Naglunsad ng kumperensya sa pulitika ang Kabataang Makabayan-Demokratiko a Tignayan iti Agtutubo ti Kordilyera (KM-DATAKO) sa pangunguna ng Balangay “Ka Trina” nitong Marso. Ang kumperensya ay bahagi ng selebrasyon ng grupo sa ika-57 anibersaryo ng Bagong Hukbong Bayan (BHB) noong Marso 29.

Sa ulat ng grupo, mahigit 80 myembro ng KM-DATAKO ang dumalo sa kumperensya na nagmula sa iba’t ibang mga balangay sa rehiyon. Ang KM-DATAKO ay ang rebolusynaryong organisasyon ng mga kabataan at estudyante sa rehiyong Cordillera. Bahagi ang grupo ng mas malapad na alyansang rebolusyonaryo na Cordillera People’s Democratic Front.

Sa kumperensya, pinag-aralang muli ng KM-DATAKO ang mahalagang dokumento na Ang Mga Partikular na Katangian ng Ating Digmang Bayan at ang espesyal na papel ng Northern Luzon sa paglulunsad ng matagalang digmang bayan ng mamamayang Pilipino. Tinalakay at kolektibo ring binasa sa pagtitipon ang pahayag ng Komite Sentral ng Partido Komunista ng Pilipinas (PKP) para sa ika-57 anibersaryo ng BHB.

Nagbahagi ang mga delegado ng kanilang mga palagay at repleksyon sa mga talakayan na parte ng tuloy-tuloy na kampanya sa mga kabataan para sa pagsampa sa hukbong bayan. Ipinaalala rin sa mga myembro ng grupo ang mahalagang papel ng materyal at direktang suporta ng mga kabataan para sa armadong pakikibaka sa lahat ng posibleng pamamaraan.

Nag-aral rin ng mga rebolusyunaryong awitin at nagtanghal ng programa, sa pangunguna ng inimbitahang mga myembro ng Artista at Manunulat ng Sambayanan. Nagsilbing pagkakataon ang kultural na aktibidad para parangalan ang mga rebolusyunaryong martir ng rebolusyonaryong kilusan.

“Patuloy ang pagpupursigi ng KM-DATAKO, kaisa ng lahat ng kabataang Pilipino, upang itanghal at pandayin ang bagong henerasyon ng mga rebolusyunaryong handang tumangan ng papalaking mga responsibilidad sa iba’t ibang larangan ng rebolusyunaryong gawain sa harap ng papatinding krisis sa bansa at imperyalistang gyera ng US,” pahayag ni Ka Kidawa Dayawen, tagapagsalita ng KM-DATAKO.

Sa nagdaang mga taon, walang humpay ang mga pagsisikap ng KM-DATAKO para palakasin ang sarili at makabuluhang makapag-ambag sa pagsusulong ng digmang bayan sa bansa. Noong 2019 at 2022, nakapaglunsad ng kongreso ang KM-DATAKO at nagsagawa ng napapanahong mga kumperensya sa pulitika.

Ayon kay Dayawen, bumubula na naman ang bibig ng mga pasista sa taunan nitong pangako na wawakasan ang BHB at ang armadong paglaban ng mamamayan sa kanayunan. “Hanggang ngayon, nananatiling hungkag at walang-laman ang mga pagbubulalalas nilang ito. Hindi kailanman magagapi ng pasistang teroristang estado ang paglaban ng mamamayan,” aniya.

Sa halip, higit umano itong natutulak na magpalakas laluna sa nakaraang ay lalo lamang hinuhubaran ng estado ang kanyang sarili bilang kasuklam-suklam na kaaway ng mamamayang Pilipino. Pagdidiin pa ni Dayawen, mailalarawan ang rehimeng US Marcos-Duterte bilang pinakamasahol, korap at tutang rehimen at mga terorista sa bansa.

Ayon pa kay Dayawen, nabubuhay ang diwa ng mga martir at bayani ng sambayanan sa bawat komunidad, pagawaan, sakahan at eskweluhan na kanilang buong-pusong pinaglingkuran. “Patuloy na yumayabong ang mga punlang naitanim nina Ka Mando, Ka Recca, Ka Elvira, Ka Sibat, Ka Ricky, Ka Sly, Ka Trina, Ka Riotoc, Ka Libre, Ka Changli at lahat ng mga rebolusyunaryong nag-alay ng kanilang buhay para sa ultimong pagwawakas sa dantaong pagpapahirap sa sambayanan ng imperyalismo, burukrata kapitalismo at pyudalismo,” dagdag niya.

Sa pagtatapos ng programa, buo at matibay ang paninindigan ng KM-DATAKO na lalo pang magpalakas, magpalawak at hawanin ang daan para sa pagdami ng mga kabataang tatahakn ang landas ng pakikipagkapit-bisig sa masang anakpawis sa kanayunan sa pagsapi sa BHB.

“Nakatitiyak ang mamamayan ng Kordilyera at ng bansa na buo ang determinasyon ng KM-DATAKO, sa gabay ng kilusang pagwawasto ng PKP, upang mangahas na tahakin ang landas ng pagsulong,” pagtatapos ni Dayawen.

The post Rehiyunal na kumperensya sa pulitika, inilunsad ng KM-DATAKO appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.