Mabaskog nga ginasikway sang Pambansang Katipunan ng mga Mambubukid-Central Negros (PKM-CN) ang patalang, makabi-ak kag pagpasungka sang nagahimakas nga pumuluyo para sa matuod nga reporma sa duta kag pungsodnon nga industrialisasyon kag bug-os nga rebolusyonaryong kahublagan nga ginapamunuan sang Communist Party of the Philippines (CPP) nga pagpakigsugilanon sa kalinong.

“Wala sang kalinong kon may ginagutom” ang madugay na kag matunog nga singgitan sang malapad nga pumuluyong Negrosanon bangud sasang wala kasolbaran nga krisis kag pagkabangkarote sang mapiguson kag mahimuslanong sistemang malapyudal kag malakolonyal nga pungsod Pilipinas nga nagbenepisyo sa mga haciendero-agalon may duta, burukrata-kapitalista kag imperyalistang Estados Unidos.

Ang ini nga sistema ang nagtulod sa kadam-an ilabe na sang sahing anakbalhas (mga mangunguma kag mamumugon) upod sa mga muklat nga mga pamatan-on nga estudyante, propesyunal kag pigos nga kababaihan nga magpasakop sa maragtason nga armadong paghimakas. Sa isla sang Negros, ang mga mangunguma kag mamumugon sa uma ang nagapos na sa grabe nga kapigaduhon bunga sang kawad-on sang duta kag pangabuhian. Nahigot sa barato nga kusog-pangabudlay (200-250 pesos ang adlaw kag kina iyang pakyaw sa pagtarabaho), wala sang nagakigo nga benepisyo, barato nga presyo sang ila produkto sandig sa dikta sang merkado, wala kag kulang sang subsidyo halin sa gobyerno, atrasado nga mga kagamitan sa produksyon kag wala kaseguruhan sa trabaho.

Masami, biktima man sila sang lapnagon nga implasyon sa pungsod. Mahal ang presyo sang mga balaklon tuga sang pagsirit sa presyo sang petrolyo samtang nagapos ang mga ini sa malapyudal nga sistema sa pagpanghimulos kaangay sa pautang sa iskemang singko por says, mataas nga arkila sa duta kag mahal nga presyo sang mga binhi kag abono. Biktima man sila sang pasismo sang estado kon magtinguha ini nga magtuon, mag-organisa kag mahulag bilang unyon sa pagpalig-on sang ila hanay nga maghimakas batok sa kasakon kag kapintas sang ila mga amo kag mga haciendero. Samtang nagabalakhuon sa kapuraot sa pangabuhi ang sahing anakbalhas sa bantog nga “sugarbowl” nga isla sang Negros, nagapatuyang sa ila luho upod sa ila pamilya ang mga burukkrata-kapitalista, hacienderong-agalon may duta kag burgesyang komprador kaangay ni Gov. Bong Lacson, Cadiz Mayor Bading Escalante, Congress woman Cheding Alvarez kag Cong. Javi Benitez sa ila nga korapsyon sa kaban sang gobyerno kag paghuthot sang superganansya sa industriya sang kalamay.

“Singit sa bulan kag wala unod” ang handum sang mga burukrata-kapitalista upod sa Armed Forces of the Philippines (AFP), Philippine National Police (PNP) kag NTF-Elcac sa isla sang Negros kaangot sa pagpanawagan sang “Localized Peacetalk.”

Kon indi mapatuman ang matuod nga reporma sa duta kag pungsodnon nga industrialisasyon, wala man sang matuod kag malawigon nga kalinong ang magaluntad. Indi man maangkon ang kalinong nga nabase sa hustisya sosyal kon indi mag-agi sa maduguon nga armadong rebolusyon nga amo ang husto nga banas nga ginausoy kag ginahimakasan ng sang CPP-NPA-NDF sa nagaluntad nga civil-war sa pungsod. Kaangot sini, lig-on nga ginsuporta sang PKM-CN ang pagtib-ong kag pagpadayon sang armadong paghimakas sang Leonardo Panaligan Command-New People’s Army sa Central Negros upod sa iban pa nga mga larangan gerilya kag kumand sang Bag-ong Hangaway sang Banwa sa Norte tubtob sa Sur nga bahin sang isla nga absoluto ginapamuan sang Communist Party of the Philippines.

Labaw sa tanan, hugot nga ginsuportahan sang PKM-CN ang mga negosyador kag opisyal nga tiglawas sang pumuluyong Pilipino kag bug-os nga rebolusyonaryong kahublagan nga amo ang National Democratic Front of the Philippines sa pangkabilugan kag pungsodnon nga pagpakigsugilanon para lab-uton kag angkunon ang matuod nga kalinong kag katawhay sa pungsod.

The post PKM-CN: Localized Peacetalk nga Ginatanyag sang LGU, Hugot nga Ginasikway appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.