Ang National Democratic Front-Central Visayas miduyog sa kusganong pagkondena sa Armed Forces of the Philippines, ilabina ang 79th Infantry Battalion, nga daw irong buang nga pagpamatay sa 19 ka tawo nga walay hinungdan. Lakip sa ilang pagpatay ang mga Pulang manggugubat sa New Peoples Army, ug mga sibilyan sa Barangay Salamanca, lungsod sa Toboso, Negros Occidental niadtong April 19.

Matud pa ni Marco L. Valbuena, ang Chief Imformation Officer sa Partido Komunista ng Pilipinas, 10 ka Pulang manggugubat sa New Peoples Army ang namatay ug 9 ka sibilyan ang namatay atol sa maong pagmasaker. Subay niini, among ipaabot ang taas komong pagsaludo sa 10 ka Pulang manggubat nga nag-ula sa dugo tungod sa pag-alagad sa katawhang linupigan. Nagsimpatiya usab kami sa mga minahal sa kinabuhi ug mga kauban sa mga nangamatay nga mga Pulang manggugubat. Bug-at tinuod para kanamo nawad-an kami og mga Pulang manggugubat nga gimahal pag-ayo sa masa. Gani, usa sa napulo nga namatay nga si Maria Clarita Branzuel Blanco (Ka Sanim/Pat), Politikal Instruktor, gikan sa Tabogon, Cebu, naghalad usab sa iyang kinabuhi.

Apan, isip mga rebolusyonaryong manggugubat, silang tanan walay pagduhaduha nga nag-alagad sa katawhang Pilipino, ilabina sa mga dinaugdaog ug gipahimuslan nga mga mag-uuma ug mamamu-o sa kaumahan sa Negros. Sa among pagmonitor sa maong panghitabo, nakita nga gimahal sila pag-ayo sa mga masa. Gipakita sa masa sa katawhan ang pagsukol sa pagpamig-ot sa militar sa ilang mga komunidad, mitambong ug naglinya sa taas nga komboy ang katawhan sa Toboso ug Calatrava aron dalhon ang ilang minahal nga mga Pulang manggugubat sa ilang katapusang pahulayan. Gipakita sa masa ang ilang lawom nga pagrespito ug pasalamat kanila.

Ang 10 nga Pulang manggugubat sa NPA adunay temporaryong kapildihan sa maong larangan, apan temporaryo lamang kini tungod kay nagpabiling tin-aw ug determinado kini nga moabante sa pagsubay sa rebolusyonaryong dalan paingon sa estratehikong kadaugan. Ang lig-on nga baruganan ug pagkamabayanihanon sa mga Pulang manggugubat niini ang makapadasig sa mga dinaugdaog nga masa nga mobangon ug mosukol pinaagi sa armadong rebolusyon. Ang dugo nga midagayday gikan sa mga napukan nga mga manggugubat atol sa ilang katapusang gubat maoy dugang makapalambo sa yuta alang sa gubat sa katawhan, diin moturok ang mas daghan pang Pulang manggugubat sa New Peoples Army.

Sa pikas bahin, amo usab gipaabot sa pamilya sa 9 ka sibilyan ang among taas kumong pagsaludo sa ilang kamatayon tungod lang sa pag-alagad sa kalihokang mag-uuma sa Negros ilabina sa kabatan-onan. Base sa mga inisyal nga impormasyon nga nadawat og Chief Information Officer sa PKP, gipatay sila bisan pa man dili sila mga armado o kun non-combatants. Lakip niini usa ka journalist, lider-estudyante, organisador sa mga mag-uuma, human rights worker gikan sa gawas sa nasod, ug mga lokal nga residente. Duha niining mga biktima mga bata.

Gihatag namo ang among taas kumong pasidungog sa mga biktima sa Toboso Massacre, lakip na ang mga Pulang manggugubat ug ang tanan nga walay pagduha-duhang naghalad sa ilang kusog, kahibalo, ug abilidad alang sa pag-alagad sa interes sa mga dinaug-daog ug gipahimuslan nga masa. Atong subayon ang dalan nga ilang gibaktas alang sa kaluwasan sa atong nasud.

Ang mga opisyal, tropa sa AFP ug si Marcos, Jr (isip Commander-in-chief), ang nangunang responsable sa tinuyo ug walay pili nga pagpatay. Kinahanglan silang manubag ug silotan sa ilang grabeng mga krimen ilawom sa International Humanitarian Law.

Adunay mga bidyo gikan sa kaugalingong drone camera sa AFP ang migawas usab sa social media diin nakita nga buhi si Ka Tapang ug wala sa posisyon nga makig-away. Nagpakita kini nga gituyo siya og patay sa mga pasista, imbes tratuhon isip prisoner of war. Susama kini sa nahitabo kang Compoc nga pulang manggugubat sa NPA sa Bohol diin nakuhaan og picture nga buhing gidakop ug wala na posisyon nga makig-away, apan migawas sa balita patay na. Nagpakita nga gituyong gipatay sa 47th Infantry Battalion niadtong tuig 2024.

Giawhag usab namo ang ubang mga elemento sa AFP nga adunay uban pang drone footages nga ipagawas kini ug mobarog aron ipadayag ang tinuod nga mga panghitabo kung giunsa paghimo kining ilang brutal nga krimen, ug batukan ang mga istoryang gipanghimo-himo sa ilang mga upisyal.

Desperadong naningkamot sa pagtabon sa ilang mga krimen ang AFP ug nagmugna og mga bakak aron suportahan ang mga pamahayag niini. Ang unang pag-angkon sa AFP nga pito ka armas ang nakuha gikan sa lugar sa engkwentro, gipasaka ngadto sa 20 ka mga armas (ug sa ulahi nahimong 24) aron ipakita nga armadong manggugubat ang tanan nga namatay.

Pugos nga gipabakwit ug gikordon sa AFP ang mga lokal nga residente aron magpahamtang og blackout sa impormasyon ug pugngan ang media ug mga independenteng mga grupo nga magpahigayon og mga interbyu ug epektibong imbestigasyon sa masaker. Paglabay sa mga adlaw, usa ka grupo nga gipaluyohan sa mga militar ang gitugotan sa paghimo og kaugalingon niining fact finding mission. Kini usa ka bakak nga gidesinyo aron makahimo og usa ka AFP-certified nga istorya na mouyon sa ilang pamahayag kabahin sa usa ka lehitimong operasyon.

Nag-antos ang lapad nga masa sa katawhang Pilipino sa nagkagrabeng porma sa panaugdaog ug pagpahimulos atubangan sa nagkalawom nga krisis ubos sa itoy ug pasistang rehimen ni Marcos. Gimandoan ni Marcos ang armadong mga itoy niini sa AFP ug NTF-ELCAC nga pakusgon ang ilang mga pag-atake sa katawhan ubos sa bakak nga kalinaw ug kalamboan. Susama sa iyang amahan nga diktador, gigamit ni Marcos Jr. ang mga taktika sa terorismo aron ipailawom ang mga tawo sa pulitikal nga pagpanumpo, ilabina sa kabanikanhan diin naghari ang balaod militar.

Desperado ang AFP ug ang rehimeng Marcos nga pulpugon ang rebolusyonaryong kalihokang ubos sa iyang termino, nagdamgo kining nagdeklara nga wala nay Guerilla Front subay sa iyang pamahayag niadtong SONA tuig 2025. Apan ang tinuod wala gyud molampos ang terorismo sa estado sa pagdugmok rebolusyonaryong kalihokan ug sa kaisog sa katawhan. Siguradong mapakyas ang mga atake sa rehimen ni Marcos sa pagpahunong sa katawhan nga mosukol. Gani, ang pasistang kabangis niini ang nagpahait sa determinasyon sa katawhan, diin dili na ikalimod ang pagkamatarunganon ug panginahanglan sa paglunsad og armadong rebolusyon.

Dili matarog ang determinasyon sa New Peoples Army sa Negros ug sa tibuok nasud nga ipatuman ang rebolusyonaryong hustisya sa tanang biktima sa masaker sa Toboso. Ang iwag sa gubat sa katawhan modilaab ug mokaylap sa tibuok nasud, samtang ang pangandoy sa katawhan alang sa nasudnong kagawasan ug tinuod nga demokrasya kusog nga nagdilaab sa ilang mga kasingkasing.

The post Mobangun ug mobarug ang katawhang sa Negros aron kab-uton ang rebolusyonaryong hustisya sa Toboso Masaker! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.