Mahugot nga ginkukundenar han mga rebolusyunaryo nga pwersa ha Eastern Visayas an presensya han mga tropa militar han US ha Tacloban para ha tiarabot nga Balikatan war exercises. Kaparte ini han panalinguha han imperyalismo nga US ngan han papet hini nga rehimen Marcos Jr nga ig-establisar an Pilipinas komo lansaran han gerra ha Asya-Pasipiko.

Ha gab-i han Marso 27, ginreport han lokal nga midya nga usa nga C-17 aircraft han US Air Force an hinugdon ha Daniel Z. Romualdez airport ha Tacloban, dara an mga tropa nga Amerikano nga mapartisipar ha pinakadako nga edisyon han tinuig nga US-PH war exercises. Pira nga mga aktibidad an ginreport nga hihimuon ha syudad.

An tiarabot nga Balikatan nakasubay ha natikapintas nga paningkamot han US nga limitaran an mga imperyalista nga karibal ngan puypuyon an mga nasud nga nag-iinsister han ira katungod ha pagdesisyon ha kalugaringon. Labot ha pag-atentar nga manulsol han pagliwan han rehimen ha Iran, nga maiha na nga naato ha pan-gigipit han imperyalismo nga US, gintumuyo liwat han US-Zionista nga Israel nga gerra ha Iran nga igsabotahe an mga pagdara han lana tikang ha nasud ngadto ha usa ha mga mayor nga parupamalit hini, an China.

Ginkukundenar namon an traydor nga hi Ferdinand Marcos Jr ha panginyupo ha interes han imperyalismo nga US nga ig-establisar an pankalibutan nga hegemoniya. An US ilarum han lurong nga presidente nga hi Donald Trump dugang nga ginkakangalsan yana han kalugaringon nga katawhan, nga ginpakita han dagko nga mga No Kings nga protesta kakulop, ngan gin-abandona pa han mga alyado hini ha paglansar han gerra kontra ha Iran. Kundi an Pilipinas ilarum ni Marcos padayon nga ginkakarawat an mga tropa, armas, ngan war exercises han US. Pakyas hiya nga tanggalon an kabaraka han mga Pilipino nga madanas ha usa nga gerra nga magdudurot han pinakagrabe nga destroso ngan pag-inantos ha mga ordinaryo nga masa.

Pungkay han kawaray kasingkasing nga padayon nga nagmamalgastar an rehimen han limitado nga pampubliko nga pondo agud panginanuon an presenya han militar han US ha teritoryo han Pilipinas. An ira war exercises gin-iistorbo an panginabuhi ngan ginbubutang ha peligro an kinabuhi han mga parag-uma ngan parupangisda, ngan doble nga naghihimakuri tungod ha krisis ha lana nga ginpabuto han gerra nga agresyon han US ha Iran.

Mahugot namon nga ginsasalikway an buwa nga ginyayawyaw han US ngan rehimen Marcos nga an war exercises nagseserbe ha mga katuyuanan nga “makatawo nga bulig ngan pagresponde ha kalamidad.” Maiha na ini nga pasangilan han imperyalismo nga US ngan hin-o man nga nakalingkod nga papet nga rehimen agud tagan-rason ngan pahiaraon an katawhan ha presensya militar han US. Ini na an ira modus operandi ha mga erya nga bulnerable ha kalamidad sugad han Eastern Visayas, tikang pa hadton naigo an rehiyon han super typhoon Yolanda/Haiyan in 2014. Antes pa an Balikatan, an mga tropa han US ngan personel han Philippine Army ilarum han Joint Task Force Tacloban naghimo na han “misyon” ha syudad hadton Nobyembre 29 tubtub Disyembre 4, 2025 komo pangandam ha Pacific Partnership 2026. An “prinsipal nga misyon” iglalansar naman ha Mayo 15 ngadto Hunyo 15, 2026.

Waray makatawo ha paglansar han marahalon nga war exercises ha butnga han usa nga krisis ha lana. An C-17 aircraft nga nagdara han mga tropa nga Amerikano ha Tacloban airport agsub ngaranan komo usa ha pinakadagko nga nakonsumo han sungo (fuel) han US Department of Defense. An usa la nga puno nga tangke han C-17 aircraft poyde magbalor hin $136,633 nga balor han jet fuel (ha presente nga balor nga $204.95/barrel ha Asia/Oceania) nga katugbang hin ₱8,273,714. Ini nga kwarta poyde makapalit hin 5,910 sako han bugas (₱1,400 tag-usa) o baydan an ₱5,000 nga subsidyo han 1,645 nga drayber han pampubliko nga dyip. Ngani, ngatanan nga 500 nga war exercises nga hihimuon han Pilipinas ngan US yana nga tuig butaray nga pagtalapas ha soberaniya han Pilipinas.

Kinahanglan kundenaron han katawhan han Eastern Visayas an Balikatan war exercises. Kinahanglan nira himuon an ngatanan nga porma han protesta kontra ha natikagrabe nga panmilitar nga panginginlabot han US ha Pilipinas ngan an agresyon hini ha magkalain-lain nga parte han kalibutan. Kinahanglan nira ipanawagan an pagpapabasura ha ngatanan nga diri pantay nga panmilitar nga kasarabutan, kalakip and EDCA, VFA, ngan MDT, ngan ig-insister an usa nga tinuod nga naglulugaring nga palisiya nga pan-gawas. Diri kinahanglan manginyupi han Pilipinas ha imperyalismo nga US agud mahiinsister an katungod hini ha mga gin-aagawan nga teritoryo o agud pauswagon an kalugaringon nga ekonomiya. Lugod, poyde hini igpatuman an tinuod nga reporma nga agraryo ngan nasyunal nga industriyalisasyon ngan tumindog ha kalugaringon nga tiil.

Nananawagan kami ha ngatanan nga yunit ha Bagong Hukbong Bayan ha Eastern Visayas nga maglansar han mga taktikal nga opensiba ha tiarabot nga mga adlaw ngan ha panahon han Balikatan war exercises agud igpakita an kangalas han katawhan ha presensya han militar han US. Napapanahon an sugad nga tinuod nga akto han patriyotismo labina nga ginsasalin-urog liwat han mga rebolusyunaryo nga pwersa an ika-57 nga anibersaryo han BHB, an usa ha tulo nga gamhanan nga hinganiban han katawhan Pilipino para kab-uton an tinuod nga katalwasan ngan demokrasya. An armado nga pakig-away han katawhan Pilipino usa nga pamaagi agud pugngan an pagbuto han inter-imperyalista nga gerra ngan an amot han Pilipinas ha pankalibutan nga pakigbisog kontra ha terorista nga makinarya ha gerra han US.

The post Kundenahon an militar nga presensya han US ha Tacloban para ha pinakadako nga Balikatan! Igsalikway an ngatanan nga US-PH nga war exercises! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.