Wala sang lehitimo nga engkwentro sa tunga sang Leonardo Panaligan Command-New People’s Army New People’s Army (LPC-NPA) kag pasistang tropa sang 62nd IB sa Barangay Trinidad, Guihulngan City, Negros Oriental sadtong Marso 17, alas 7:00 sang aga. Taliwas sa kabutigan sang 62nd IB, ang kamatuoran, samtang nagapangumpay para sa baka sa amo nga lugar si Edgar Tingting, isa ka mangunguma, masobra 50 ang pag-edaron, may asawa kag kabataan sang Sityo Ngalan, Barangay Sandayao, sa nasambit nga syudad, wala kaluoy nga gin-istraping sang mga berdugong 62nd IB. Buhi apang pilason sang nakadalagan si Tingting sa patarasak nga pagpaniro sang uhaw sa dugo nga tropa militar. Nahubsan sang dugo si Tingting kabangdanan sang iya kamatayon.

Indi armado si Tingting kag indi man matuod nga nakumpiskar sang militar ang KG-9 sub machine gun. Labaw sa tanan, indi man katapo sang NPA si Tingting.

Si Tingting, humalin tuig 2012, ginapasibangdan na sang AFP nga katapo sang NPA. Naka-angkon na siya sang indi na maisip nga pagpamahug nga kasuhan ukon patyon sang tropa militar. Tuig 2017, ginredtag kag wala na ginlu-atan sang militar sa pagpangita para pasurenderon.

Tuyo lang sang 62nd IB nga hinabunan ang ila lapnagon nga pagpanglapas sang tawhanon nga kinamatarung batok sa mga mangunguma sa kaumhan sang Central Negros. Bangud palpak ang “whole of Nation approach” nga kampanya sang anay rehimeng US-Duterte kag subong nga rehimeng US-Marcos II paagi sa Armed Forces of the Philippines (AFP), Philippine National Police (PNP) kag NTF-Elcac nga dugmukon kag wasakon ang matuod nga hangaway sang banwa nga New People’s Army (NPA) nga absoluto ginapamunuan sang Communist Party of the Philippines (CPP).

Sa baylo, desperado nga ginahingabot kag ginapanglagas sang militar ang mga inosenteng sibilyan kag mga pumuluyo sa Central Negros.

Lubos gid ginakondenar sang NPA ang malaba na nga listahan sang 62nd IB sa pagbayolar sang tawhanon nga kinamatarung sa prenteng gerilya. Mabaskog man nga ginakondenar ang wala kaluoy nga paghingabot tubtob pagpatay kay Edgar Tingting.

Ginamanduan ang tanan nga yunit sang NPA idalum sa LPC-NPA nga maglunsar sang lapnagon kag madinalag-on nga taktikal nga opensiba nga nagahatag sang katarungan kag hustisya sa mga biktima.

The post Peke nga engkwentro sa Guihulngan City, ginpalapnag sang 62nd IB appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.