https://philippinerevolution.nu/wp-content/uploads/2026/05/20260510.npa-negros-island-statement.mp3

Indi ang pagka lehitimo sa engkwentro ang dapat naton bangi-an. Ang sentro dapat sang aton mga argumento ara sa panginahanglanon sang independent kag impartial nga imbestigasyon bangud sa mga bayolasyon sa tawhanon nga kinamatarung, rules of engagement kag sa mga paglapas sa laye sa gyera nga ginkomiter sang AFP partikular sa 79th IB (ang punto sini).

Masyado kalayo sa konteksto kag wala sang lohika ang pahayag ni Gov. Eugenio “Bong” Lacson nga indi kinahanglan sang imbestigasyon ang ginakabig nga Toboso 19 o Negros 19. Magluwas sini, insensitibo ang ini nga pahayag nga kaangay lang wala ginatagaan balor ang kabuhi kag dignidad sang mga indibidwal nga nagkalamatay sa Barangay Salamanca, Toboso. Kaangay lang sini nga hayagan niya nga ginasuportahan ang nagalungtad nga kultura sang impunidad ukon ang kawad-on sang akawntabilidad kag hustisya sa isla sang Negros nga kaparti sa sistema nga ginapalungtad sa mga nagaharing sahi kag sa ila mersenaryong AFP/PNP/NTF elcac.

Syempre, gin-ekspektar naton ini nga pahayag halin sa parehas ni Gov. Bong Lacson nga ara sa kubay sang mga nagaharing pamilya sa Negros nga amo ang nagabenipisyo sang proteksyon halin sang mersenaryong AFP kag PNP labina partikular sa Occidental sa pila na ka dekada. Kabahin ang ini nga pamilya sa nagamonopolyo sa duta kag nagapadalagan sang mga haciendas kon diin ang madata nga pagpanghimulos sa mga mamumugon sa uma, pagpang-agaw sang duta kag iban pa nga porma sang indi makatarungan nga sistema sang pagtrabaho. Gani, mismo si Lacson nga nagapanag-iya sang punongan o palaisdaan sa San Carlos City, grabe nga nagahimulos sa iya obreros nga wala sang benipisyo kag nagatrabaho sang 24 oras sang 7 ka adlaw kada semana.

Sa pagkamatuod, wala ginapanginwala sang CPP kag AGC-NPA ang natabo nga enkwentro sa Salamanca Toboso kag indi ini kinahanglan i-contest. Pero indi ika negar nga sa tunga sini nga enkwentro ang indi matabunan nga reyalidad sang desperadong kahimuan sang AFP. Ang punto sini amo ang mga nakomiter sang AFP nga kinahanglan imbestigahan, gane ini mismo ang papel sang CHR. Dugang sini, gina-abiabi namon ang iban nga mga organisasyon kag entitidad nga handa maglunsar sang separado, independente kag imparsyal nga imbestigasyon.

Bisan sa tunga sang mga kinakabig nga lehitimo nga engkwentro nga ginahambal ni Lacson, dapat iseguro gihapon ang kaluwasan sang sibilyan o indi armado nga grupo o indibidwal nga ara sa tunga sini. Kilala ang AFP/PNP-NTF elcac sa ila kasaysayan sang mga record sang kalapasan kaangay sang pagpatay ukon extrajudicial killings, abduction, harassment kag iban pa batuk sa mga sibilyan, labina sa mga mangunguma, media personnel, peace and HR advocates, environmental advocates, taga simbahan, youth activist kag iban pa nga nagtib-ong sang kaayuhan sang malapad nga masa. Mas labi nga kinahanglan ini imbestigahan bangud madamo nga insidente na sang masaker ang ila ginhimo nga ginatabunan lang sang tinaga nga “kontra insurhensya” .

Ang tanan nga nagahimakas nga pumuluyo kag nagasuporta sang ila pagbato ginabansagan nga mga terorista, kon kis-a komunista kag ginatarget sang opresyon gamit ang armadong makinaryas sang estado kon sa diin nagapungko si Lacson sa tuktok sini.

The post Insensitibo kag wala sang lohika ang pahayag ni Gov. Bong Lacson—AGC-NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.