Sa tiarabot nga Mayo 28, hahandumon san Bagong Hukbong Bayan-Northern Samar an ikatulo nga anibersaryo san kamartir ni Joshua Sagdullas, sayo sa upat nga Pula nga mangaraway nga madarahug nga ginpatay san pasista nga rehimeng US-Marcos ngan 43rd Infantry Battalion sadton tuig 2023 sa Barangay Mabini, Catarman. Urhi man, karuyag igpaabot san amon bug-os nga kaapihan an pinakahitaas nga pagpasidungog sa iya tim-os nga serbisyo ngan sakripisyo para sa pagtatalwas san masa nga parag-uma ngan hiluag nga katawhan.

Labaw pa, duro an amon kangalas sa sirkumstansya san iya pagkamatay. An tinuod, buhi pa siya san madakop san pasista nga kaaway ngan gintortyur antes patayon. Ginhigtan an iya liog san pisi ngan gindanas kutob makaabot sa baryo, nga grabe nga iginkasubo san masa nga nakakilala sa iya. Luyo sini nga pagpapakuri, waray niya igintutdo an mga kasama ngan masa bisan kun ginpipirit siya san kaaway nga magsumat. Nadelatar gud an pagpadangat sini nga report tungod san grabe nga panhadlok san militar sa masa para magsumat san kaagi, kadungan san grabe nga militarisasyon sa erya. Tungod sini naaro gud kami pasaylo sa pamilya ni Joshua ngan iya mga hinigugma sa kinabuhi.

Si Joshua nakilal-an san masa ngan mga kasama sa Northern Samar komo si Ka Miyong. Tikang sa klase nga igbaw nga petiburgesya sa kasyudaran, napukaw siya samtang naeskoyla sa University of the Philippines-Tacloban College. Katapos makagradwar sin mayda kadungganan nga magna cum laude, nagdesisyon siya nga magin pultaym nga aktibista sa syudad. Tungod san pira katuig nga pananarahug san pasista nga kaaway sa iya kinabuhi ngan pagtuo nga armado nga rebolusyon la an magtatalwas sa katawhan Pilipino, nagpultaym siya sadton 2020 sa butnga san pandemya.

Komo Pula nga mangaraway, ginios siya sa Northern Samar, partikular sa syahan nga distrito. Nagserbe siya nga instruktor sa pulitika ngan sayo nga yawe nga upisyal nga naningkamot sa komprehensibo nga pagpakusog san rebolusyunaryo nga kagiusan sa prubinsya. Binulig siya sa pagtutukod san base panmasa, paglansar sin mga kontrapyudal ngan kontrapasista nga pakig-away, ngan pagpasulong san mga armado nga opensiba.

Waray masa sa iya giniusan nga mga baryo nga diri niya suok tungod kay mauyatom siya sa pagpupukaw sa ira. Mainadmanon si Ka Miyong san problema san masa ngan iya dayon ini gintatagan sin kasolbaran. Tungod sini kilalado gud siya san masa labina sa syahan nga distrito.

Labot sini, hinigugma siya san masa nga parag-uma tungod kay dagmit siya nga nakahaum sa ira. Pirme siya naintegreyt sa ira pag-uma, paglulukad, pag-abaka, pag-uring, pagsulo, ngan iba pa nga pakabuhian. Kun ano an mga kahiaraan nira nga trabaho karuyag gud niya mahibaro. Kun mayda siya kaatubang nga masa pirme niya ginkakantahan san iya komposo nga kanta. Usa sini an:

“Ako in nag-aantum nga pirme kam kaupod
Ugaring kay hiluag lupgop han rebolusyon
Ako in magbabyahe higrayo nga baryo
Para makakilala han mga sugad ha iyo”

Usa kabeses, nagkamayda an yunit ni Ka Miyong sin pankultura nga aktibidad ngan mayaon bisita nga masa. Nagluwa siya ngan mayda siya gindagkutan nga gasolina sa iya atubangan. Iya la ini ginlakaw an butnga san naglalarab nga kalayo, ngan nagyakan, “Sugad gihapon sini an akon pag-aagian san akon kinabuhi, pero susungsungon ko iton bisan kun mapaso. Kay aram ko nga para ini sa ngaran san pagtatalwas san hiluag nga katawhan nga maiha na nga nakalubong sa grabe nga kakurian.

Nagtangis an damo nga masa san iya ginhimo. Ugaring kay napaso an iya siki, pero naghiniyok la siya bisan kun nasusul-an.

Dagmit liwat siya nga napahiara sa buruhaton militar. Sa tulo katuig niya nga pagin Pula nga mangaraway hul-os siya nga nakahaum sa pisikal nga aspeto san pagigin hukbo san katawhan. Damo an iya nagin eksperyensya sa pag-upod sa mga taktikal nga opensiba. Diri siya huhulupon nga kasama; bisan sa butnga san dagko nga operasyon san kaaway, ginpapaabat niya sa igkasi mangaraway nga maisugon siya sa pag-atubang sa mga pasista. Sa mga hirayo nga kalakaw diri siya maoobserbaran nga naangal, lugod pirme la malipayon bisan naman la nahipapakulob o nahuhulog. Lugod nasuri siya, naaksyon dara an iya armas, ngan nalata “Hain an kaaway kay papatayon ko!” Nakakapahitaas ini san moral san mga kasama.

Hinasog gud siya sa prinsipyo san simple nga panginabuhi ngan maduroto nga pakigbisog. Waray pagkaon sa guba nga waray liwat niya matadihi, ngan diri siya nasugad nga “Diri ak siton,” lugod ginpapakita niya sa mga kasama nga kaya mabuhi san hukbo bisan sa mga simple la nga pagkaon. Mayda ngani gisi san iya bado iya dayon ini gintatangkupan, tungod kay hatag ini san masa nga nagkukuri sanglit waray siya ginkakarag nga panapton. Sugad an iya determinasyon nga ipasulong an rebolusyunaryo nga kawsa san masa nga anakbalhas.

Nahinunumduman namon si Ka Miyong komo giuupayi nga kasama. Kun naaagi siya san mga personal nga problema dire niya ini iginlilikaw san iya koliktibo. Waray siya kaguol sa pagsakripisyo para sa masa ngan mga kasama, ngan labaw san ngatanan waray siya kabutlaw nga magpasaro ngan pahitas-on an ira kapukawan.

Sa halipot nga panahon nga nagkaupod kami nakit-an namon an iya dagmit nga pagremolde, maupay nga pakig-usa sa igkasi kasama, ngan dagmit nga pakisuok sa masa. Iginhalad niya an iya kinabuhi sa rebolusyon ngan waray pagruhaduha nga nag-amot sa pagpasulong san armado nga pakig-away. Nagseserbe siya nga inspirasyon sa iba pa nga kabatan-unan nga napupukaw sa panginahanglan san rebolusyon sa atubangan san natikagrabe nga krisis san sistema nga bagakolonyal ngan bagapyudal.

Bisan san-o diri siya malilimtan san mga kasama nga iya gin-upod ngan san masa ngan katawhan nga iya gin-ugupan kutob mawad-an siya kinabuhi. Sa anibersaryo san pagkamartir ni Ka Miyong, saludaran naton siya ngan an ngatanan nga martir san rebolusyon Pilipino. An aton kahidlaw sa ira aton igtransporma ngadto sa naglalarab nga determinasyon nga igpadayon an ira pakigbisog, hul-os ngan bug-os nga magserbe sa katawhan, ngan ipasulong an demokratiko nga rebolusyon san katawhan kutob sa matalwas an katawhan nga tinalumpigos.

Mabuhay si Joshua “Ka Miyong” Sagdullas! Mabuhay an ngatanan nga martir san rebolusyon!
Kabatan-unan, kumadto sa kabaryuhan, umapi sa Bagong Hukbong Bayan!

The post Hitaas nga Pula nga pagsaludar kan Joshua “Ka Miyong” Sagdullas, hinigugma nga mangaraway san BHB-Northern Samar, susbaranan san kabatan-unan! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.