Si Emaren Pastidio ukon Kaupod Jandy para sa mga kaupod kag masa nga iya nga gin alagaran, ang isa ka iloy, babaye nga organisador, Pulang hangaway kag rebolusyonaryo nga matutom nga naghimakas para sa paghilway sang mga kababaenhan kag bug-os nga pumuluyo. Ini ang sa tunga sang padayon nga pagluntad sang macho-pyudal nga sistema nga makita sa lain-lain nga porma sang pagpang-abuso sang nagahari nga sahi.

Gin-atubang ni Ka Jandy ang grabeng pagpang-abuso sa kamot sang pasistang militar nga 79th IB. Sadtong 2018, gindakop siya kag isa pa ka organisador sa hilikuton kultural sa Escalante City, Negros Occidental kag gindala siya sa headquarters sang militar kag didto gintortyur.

Nadakop siya liwat sadtong 2021, panahon nga siya bag-o pa tapos panganak kag naka-medical leave. Napulo ka adlaw siya nga gintortyur kag makapila ka beses nga ginlugos sang mga militar.

Samtang ang iya anak nga si Baby Marx Cairo Salino ang gin- uyatan sang NTF-Elcac kag ginhimo nga hostage para mapasungka si Ka Jandy kag iya nga bana.

Sa pihak sang mapit-os nga inagihan niya bilang rebolusyonaryo, wala paglubad kag bug-os ang iya panindugan nga alagaran ang masang mangunguma tubtob sa iya nga pagkamartir sadtong Pebrero 21, 2024.

Ang pagtukod sang Kabataang Makabayan (KM)-Northern Negros sa iya pangalan ang simbolo sa mataas nga pagkilala sang mga pamatan-on sa Norte sa iya kabuhi kag paghimakas. Tamparos ini sa pasulit-sulit nga paggamit sang 79th IB sa iya pagkamartir bilang panghambog sa ila kuno naangkon nga”kadalag-an”.

Ang mga bag-ong henerasyon sang rebolusyonaryong kabataan ang magapadayon sang iya nasugdan. Magpursige ang mga pamatan-on nga dal-on pa ang inaway banwa sa mas mataas pa nga halintang, kag tubtob sa kadalag-an.

Mabuhay ang rebolusyonaryong kababainhan!

The post Pagtukod sa Kabataang Makabayan Northern Negros- Sangay Emaren Pastidio appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.