Lubos nga ginpanginwala sang Romeo Nanta Command – New People’s Army (NPA), ang natabo nga pagsunog sa kampo nga ginpanag-iyahan ni Wilfred D. Anglo.

Suno sa balita, natabo ini sang alas-4:30 sang hapon sa Purok 5, Hacienda Jose Valing, Barangay Libacao, Himamaylan City, Negros Occidental. Nagtuga ini sang halit sang halos isa ka ektarya lang sa iya 120 ka ektarya nga katubuhan.

Dako nga posibilidad nga kahimuan ini sa mga manugsabotahi sa tunga sang isyu sa ginpahamtang nga sanction. Ginaklaro sang NPA nga wala sini ginakabig nga polisiya ang pagsunog sang kampo sa mga hacienderos nga may sala ukon salabton sang pumuluyo kag rebolusyonaryong kahublagan. Bangud, makatuga ini sang malaparan nga halit nga indi makontrolorar nga posibleng maglapta sa mga katambi nga kampo kag mga kabalayan ilabina sa subong nga panahon sang tig-ilinit.

Matapos ang sanction nga ginpakanaog sang RNC-NPA kay Anglo bangud sang indi maayo nga kondisyon sa pagpamugon, partikular na ang manubo nga suhulan kag 10% nga interes sa usura kada semana pinaagi sang iya kabo, nagahatag man sang nagakaigo nga panahon ang rebolusyonaryong grupo agud makarekober ini kag ihatag sini ang demanda sang mga obreros, indi lang sa mga regular nga obreros sini kundi lakip na ang mga naga obra sa iya paagi sang pakyaw nga sistema.

Ginpangabay sang RNC-NPA nga mangin mabinantayon ang mga pulumuyo, planters, kag mga negosyante sa posibleng pagsakay sang Armed Forces of the Philippines (AFP) kag mga makinarya sini sa ini nga hitabo para makapatigayon sang ila extortion activities sa ngalan sang NPA. Madamo na sang kaso nga nalab-ot sa yunit kaangot sa mga pagpakunokuno sang AFP, PNP, NTF-Elcac kag mga ‘surrenderees’.

The post Sunog sa katubuhan ni Anglo, wala sang kahilabtanan ang RNC-NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.