Patay ang 2 ka katapuan sang 47th matapos ang madinalag-on nga opensiba sang isa ka yunit sang Armando Sumayang Jr Command (ASJC-NPA) kagapon sa Mayo 4 pasado alas 5 sang aga, sa Sitio Matab-ang, Barangay Masaling, banwa sang Cauayan. Luwas nga nakamaniobra ang yunit sang NPA matapos ang panghitabo.
Malawig na nga gaoperasyon ang pasistang militar (15th kag 47th IB) sa mga bukiran nga bahin sang banwa sang Cauayan, Candoni, Ilog, kag sa syudad sang Sipalay kag Kabankalan halin pa sadtong Pebrero. Ang ulihi nga operasyon haras nga nalunsad sa NPA sa Sitio Looy, Barangay Yaoyao, sadtong tinalikdan nga bulan tubag man sa mga demanda sang pumuluyo sa makahalit nga presensya sang reaksyunaryong tropa sa nasambit nga mga lugar.
Lubos man nga ginakundenar sang ASJC-NPA ang pilit nga pagdala kang Jose Escamilla, taga Sitio Pulo, Barangay Masaling, pagkatapos sang engkwentro. Bisan pa man nga ginbuhian ini matapos pila ka oras, masami ginabuhat ini sa pasistang tropa agud may ara sila personahe nga mapasibangdan kag mapaupkan sa ila kaakig bangud sa kapaslawan sa ila operasyon militar, kag kalabanan mangin biktima pa ang pumuluyo sang mga pagpamahug, pilit nga pagpasurender, ukon tinanom nga pekeng ebidensya.
Natalupangdan man sa pumuluyo nga sako ang pagpalupad sang AFP sang ila mga helicopter halin sadtong bulan sang Abril tubtob subong, nga nagpakita sang buraghal nga paggamit sang pondo sang estado para sa militarisasyon samtang naga-antus ang pumuluyo sang mahal nga presyo sang balaklon kag tuman ka nubo nga sweldo kag presyo sa ila mga produkto.
Indi man kapatihan ang daw gubang plaka nga retoriko sang AFP nga halin sa pumuluyo ang ila datos, bangud nahibal-an na sa masang mangunguma kag mamumugon nga pipila lang ka individual ang ginagamit nga mangin aset militar. Amo man ini nga mga individual ang nahamulag sa ila mga silingon bangud sila ang nangin katimbang sa pasismo kag terorismo sang estado nga nakatuon sang pagpanglapak sa tawhanon nga kinamatarong sa kaumhan kag kasyudaran. Lehitimo man sila nga target sang rebolusyonaryong hustisya ilabi na sa may mga utang nga dugo kag dalagko nga kahalitan sa kahublagan kag pumuluyo.
Padayon nga mag-igrab ang rebolusyonaryong diwa sang NPA agud depensahan ang interes kag kinamatarung sang pumuluyo. Adlaw-adlaw may rason nga mubato, musuporta, kag muuyat sang armas ang masang mangunguma kag mamumugon nga malawig na nga ginpigos kag ginhimuslan sa sistemang ginkontrol lang sa mga nagahari nga sahi.
The post 2 ka tropa sang AFP, patay sa kontra opensiba sang NPA sa Cauayan; Mag-uuma gindakop pagkatapos appeared first on PRWC | Philippine Revolution Web Central.
From PRWC | Philippine Revolution Web Central via This RSS Feed.