Ginpalapnag sang pasistang 62nd IB ang masingki nga terorismo batok sa mga inosenteng mangunguma sa Canlaon City, Negros Occidental halin sadtong Abril 21 tubtob Mayo 10 sini nga tuig 2026.

Wala sang natabo nga engkwentro sa tunga sang yunit sang Leonardo Panaligan Command-New People’s Army sadtong Abril 21 pasado alas 3:00 sang kaagahon sa Sityo Palaming, Barangay Binalbagan, Canlaon City. Ang matuod, ginpaarakan luthang sang intel kag scout platoon sang nasambit nga tropang militar ang payag nga ginabantayan ni Eddie Marco, mangunguma kag residente sa lugar.

Peke man nga engkwentro ang natabo sadtong Abril 23 alas 6:00 sang aga sa Sityo nabuluan, Barangay Bucalan, Canlaon City. Ang sirkumstansiya sini amo nga gindakop, gintorture kag gintiro-patay sang militar si Dino Pane (Ka Yulo). Si Pane nga isa ka katapo sang BHB ang naga-antus sang iya sakit nga pneumonia. Wala sang ikasarang magbato bangud maluya ang lawas sa sobra nga hilanat kag wala sang armas. Gintamnan si Ka Yulo sang M16 rifle, bandolier kag iban pa nga kagamitan militar.

Kabutigan man ang ginpaguwa nga drama sang engkwentro sa tunga sang 62nd IB kag yunit sang NPA sa Sityo Palaming, Barangay Binalbagan sa amo gihapon nga syudad alas 6:00 sang aga Mayo 10, 2026. Matapos sang peke nga engkwentro, ginlusob liwat sang militar ang balay ni Eddie Marco. Gin-interogar si Eddie kabahin sa presensya sang NPA kag ginapahug nga kastiguhon. Wala sang engkwentro sa lugar bangud wala man sang presensya sang NPA sa nasambit nga sityo.

Ang pagpalapnag sang terorismo sang 62nd IB sa Canlaon ang nagadisturbo kag nagaperwisyo sa matawhay nga pag pangabuhian sang mga mangunguma sa lugar. Samtang nagahinabon naman ini sa ila mga palpak nga operasyon militar batok sa LPC-NPA.

Lubos gid ginakondenar sang Leonardo Panaligan Command-New People’s Army (LPC-NPA) ang mga kalakasan sang 62nd IB nga nagaterorisa kag nagabayolar sang tawhanon nga kinamatarung sang pumuluyo kag internasyunal kag makitawhanon nga laye.

Ginapanawagan man sang LPC sa pumuluyo sa Central Negros nga mag-isa kag mag-organisa sang ila hanay para sa pagpalig-on sang panindugan nga magpakigbato batok sa pasismo sang estado tubtob nga maangkon ang matuod nga kalinong nga nakabase sa hustisya sosyal.

The post Terorismo sa Canlaon City, Ginpalapnag sang 62nd IB appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.