Sa ngalan ng pagkakamit ng “kapayapaan” pinaiigting ng rehimeng US-Marcos II ang kontra-rebolusyonaryong gera sa bansa. Sa ilusyong isa na lamang ang larangang gerilya na saklaw ng NPA at diumano’y nasa rehiyong Bicol, itinakda ito ng rehimeng US-Marcos II bilang national priority sa kampanyang pangwawasak sa rebolusyonaryong kilusan.

Nagdudulot ang kampanyang supresyon ni Marcos Jr ng pinakamasasahol na paglabag sa karapatang tao sa paglarga ng mga operasyong militar sa mga kanayunan at kahit sa mga sentrong bayan. Sa tabing ng pagsupil sa NPA, mga sibilyang Bikolano ang binubuliglig at tunay na pineperwisyo ng AFP-PNP sa Camarines Sur at Camarines Norte sa malawakang pagpapasuko. Laganap rin ang pananakot, harassment, psywar sa Masbate, Sorsogon at Albay.

Tampok ang napakaruming taktika ng pasistang AFP sa Masbate na naging pokus ng pag-atake ng pasistang 9th ID sa nagdaang halos walong taon. Walang patawad ang mga militar hanggang sa mga kaanak ng pinaghihinalaan nilang myembro ng NPA na isinasailalim nila sa pagmamanman. Iligal na hinahalughog ang mga bahay ng mga sibilyan gamit ang tanim na mga ebidensya. Mula rito, dumarami ang kaso ng iligal na pagdakip at pagsampa ng gawa-gawang kaso sa mga kamag-anak ng mga NPA.

Bago pa ito, naging tutok na rin ang rehiyon ng matinding pananalasa ng rehimeng US-Duterte. Sa tala ng Ang Bayan, pumapangalawa ang Bicol sa Negros sa may pinakamalaking bilang ng mga pinaslang na aktibo at retiradong myembro ng NPA (16 sa 101). Lahat ng mga ito ay tahasang mga paglabag sa umiiral na internasyunal na batas at panuntunan sa digma.

Sa kalunsuran, dinedemonisa ang imahe ng NPA sa pagkakalat ng mga pekeng impormasyon at itim na propaganda tulad ng pagkakalat ng malisyosong bomb threat sa eskwelahan ng Mercedes sa Camarines Norte kapalit ng pangingikil umano ng NPA. Nagdulot ito ng takot sa mamamayan at pagsuspinde ng mga klase. Malinaw na gawi ito ng reaksyunaryong kaaway para sabihing “terorista” ang NPA kahit sa totoo’y sila ang naghahasik ng teror sa iba’t ibang dako ng bansa.

Hindi nalalayo ang karanasan ng rehiyong Bicol sa dinaranas ng mamamayan ng rehiyong TK na hinahambalos ng kaliwa’t kanang terorismo ng estado. Dumadaan din ngayon sa proseso ng pag-aampat ng mga pinsala at pagpapanibagong-lakas ang TK at buong rebolusyonaryong kilusan sa tanglaw ng kilusang pagwawasto at sa ilalim ng pamumuno ng Partido.

Nagpupugay at nakikiisa ang Melito Glor Command-New People’s Army Southern Tagalog sa nagpupunyaging kilusang rebolusyonaryo sa rehiyong Bicol at di nagmamaliw na suporta ng mamamayan nito sa demokratikong rebolusyong bayan. Ang ipinamamalas ng mamamayan ng Bicol na katatagan sa pagbigo sa imbing pakana ng reaksyunaryong estado ay dapat na suportahan sa pamamagitan ng pagpapalakas ng mga panawagan sa pagpapalayas ng mga militar na salot sa kanayunan. Hindi kailanman mabubura sa kasaysayan ang maningning na rekord ng rebolusyonaryong mamamayang Bikolano sa paglahok sa armadong rebolusyon na nag-aambag ng kanilang pwersa sa iba’t ibang panig ng bansa laluna sa rehiyong TK na kanugnog nito.

Dapat lumahok ang pinakamaraming mabubuting anak ng bayan ng Bicol sa New People’s Army at ipagtanggol ang karapatan sa buhay, lupa, kapayapaan at kalayaan ng mamamayan ng Bicol. Ngayon ang panahon upang wakasan ang pasistang paghahari ng berdugong militar. Dapat itanghal ang kagitingan ng masang anakpawis sa paglaban sa pasismo at kahirapang dulot ng rehimeng US-Marcos II laluna sa pag-igting ng krisis sa yugtong ito ng paglala panlipunang ligalig sa pandaigdigang saklaw.

Dapat ipamalas ang makasaysayan na malawakang paglahok sa digmang bayan ng mamamayang Bikolano at lahat ng mamamayang Pilipino. Gawin nating inspirasyon ang dakilang pag-aalay ng buhay ng mga rebolusyonaryong martir na walang pag-iimbot na inialay ang kanilang buhay upang sumulong at magpatuloy ang ating dakilang layuning dalhin sa tugatog ng tagumpay ang demokratikong rebolusyong bayan. Papag-alabin ang ating rebolusyonaryong diwa hanggang sa matupok ang pasismo at karahasang hatid ng pasista at reaksyunaryong estado.

The post Suportahan at makiisa sa pakikibaka ng mamamayang Bikolano laban sa pasismo appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.