Nagabalik-balik ang ilusyon sang NTF-ELCAC nga dismantle ukon wasak kag pyerde na ang NPA bangud sa ila kuno asud-asud nga pagnyutralisa sang mga lider sini sa mga larangan sa isla sang Negros.

Ang mga naagum nga sunod-sunod nga engkwentro nga nakaangkon sang madamu nga kaswalidad sa hanay sang NPA, temporaryo lamang nga pag-atras nga kabahin sa patiyogtiyog nga pag-uswag sang rebolusyon. Kadungan sini, ang pagkautas sang kabuhi sang mga kadre sa militar kag pulitika nagpakita sang kasingkion sang inaway. Indi ini malikawan sa pagrebolusyon. Apang sa ginahambal pa, mapatay lang ang isa ka rebolusyonaryo pero indi ang rebolusyon.

Para sa mga pulang hangaway, ang mga kaupod nga naghalad sang ila kabuhi, wala nagakapatay kundi ginatanom bangud sila ang mangin inspirasyon para sa padayon nga pag-usbong sang mga maayo nga anak sang masa nga magsulod sang NPA. Ginbilin nila ang ila mga panublion para uyatan sang mga bag-o kag nabilin nga mga pulang hangaway para mas mapasulong ang inaway banwa partikular na sa isla sang Negros. Gani, ang mga naghalad sang kabuhi nga mga pulang hangaway sa milabay nga mga semana nagdiskaril sa mga pahayag sadto sang kaaway nga maihap nalang sa tudlo ang NPA. Indi dapat naton kalipatan ang ila ginawakal nga 5-7 nalang ka ‘remnants’ ang nabilin sa kada larangan nga wala nagasanto sang ila rekord sang nanyutralisa.

Nagpakita ini nga paslaw sila nga pugngan ang padayon nga pagdamo sang nagasampa kag nagasulod sa NPA sa pihak sang black propaganda kag iban pa nga porma pakamalain sa kaaway sa sahi kag ila mga armado nga makinarya sa rebolusyonaryo nga kahublagan sa social media. Gani, kaya pa sa mga pulang hangaway nga maglunsar sang mga taktkal nga opensiba sa bulig sang malapad nga masang ginahimuslan kag ginapigos. Pamatuod diri ang nagsabtanay nga opensiba sa nagkalain-lain nga larangan gerilya.

Suntok sa hangin ang ambisyon sa kaaway nga maubos nila ang NPA paagi sa sustenido nga militarisasyon sa kaumahan, pagbantay sang mga eskwelahan, pagpangred-tag, pagpanghaylo sang mga programa nga wala nagahatag sang esensyal nga sabat sa problema sa pumuluyo kag iban pa nga mga lakang kontra insurhensya kaangay sang pagpatuman sang National Action Plan for Unity, Peace, and Development (NAP-UPD). Sa baylo, ini tanan nagresulta sang madamo nga rekord sang bayolasyon sa tawhanon nga kinamatarung kaangay sang pagpanghulga, pangharas, abdak, tortyur, pagpamatay, kag iban pa.

Kadungan sini mas nagaganyat ang ini nga kahimtangan para magtangan sang armas ang mga naghimakas para sa pagpangapin sa ila kaugalingon kag maduso ang matuod nila nga handum — ang matuod nga reporma sang duta, pungsudnon nga industriyalisasyon, kahilwayan, demokrasya, kag hustisya sosyal.

Basta indi matapos ang pagpahimulos kag pagpamigos, tubtob san-o indi mawasak kag maubos ang mag-uyat sang armas kag magasulod sang NPA. Padayon nga maninguha ang CPP paagi sa absolutong pagpamuno sini sa NPA kag sa bilog rebolusyonaryong pwersa nga mauyatan sini ang mga leksyon sa nanliligad nga naagum nga pag-atras, kag mapamunuan sang hugot ang malapad nga masa nga nagahimakas para sa matuod nga sosyal nga pagbag-o.

The post Pahayag sang AFP/NTF-ELCAC nga pyerde na ang NPA sang Negros, pagtabon sang kahangawa sang padayon nga pagdako sang NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.