Samtang nagakasubo ang pumuluyo sa Negros ilabe na ang pigos kag ginahimuslan nga sahing anakbalhas sa pagkamartir sang ila 10 ka pinalangga nga mga Pulang hangaway sang banwa upod sa 9 ka mga indi armado nga indibidwal sa indi patas nga inaway sa tunga sang Roselyn Jean Pelle Command sang New People’s Army sa Norte nga bahin sang isla sadtong Abril 19, 2026, ginkalipay man sang mga dalagko kag despotikong agalon may duta kag lokal nga kapitatalista upod sa burukrata kapitalista sa probinsya kaangay ni Gov. Eugenio Bong Lacson.

Dako nga tunok para kay Lacson upod sa dalagkong komprador burgesya ang padayon nga pagluntad sang New People’s Army sa isla sang Negros nga nagasulong sang armadong paghimakas agud ipaluntad ang matuod nga kalinong kag katawhay base sa hustisya sosyal diin ginaduso ang pagpatuman sang matuod nga reporma sa duta kag pungsodnon nga industriyalisasyon.

Wala sang ginapaabot ang bug-os nga rebolusyonaryong kahublagan nga absoluto ginapamunuan sang Communist Party of the Philippines (CPP) upod sa malapad nga pumuluyo sa probinsya kay Lacson, kundi ang paghinabon sa mga krimen sang iya mga idu-ido nga Armed Forces of the Philippines (AFP), Philippine National Police (PNP), NTF-Elcac kag mga paramilitar idalum sa 303rd BdePA sa pagpamuno ni Brigadier Gen. Ted Dumosmog kaangay sa ginpaggwa sini nga pahayag sa publiko nga “indi na kinahanglan ang imbestigasyon bangud lehitimo ang natabo nga engkwentro sa tunga sang New People’s Army kag pasistang tropa sang 79th IB sa Toboso, Negros Occidental sadtong tinalikdan nga Abril 19.

Wala man sang kinalis ang panindugan ni Lacson sa iresponsable kag wala nagpaminsar nga pahayag ni Gibo Teodoro Secretary sang Department of National Defense (DND) nga gindumili ang pagpakigsugilanon sa pangmalawigon nga kalinong sa tunga sang National Democratic Front of the Philippines (NDFP) kag Government of the Republic of the Philippines (GRP).

Wala nahangpan ni Lacson nga may duha ka gobyerno nga nagaluntad sa pungsod. Ang rebolusyonaryong gobyerno nga ginatiglawas sang NDFP kag reaksyonaryong gobyerno nga nga ginatiglawas man sang GRP. Ang punto ni Lacson kag GRP nga ibuy-an ang mga armas antis himuon ang negosasyon sa kalinong, isa ka iskema sang pagpanginto kag pagpatalang sa pumuluyong Pilipino ilabe na sa bug-os nga rebolusyonaryong kahublagan sang CPP-NPA-NDF.

Tuyo ni Lacson, ni Teodoro sang DND kag AFP upod sa rehimeng US-Marcos Jr nga pasurenderon ang rebolusyonaryong kahublagan ilabe na ang CPP-NPA. Wala ginakilala ni Lacson kag GRP ang “state of belligerency” sang tagsa ka gobyerno. Wala sang matabo nga negosasyon kon wala man sang angay nga pagkilala kag pagrespito sa isa ka estado.

Dapat hangpon ni Lacson nga ang ugat sang gyera sibil sa pungsod bangud nga may ginahimuslan kag ginapigos kaangay sa paghuthot ni Lacson upod sa hacienderong agalon kag komprador sa isla sa dugo kag balhas sang mga mamumugon kag mangunguma para suyupon ang super-ganansya sa industriya sang kalamay sa isa ka bantog nga “sugarbowl” nga probinsya sang Negros.

Hipokrito nga nagapakuno-kuno si Lacson nga amo ini ang rason nga-a madamo nga Negrosanon ang nagapasakop sa dalan sang armadong rebolusyon, naga-uyat sang armas para bag-ohon ang garuk kag mahimuslanon nga sistema sang katilingban Pilipino nga ginadominar sang mga elitistang pyudal, burukrata-kapitalista kag imperyalistang Estados Unidos.

Samtang wala sang kalinong kag katawhay nga nakabase sa hustisya, determinado ang Leonardo Panaligan Command-New People’ Army (LPC-NPA) sa pagpa-abante sang armadong paghimakas. Ini ang serbe nga kasugpon sa ginhimakasan sang “Toboso 19” nga nangin biktima sang kapintas sang reaksyonaryong estado paagi sa pasistang 79th IB sa Toboso, Negros Occidental. Determinado kag pursigido ang LPC-NPA nga pasingkion ang inaway banwa para daugon ang Demokratiko nga Rebolusyon sang Banwa paagi sa pang malawigon nga inaway banwa kag angkunon ang pungsodnon nga kahilwayan kag tunay nga demokrasya.

The post Gov. Eugenio Bong Lacson, Nagahinabon sa Krimen sang 79th IBPA Kaangot sa Pagmasaker sa Toboso 19 appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.