Ang matuod nga kinaalam, makita kag magmanipestar sa rebolusyonaryong kahublagan, kon diin indi lang simple ginatun-an kag ginahulagway ang katilingban, kundi ginabag-o ini, kag dako ang papel sang pamatan-on sini.

Pinakataas nga pasidungog ang ginhatag sa Romeo Nanta Command-NPA, South Central Guerilla Front sa Cauayan 5 (Francis Vince “Ka Poy” Dingding, Rolando “Ka Anyo” Dantes Jr, Jobert “Ka Robi” Casipong, Gilbert “Ka Kolintong” Tingson, kag Alex “Ka Kaya” Lanquita) nga maisog nga nag-atubang sa sakripisyo kag kabudlayan tubtob nga ginhalad nila ila kabuhi sa rebolusyon sadtong May 16, 2026 sa Brgy. Abaca, Cauayan, Neg. Occ. Sa atubang sang mas superyor nga pwersa sang kaaway, wala pangduhaduha nga nagbato ang ini nga mga pulang hangaway para sa handum sang malapad nga  masa nga amo ang matuod nga kahilwayan kag hustisya sosyal.

Isa sa mga namartir si “Ka Poy” nga nagserbe nga Sekretaryo sang Larangan sang South Central Negros halin sang tuig 2024-2025. Bilang kadre sa Partido, makita ang pagka determinado, kapagsik, kag ang iya rebolusyonaryong optimismo sa lain-lain nga hilikuton. Sa halos lapit isa ka dekada niya sa armadong paghimakas, wala ini nakitaan sang pagpangluya kag bisan sa iya mga limitasyon sa iya lawas labina sa mata, wala ini nangin opang para sa pagpadayon sa pagserbisyo sa masang ginahimuslan kag ginapigos.

Gintalikdan niya ang kabuhi sang kasyudaran kag ginpili ang mabudlay kag masiot nga banas sang armadong rebolusyon. Imbes nga magpa-ulipon sang kamot sang nagaharing hut-ong, gin-gamit niya ang iya kaalam kag abilidad sa pagbulig sa mga mangunguma kag mamumugon sa uma sa kabukiran sang Negros. Bisan ano nga pagpinta kag pagpakamalain sang AFP-PNP/NTF-Elcac ni Ka Poy, indi sini matabunan ang kamatuoran nga ginapalangga siya sang masang Negrosanon.

Kilala si Ka Poi sa iya mga binalaybay nga nagareplekar sa kabuhi sang masa kag hukbo. Isa ka artista nga nagagamit sang mga gamhanan nga mga tinaga para sa pagpukaw, pag-organisa kag pagmobilisa sa mga pamatan-on kon diin siya nagahulag. Halandumon siya sang masa nga nakakilala sa iya.

Isa ka kaladlawan ang ginahimo sang AFP-PNP/NTF-Elcac sa pagpahid sang higko sa pangalan sa isa ka namartir nga kaangay ni Ka Poy nga isa ka pamatan-ong intelektwal kag pulang hangaway.

Sa matuod, indi na ini bag-o nga naratibo kag black propaganda sang kaaway. Sa madamo na nga rekord sang nangin martir nga mga pulang hangaway halin sa hanay sang kabataang estudyante, propesyunal kag iban pa, mas dapat nila binagbanagon ngaa ang ini nga mga personahe o indibidwal nagasulod sang armadong paghimakas partikular sang NPA. Indi sila “brainwashed”, natalang ukon napahug. Ini sila ang matuod nga nakakita sang matuod nga kahimtangan kag nagdisisyon nga mangin labot para sa pag-angkon sa matuod nga kahilwayan, demokrasya kag pagbag-o sang pungsod.

Gani, magpabilin nga buhi ang handum sa mga rebolusyonaryong martir. Ang ila pangalan ang ma-ukit sa kasaysayan sang rebolusyong pilipino nga indi malipatan sa masunod nga mga henerasyon.

Mabuhay ka Ka Poi kag ang bilog Cauayan 5!

The post Vince Francis “Ka Poy” Dingding: Pamatan-on, Artista, Edukador, komunista, Pulang hangaway! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.