Ginhatag sang Armando Sumayang Jr Command-New People’s Army (ASJC-NPA) upod sa kabilugan nga rebolusyonaryong pwersa sa larangan gerilya sa Southwest Negros ang pinakamabaskog nga Pulang saludo kay Ritchell ‘Ka Makoy/Venom’ Verano, Milky ‘Ka Gorting/Dores’ Sampini, kag Joedil ‘Ka Junjun/Cairo’ sa ila maisog nga pag-atubang sa kaaway sa sahi tubtob sa katapusan nila nga ginhawa. Nautas ang ila kabuhi matapos ang engkwentro sa tunga sang pasistang 47th IB sa Sityo Santol, Barangay Tampalon, Kabankalan City, Negros Occidental kagahapon, Marso 21.

‎Ka Makoy

‎Si Ritchell ‘Ka Makoy/Venom’ Verano, 26 anyos, naghalin sa sahing malaproletaryado sa Carcar, Cebu. Nagsalhin kag nag-eskwela si Ka Makoy sa Barangay Trinidad, Guihulngan City, Negros Oriental kag didto nakapatapo sa Kabataang Makabayan sadtong 2015. Tuig 2017, nag-intra na siya sa Pulang hukbo sa Central Negros hasta nga nadeploy sa Southwest Negros sadtong 2025.

Katapuan man si Ka Makoy sa Komite sang Larangan halin sadtong 2023 kag nagsirbe nga vice platoon leader kag nakaagi man bilang deputy political instructor.
‎
‎Kilala si Ka Makoy nga wala nagabalibad sa trabahuon kag masupog nga nagaduso sini sa bisan san-o nga oras. Bangud sa baskog nga impluwensya man sa lumpenproletaryado, maayo sa mga pamaagi kag diskarte si Ka Venom para matigayon ang mga trabaho sa pulitika kag militar, sa iya paninguha nga kanunay yara dapat sa opensibang postura. Bangud man sa iya kinaiya nga palakadlaw kag palapropaganda, madasig siya nga napalapit sa mga kaupod kag masa.

Mapagsik siya sa mga tahas kag muklat nga bisan pamatan-on, dapat handa siya kag bukas sa mga bag-o nga tahas kag responsibilidad bilang kadre sang Partido Komunista sang Pilipinas kag Pulang kumander.

‎Ka Gorting

Halin sa sahing mangunguma si Milky ‘Ka Gorting/Dores’ Sampini, 29 anyos, nga nabun-ag sa Barangay Lamugong, Manjuyod, Negros Oriental. Nangin Pulang hangaway siya sadtong 2016 kag naghulag sa South Central Negros, hasta nga nadeploy sa Southwest Negros. Katapuan sa Komiteng Tigpatuman sa Party Branch (KTPB) si Ka Gorting kag nag-akto bilang Finance and Logistics Officer (FLO), kag squad leader.
‎
‎Sa isa ka dekada sulod sa NPA, napamatud-an ni Ka Gorting ang iya kaugalingon nga handa mag-atubang sa bisan ano nga sakripisyo kag kabudlayan. Maayo magpropaganda kag suod man siya sa masa kag kaupod bangud kay palakadlaw kag pursigido nga magbulig sa mga problema sa iban. Hanas man si Ka Gorting sa trabahong counter-intelligence.

‎Ka Cairo

Si Joedil ‘Ka Junjun/Ka Cairo’, 21 anyos, naghalin sa sahing mangunguma sa Sityo Tigbao, Barangay Buenavista, Himamaylan City, Negros Occidental. Narekrut siya sa Kabataang Makabayan (KM) sadtong 2020 kag pormal nga nagsulod sa NPA sadtong 2023, kag naghulag sa South Central Negros antes man nadeploy sa Southwest Negros.
‎
‎Malapit si Ka Cairo sa mga kaupod kag masa ilabi na sa mga pamatan-on, kag iya ginahangkat nga mag-intra gid sa NPA agud magserbisyo sa pumuluyo.

Bilang katapuan sa KTPB, nagserbi man siya nga vice squad leader kag pulupanahon nga giya pampulitika sa yunit. Bisan sa iya kalamharon, nagapaningkamot si Ka Cairo nga maka-amot kag mangin madinalag-on ang mga politikal kag militar nga mga tahas.
‎
‎Sa pihak sang kasubo nga nabatyagan sang mga rebolusyonaryong pwersa, makita nga mga pamatuod si Ka Makoy, Ka Gorting, kag Ka Cairo nga indi mawasak ang NPA bangud handa ang pamatan-on kag masunod nga mga henerasyon nga magsakdag sang mga responsibilidad kag hangkat sa panahon. Gani, himuon dapat sila nga inspirasyon nga ang paghalad sa kabuhi sa rebolusyon indi kalahadlokan kag sa baylo amo ang pinakahusto nga banas nga pilion agud desaysibo nga wasakon ang paghari sa nagharing sahi nga nanghimulos kag namigos.
‎
‎Optimistiko ang ASJC-NPA nga may mabulos kag mas madamo pa nga pamatan-on ang masabat sa panawagan nga mag-uyat sang armas kag mag-intra sa NPA, ilabi na sa nagalala nga krisis sa garok nga sistemang ginatiglawas sa US-Marcos II nga rehimen.

Magapadayon ang rebolusyonaryong kahublagan nga manukot sang hustisya sa mga biktima sang pasismo kag terorismo sang estado, nga amo man ang rason nga magdugang nga magdugang ang pwersa sa armadong paghimakas.

The post Pulang saludo sa aton mga rebolusyonaryong martir sa Kabankalan! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.