Ginpatuman sang mga Pulang hangaway sa idalom sang Roselyn Jean Pelle Command-New People’s Army (RJPC-NPA) ang pagsilot kay Bigboy Ferrer, kagaina, alas 9:10 sa aga, Pebrero 26, sa Sityo Lumanab, Barangay Dian-ay, Escalante City, Negros Occidental.

Malawig na nga ginademanda sang pumuluyo nga mahatagan sang igtalupangod ang mga hinimoan ni Ferrer. Gani, ginpapanaugan siya sang silot kamatayon sa rebolusyonaryong korte sang pumuluyo sandig sang iya mga kaso:

Myembro si Ferrer sa isa ka grupo sang gun-for-hire sa nasambit nga barangay nga madamu na ang nangin biktima sa ila pagpamatay.

Isa man siya sa responsable sa lapnagon nga pagpangawat sang mga kasapatan sa malawig na nga panahon.

May kaso man si Ferrer sa pagpatay sa isa ka mangunguma pila ka tuig na ang nagligad.

Dugang pa, isa siya ka aktibong intel nga nagagiya sa mga operasyon sang 79th IB kag nagapanudlo sa pumuluyo sa ila lugar nga ginapasibangdan nga nagasuporta sa NPA. Nagresulta ini sang kakugmat sa mga pumuluyo bangud ginapahug sila sa militar halin pa sadtong 2016.

The post Rebolusyonaryong hustisya, ginpahamtang sa isa ka gun-for-hire appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.