Nakikig-usa an ngatanan nga tsapter han Makabayang Kilusan ng Bagong Kababaihan (MAKIBAKA) ha Eastern Visayas ha paghandum yana nga adlaw han Pankalibutan nga Adlaw han Kababayin-an nga Anakbalhas. Madig-on gihapon an panindugan han rebolusyunaryo nga kababayin-an ha rehiyon nga pinaagi la han demokratiko nga rebolusyon han katawhan mahahawan an dalan ngadto ha pagpara han diskriminasyon basar ha tawoa ngan pagkatawo.

Ha dugang nga pagkadunot han katilingban ha balitang han imperyalismo, mas natikaklaro kun tiunan-o nga an pananalumpigos ngan paniniyupi ha kababayin-an magagamot ha sumpakiay han mga klase. Ha mga nasud nga neokolonyal sugad han Pilipinas, kontrolado han pipira nga naghahadi nga klase an kaayusan nga pan-ekonomiya, pulitika ngan kultura—kalakip an pyudal ngan burges nga pananan-aw ha kababayin-an—agud igpabilin ngan pahiluagon pa an ira paghakin han karikuhan.

Ha Eastern Visayas, 2.27 kamilyon o 49% han populasyon kababayin-an. Kadam-an ha ira sobra nga nagkukuri, labina an mga trabahador ngan parag-uma. Hira an pinakagintitiyupi ilarum han sistema nga bagakolonyal ngan bagapyudal.

Ha kada napulo nga parag-uma nga mayda kalugaringon nga tuna, tulo la ha ira an babaye. Pinakaguti an kababayin-an nga mayda kalugaringon nga tuna ha Northern Samar ngan Western Samar, nga kalakip ha pinakakablas nga prubinsya ha nasud. Tungod kay waray kalugaringon nga tuna, napipiritan hira magin saop o magtrabaho komo trabahador ha uma. Mas nagigin bulnerable hira ha pyudal ngan bagapyudal nga paniniyupi sugad han hitaas nga pleta ha tuna, hitaas nga usura, ngan himubo nga suhol. Mas grabe pa an paniniyupi ha kababayin-an nga parupangisda, diin usa nga babaye la ha kada 25 nga lalaki an mayda kalugaringon nga higamit ha pangisda.

Himubo naman an partisipasyon ha pagtrabaho han kababayin-an nga trabahador. Hadton 2020, samtang mayda 1.08 kamilyon nga trabahador nga lalaki, aada la ha 465,477 an babaye. Kadam-an hini ha sektor han serbisyo ngan pagbaligya, ngan ha mga “elementary occupation” sugad han pagin parupanlimpyo, labandera, parupaninda ha kalsada ngan trabahador ha uma. Mga trabaho ito na mababa ang kinakailangang kasanayan, mababa magpasahod, at hindi permanente.

An kakulang ngan himubo nga kalidad han empleyo han kababayin-an ginpagrabe han limitado nira nga oportunidad ha edukasyon. Naeespiho ini ha 87.3% nga literacy rate han kababayin-an ha Eastern Visayas, pinakahimubo ha ngatanan nga rehiyon ha nasud. Ikaunom an rehiyon ha mayda pinakahitaas nga ihap han kababayin-an diri nakakagbasa.

Diri urusahon nga ludlod ha kakurian an kababayin-an. Gintatantiya nga aada ha 664,000 nga babaye ha rehiyon an kablas, nga katugbang han 27.9% nga tantos han kakablasan. Hira liwat an ginlalauman nga sumuporta ha 713,000 nga kabataan nga kablas, ikaupat nga pinakadamo ha tanan nga rehiyon.

Diri na mahunahunaan han kababayin-an kun tiunan-o pa nira papasadangon an himubo kaupay nga kita ha atubangan han dagmit nga natikahitaas nga presyo han papliton. Hadin Enero, haros nagdoble an tantos han implasyon ha Eastern Visayas ngadto ha 2.5% tikang 1.4% hadton Disyembre 2025. Samtang, ha Hunyo pa mahiaaguman han mga trabahador ha pribado nga sektor an ura-ura kaguti nga ₱35 nga umento ha suhol. Bisan kun mahipatuman na ini, maabot la ha ₱470 an inadlaw nga suhol ha rehiyon.

An sobra-sobra nga pananalumpigos ngan paniniyupi ha masa nga anakbalhas, labina ha kababayin-an, nagduduso ha ira para makigbisog para ha ira mga katungod, hustisya ngan tinuod nga katalwasan. Ha kabaryuhan, padayon hira nga nagpupursige ha dalan han gerra han katawhan ngan ginsusuportahan an Bagong Hukbong Bayan (BHB). Naalinggawas hira ha priso nga gintalaan han katilingban ngan gin-iinsister an ira katindog komo gamhanan nga pwersa han pagbabag-o pinaagi han pag-organisa ngan pag-api ha mga asosasyon nga parag-uma, kababayin-an ngan kabatan-unan. An pinakamag-upay ha ira direkta nga nakatin han armas agud magpultaym komo Pula nga mangaraway.

Pasismo ngan militarisasyon an baton han estado han naghahadi nga klase. Ha 2018-2025, nahilista ha Eastern Visayas an diri mamenos ha 88 nga kaso han pag-abuso ha kababayin-an, menor de edad ngan kabataan. Kadak-an han mga kaso pagpatay ngan gin-atentar nga pagpatay; kasunod an iligal nga pag-aresto, pagsikmit ngan tortyur; ngan pan-gigipit ngan panhadlok. Waray wantas an pag-istraping han mga pasista nga sundalo ha kabalayan, bisan kun aadto an kalagsan ngan kabataan. Ginsisikmit an mga asawa ngan anak agud himuon nga hostage ngan pasurenderon an mga kaapi han BHB. Gin-iimponer an “lockdown” ha bug-os nga mga baryo ngan ginlalasurbo an kinabuhi ngan pakabuhi han bug-os nga komunidad.

An pandarahug ngan paniniyupi ha kababayin-an ha Eastern Visayas diri kaiba ha mga atake ha kababayin-an nga anakbalhas ha iba nga parte han kalibutan. Duguan an kamot han imperyalismo nga US ha pagpapabuto han gerra ha mga katawhan nga nag-iinsister han ira soberaniya, pinakalandaw diri pala maiha an ha Iran, Venezuela, ngan Palestine. Ginkundenar han bug-os nga kalibutan an waray wantas nga panmomba han US ngan han Zionista nga Israel ha usa nga eskoylahan ha Iran agud patayon an 200 nga kabataan nga babaye. Kundi imbes nga mapasurender an Iran, mas ginpalarab hini an diwa nga mapan-ato han mga Iranian ngan han hiluag nga katawhan ha bug-os nga kalibutan agud makigbisog kontra ha imperyalista nga mandaragit.

Sugad han pag-atake ha Iran, an pandarahug, pananalumpigos ngan paniniyupi ha kababayin-an nga Pilipino pakyas nga puypuyon an ira rebolusyunaryo nga pag-ato, ngan lugod mas ginpapaypayan ini. Labina nga ginlalansar hini an kagiusan pagtutul-id ha pamumuno han Partido, paborable gud an presente nga kamutangan agud utro nga magpakusog an kagiusan nga pagtatalwas han kababayin-an ha balayan han demokratiko nga rebolusyon han katawhan. Andam an ngatanan nga tsapter han MAKIBAKA ha Eastern Visayas nga ipatuman an mga buruhaton subay hini, dad-on an gerra han katawhan ngadto ha hul-os nga kadaugan, ngan tikangan an sosyalista nga konstruksyon ngadto ha pagpara ha mga klase.

Mabuhay an rebolusyunaryo nga kababayin-an!
Mabuhay an rebolusyon Pilipino!
Kababayin-an, talwason an kalugaringon, umapi ha Bagong Hukbong Bayan ngan bag-uhon an katilingban!

The post Kababayin-an, atuhan an imperyalismo, ipakigbisog an katungod, hustisya ngan tinuod nga katalwasan! appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.