Si Dino “Ka Yulo” Pane, 45, may asawa kag kabataan ang halin sa pamilya sang imol nga mangunguma kag kamagulangan sa 7 ka mag-utod. Si ka Yulo hipuson kag mahuluy-on ang kinaiya. Maayo man ini makig-amigo sa iya mga silingan kag wala man ini naga-abusar sa ila lugar. Inde man siya gusto sang gamo. Isa siya ka produktibo nga pwersa sa produksyon ilabe na sa mabug-at nga trabaho kaangay sang karga-tapas, pangopras kag iban pa.

Naangutan sa kahublagan si Ka Yulo sang tuig 2022 kag nagsugod na bulig sa mga trabaho sa lokal panahon nga naka-abot sa ila lugar ang yunit sang NPA. Aktibo man sa tahas nga ginapabuligan sa iya. Ang ini nga hilikuton ang nakabulig sa iya paghangup sang matuod nga kahimtang sa iya lugar kag ang bilog nga pungsod. Mahapos sa iya ang paghangup sang sistema bangud sang direkta sini nga pag-imbolbar sa produksyon kag ang grabe nga kapigaduhon kag gutom nga nasinati ilabe na ang barato nga sweldo sa mga mamumugon sa kampo nga naga lab-ot lamang sa P250 pesos kada tonil. Ang kakulang duta nga halos ang mga tawo sa ila lugar halos nagasalig lang sa pamugon sa kampo samtang mahal nga balaklon kag barato nga presyo sa ila mga produkto.

Nakita man ni Ka Yulo ang baskug nga pagpamigos partikular sa ila lugar. Pwerti ang pagpamigos kag pagpangdaug-daug dira sa iya mga pamilya, abyan kag iban pa nga suod nga indibidwal.

Sang ara na sa hukbo si Ka Yulo wala nagareklamo sa mga tahas nga italana sa iya nga trabaho sa pihak sang limitasyon. Wala ginapili ang mabug-at ukom mamag-an bangud iya ginakilala nga para sa masa kag rebolusyon. Nagapasakop ini sa mga taktikal nga opensiba kag hilikuton masa dira sa pagpalapad kqg pagrekober sang baseng masa.

Madumduman nga gindakop, giturtyor kag gintiro-patay si Ka Yulo sadtong Abril 23, 2026 alas 6:00 sang aga sa Sityo Nabuluan, Barangay Bucalan, Canlaon City, Negros Oriental samtang nagapahuway sa balay sang masa bangud nagasupreher ini sa sakit nga pneumonia, taas ang hilanat kag maluya. Wala sang ikasarang magbato si Ka Yulo sa mga pasistang 62nd IB sina nga panahon. Gintamnan man sang M16, bandolier kag mga bala sang militar si Ka Yulo serbe ebidensya kag paghinabon sini sa peke nga engkwentro kag palpak nga operasyon militar.

Makabig nga hors de combat si Ka Yulo nga dapat respituhon sang militar bisan pa nga lehitimo nga katapo sang NPA si Ka Yulo. Ang brutal nga pagpatay sang tropa sang 62nd IB isa ka muklat sa paglapas sa CARHRIHL kag pangkalibutanon nga laye sa gyera.

Ang Leonardo Panaligan Command-New Peoples Army-Central Negros kag sa mga rebolusyonaryong pwersa nagahatag sang mataas nga pagpasidungog kay Ka Yulo nga wala sang pagpangduha-duha nga naghalad sang iya kabuhi para sa kawsa sang masang pigos kag ginahimuslan agud maangkon ang matuod nga kahilwayan kag demokrasya sa pungsod. Ang iya kamatayon isa ka matambok nga abono sa pagpabaskog sang armadong paghimakas nga magserbi nga sulondon kag panghangkat sa mga mangunguma, mamumugon sa uma, kabataan kag mga propesyonal nga magpadayon sa armadong paghimakas paagi sa pag pasakop sa New People’s Army.

Kadungan sini, lubos man ginapasidunggan sang LPC-NPA ang 10 ka mga Pulang Hangaway sang Banwa sang Roselyn Jean Pelle Command-New People’s Army-Northern Negros Gurrilla Front upod sa 9 ka mga indi armado lakip sang 2 ka mga menor de edad nga wala kaluoy nga ginmasaker sang mga terorista kag uhaw sa dugo nga katapo sang 79th IB sadtong Abril 19, 2026 sa Barangay Salamanca, Toboso, Negros Occidental.

Sila ang tunay nga baganihan sang malapad kag nagahimakas nga pumuluyong Negrosanon kag rebolusyonaryong Pilipino. Ang ila kamatayon upod kay Ka Yulo magaserbe nga kalayo nga magdilaab sa liwat nga pag-usbong sang armadong paghimakas nga angkunon ang ma5uod nga hustisya. Kamo ang amon inspirasyon sa pagpadayon sa pagpalupok sang bulkan sosyal sa isla sang Negros paagi sa pag -usoy sa dalan sang pangmalawigon nga inaway banwa tubtob sa mataas nga halintang.

Mabuhay ka Ka Yulo!
Mabuhay ang Toboso 19!
Mabuhay ang Armadong Paghimakas!

The post Pagpasidungog kay Ka Yulo (Joemarie Dino Pane) kag sa “Toboso 19” appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.