Lubos nga ginakilala sang Pambansang Katipunan ng Magbubukid (PKM-Negros) ang pagluntad sang rebolusyonaryong korte sang pumuluyo sa sinsero nga pagpatuman sang hustisya sa malapad nga pumuluyo ilabi na sa sahing mangunguma.

Nagaserbe ang rebolusyonaryong korte sang pumuluyo nga dalangpan kag salandigan sa pag-angkon sang husto nga hustisya para sa mga sahing imol kag ginahimuslan sang pumuluyo ilabi na sa kabukiran sa diin nangin biktima sila sang madata nga kriminalidad nga ginahimo sang Armed Forces of the Philippines (AFP), Philippine National Police (PNP) kag mga paramilitar sini kaangay sang pagpamatay, pagpangbomba, pagpamahug, patarasak nga pagpaniro, iligal nga pagdetine, pagpangawat, pagpanglugos ukon pagpanghimulos sang mga kababaenhan, kag iban pa. Lakip man ang pagpalapta kag pagbaligya sang iligal nga droga nga nakatuga sang halit sang pumuluyo ilabi na sa mga pamatan-on.

Ang pagpatuman sang rebolusyonaryong hustisya paagi sa New People’s Army (NPA) napamatud-an na sa malawig nga panahon kag nangin saksi ang pumuluyo sa pagkamatinud-anon kag pagkamatarungan sa proseso sini sa pag-alagad sa matuod nga interes sang pumuluyong kabos tungod nagahatag ini sang katawhay kag seguridad sang pagpangabuhi sa malapad nga katawhan pinaagi sa paghiliugyon sang malapad nga masa, NPA kag Partido Komunista sang Pilipinas.

Daku lamang ang kalainan kon itandi sa hustisya nga ginapaluntad sang reaksyunaryong gubyerno. Bisan ginasambit pa nila nga “ang katawhan nga kulang sa kabuhi ang dapat may pabor sa laye.”

Sa pagkamatuod, nagakaagnas na ang sistema sang hustisya sa pungsod Pilipinas tungod makita naton nga nakatalana lamang ang rehas para sa mga imol samtang ang mga manggaranon nga kriminal ilabi na ang mga kawatan kag berdugo nga nagapungko sa poder ang hilway nga nagapanglugayawon kag wala pa mapaatubang sa ila nga salabton.

Nagalala lamang ini tungod mismo ang rehimen US-Marcos II paagi sa tig-implementar sini nga naglakip sa PNP kag korte sang reaksyonaryong estado ang nangin protektor sang kriminalidad, sindikato kag tigmanupaktura sang mga patu-patu nga kaso nga nagalagas sang sahing mangunguma kag mga aktibista nga nagasulong lamang sang patas nga pangabuhi, disente nga trabahoeg kag makabuhi nga sweldo kag may benepisyo, libre nga edukasyon para sa mga kabataan kag matuod nga reporma sa duta.

Gani, magluwas sa padayon nga pagpukaw, pag-organisa kag pagmobilisa sa malapad nga pumuluyo, indi mag-untat ang Pambansang Katipunan ng Magbubukid (PKM)-Negros sa pagtib-ong sa pagserbe sang matuod nga hustisya nga madugay na nga ila ginahandom pinaagi lamang sa rebolusyonaryong korte sang pumuluyo.

The post Rebolusyonaryong korte lamang ang nagahatag sang tinuod nga hustisya appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.