cagayan Valley na makiisa sa mga komunidad ng Kasibu sa pagtutol sa sumasahol na dayuhang pangangamkam sa ating likas yaman.

Ang mga anti-minang barikada sa Dupax del Norte at Kasibu ay mga moog ng matibay na paglaban ng mamamayang Cagayano sa mapanirang dayuhang pagmimina. Kailangang ituloy nating itindig, palawakin at palakasin ang mga barikadang ito dahil ito ang ating matibay na panangga laban sa panggagahis sa ating karapatan sa lupa at likas yaman.

Higit sa lahat, tanging digmang bayan ang mapagpasyang makakapagpalayas sa mga malalaking dayuhang kumpanya sa mina. Tanging sa pambansa demokratikong rebolusyon sa pamamagitan ng digmang bayan lamang tayo makakalikha ng ekonomiya na nakabatay sa tunay na repormang agraryo at pambansang industrialisasyon na tutungo sa pagtatayo ng sosyalistang lipunan na tiyak na magbibigay ng maunlad na buhay sa mamamayan.

The post Tutulan ang planong pagpapalawig ng Oceanagold Didipio gold-copper mine! Palakasin ang barikada ng mamamayan at iyabante ang digmang bayan! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.