Wala pa nakabangon ang linibo-libo nga pumuluyo sa Central Negros nga nadislokar sa ila puluy-an, kabuhi kag pangabuhian sa gintuga nga halit sang Bagyo Tino. Karun lang nga tuig 2026, halos tatlo na ka beses nga paglupok sang bulkan Kanlaon nga liwat naman nga nagdislokar sa pangabuhian sang mga mangunguma sa kaumahan sa mga banwa sang La Castellana, Moises Padilla, syudad sang La Carlota; tanan sang Negros Occidental kag Canlaon City, Negros Oriental kag iban pa nga kasikbit nga mga banwa kag syudad.

Dugang pa, ang liwat naman nga pagsaka sang implasyon resulta sang pagsirit sa presyo sang gatong nga naglab-ot sa P10-P16 pesos kada litro tuga sang indi makataruganon nga gyera nga ginalunsar sang imperyalistang Estado Unidos kag Israel batok sa pungsod Iran nga nag-eskalar sang maduguon nga inaway sa Middle East.

Pabilin nga inutil kag lunsay pamulitika ang panerbisyo sang rehimeng US-Marcos sa pumuluyong Pilipino. Ini nagatagos man sa gobyerno lokal sa isla tubtob sa halintang sang local government units (LGU) ang “band-aid solution.”

Imbes nga mabatunon sang pumuluyo ang nagakaigo nga subsidyo halin sa gobyerno sa tunga sang krisis kag mga kahalitan, militarisasyon ang maathag nga sabat sang estado paagi sa idu-buang nga Armed Forces of the Philippines (AFP), NTF-Elcac kag paramilitar.

Humalin Marso 6 tubtob subong, ginlusob sang halos 300-400 nga kumbinadong pwersa sang 62nd IB, 94th IB kag 47th IB ang mga boundary sang La Castellana kag Moises Padilla subongman ang mga syudad sang Canlaon kag Guihulngan sa Negros Oriental. Nagtuga ini sang madata nga paglapas sa tawhanon nga kinamatarung sang pumuluyo sa Central Negros kag nagdala sang kakugmat sa mga kabataan, kababaihan kag inosenteng sibilyan.

Ginapangsaka-saka sang militar ang mga kabalayan sang mga mangunguma. Nagatiner man sila sa mga eskwelahan, simbahan kag iban pa nga pangpublikong lugar para himuon “human shields” ang pumuluyo batok sa ila pangontra.

Ginaperwisyo ang mga sibilyan sa asud-asod nga pagpatawag para imbestigahon, pahugon kag iban pa nga tipo sang mental nga pagturtyor agud pasugiron sang presensya sang NPA sa lugar.

Marso 10 sang aga, pilit nga ginsaka ang balay ni Estein Superalis, may asawa kag mga kabataan sang Sityo Tiguisan, Barangay Montilla sakop sa Moises Padilla. Pilit man siya nga gindala sang militar sa Barangay Biak na Bato AFP Patrol Base. Gin-interogar kag pilit nga ginpaako nga suporter sang NPA. Marso 12, alas 8:00 sang aga, liwat naman siya nga ginpahug sang militar nga patyon kag palutawon sa suba sang Binalbagan. Bangud sa kakulba, naghilibion ang biktima upod sa iya pamilya.

Sa amo gihapon nga lugar, Marso 14, pilit man nga ginpatawag si Edgar Antonio, may asawa kag kabataan subongman aktibo nga katapo sang BPAT sa Moises Padilla. Gin-interogar sang militar ang biktima kaangot sa presenya sang NPA sa lugar. Pilit man siya nga ginpaako nga suporter sang NPA.

Sa mga Sityo sang Haroy, Tiguisan tanan sang Barangay Montilla, Moises Padilla, wala untat nga ginapangsaka-saka ang mga kabalayan kag ginapangkumpiskar ang pribado nga cellphone sang mga pamatan-on kag bug-os nga pamilya. Halos indi na makatulog ang pumuluyo bangud tungang gab-i ginapukaw sila sang mga militar.

Kasubong man sini ang nagakalatabo sa mga pumuluyo sa mga sityo sang Tikoy-tikoy, Ubay, Mambangon kag Cambugnay tanan sang Barangay Cabacungan, La Castellana. Sa Barangay Puso, sa amo nga banwa, nagatiner ang militar sa plasa publika sang nasambit nga baryo kag nagalunsar sang tsekpoynt sa dalanon. Nagpapanaug man sila sang “curfew” sa baryo para punggan ang pumuluyo sa paglagaw kun gab-i. Ini ang wala ang wala nag-agi sa proseso sa proseso sang lokal nga gobyerno sa baryo.

Ang eskwelahan sang Sityo Haroy, Moises Padilla kag Sityo Mambangon, Barangay Cabacungan ang ginhimo nga kampo militar.

Ini ang maathag kag muklat nga kalapasan sang AFP sa pagsunod sa pagsulundan sa gyera kag Comprehensive Agreement on Respect for Human Right’s and International Humanitarian Law (CARHRIHL).

Lubos gid nga ginakondenar sang LPC-NPA ang kalakasan ala-Martial Law nga ginahimo sang nasambit nga mga pasistang tropa.

Ginapanawagan man sang LPC-NPA ang mga pumuluyo nga mag-organisa sang ila kaugalingon nga kusog. Magmangin maisog kag ibuyagyag ang pasismo sang militar sa ila lugar.

Ginamanduan man ang tanan nga yunit sang NPA, milisya sang banwa kag iban pa nga yunit gerilya nga maglunsar sang taktikal nga opensiba para ihatag ang nagakaigo nga hustisya sa malapad nga masa kag mga biktima sang pasismo sang estado. Paisa-isa nga silotan ang mga traidor sa masa kag rebolusyon ilabe na ang may mga utang nga dugo sa pumuluyo.

The post Naga-igting nga krisis nga gina-atubang sang pumuluyo sa Central Negros, militarisasyon ang sabat sang reaksyonaryong estado appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.