Mahugot nga ginkukundenar han Arnulfo Ortiz Command han Bagong Hukbong Bayan (BHB)-Western Samar an waray wantas nga panmusil han mga pasista nga tropa han 3rd Infantry Battalion ha kabalayan ha Barangay Cagtoto-og, San Jorge kaagahon han Pebrero 2. Nagresulta ini ha pagkamatay han usa nga parag-uma ngan grabe nga kasamok ha komunidad.
Hito nga panahon nakadto ha baryo an usa katim han BHB agud mag-imbestiga ha kamutangan han mga residente nga ginlalasurbo han pag-uran ngan grabe nga militarisasyon. Temporaryo hira nga sinirong ha usa nga balay han masa.
Samtang nakadto, nakabati hira hin aringasa ha gawas han balay. Ira ini gin-imbestiga ngan nagpasuna han ispat ha direksyon han aringasa. Pagparong han Pula nga mangaraway ha ispat, layon nga nagpabuto an pasista nga militar ha direksyon han balay nga gin-ukyan nira.
Waray pagbulos hin buto an mga kasama ngan nakagikan hin waray nahiaguman nga hibang. Sugadpaman, namatay ha waray wantas nga pagpapabuto han mga pasista nga tropa hi Jaime Pabillar, 44 anyos, residente han Cagtoto-og. Diri hiya kaapi han BHB, sukwahi ha ginpapagawas nga buwa han 3rd IB. Kaupod niya hadto ha balay an iya asawa, anak ngan apo. Sobra nga kahadlok an gindurot ha han panhitabo ha mga residente.
Hul-os kami nga naduyog ha kasubo ha mga nailo ni G. Pabillar. Masuol gud nga mawarayan han hinigugma nga amay ngan kabakyang ha pagsuporta ha pamilya, labina ha butnga han pandarahug han 3rd IB ngan paniniyupi han rehimen US-Marcos ha masa nga parag-uma. An ira kamingaw ngan kasubo diri gud matutugbangan han limos nga pira kakilo nga bigas ngan delata nga desperado nga ginpanhatag han 3rd IB ngan han 1st CMO Company ha baryo. Diri liwat ini sadang para mabawi an pakabuhi nga nawara ha ira tungod ha hamlet o “lockdown” nga gin-imponer han militar ha komunidad.
An pagpatay kan G. Pabillar usa la ha tikadamo nga insidente han waray wantas nga pangingistraping han militar ha mga parag-uma. Hadton Enero la duha nga batan-on nga magkokopras an gin-istraping han 46th IB ha Sityo San Pedro, San Jose de Buan. Hadton Disyembre 2025, nagpabuto liwat an mga elemento han MIB ha direksyon han kabablayan ha Barangay Babaclayon ha San Jose de Buan.
Pagpapatuman ini han palisiya nga “shoot-to-kill” ha kabaryuhan nga natarget diri la ha BHB kundi bisan ha mga parag-uma. Ha ira kahadlok kada nasulod ha mga erya nga lupgop han operasyon han hukbo han katawhan, bisan hin-o nga makit-an nira, bisan kun waray pa nira makukumpirma kun ano gud an ira target, ngan bisan kun mayda sibilyan ha hirani, layon nala hira nga ginpapabuthan.
Nagsasaad an Arnulfo Ortiz Command nga papagbaydon hin mahal an mga berdugo nga nagsasabrag hin teror ha masa nga parag-uma. Hul-os nga kaisog ini nga magpupursige ha dalan han rebolusyunaryo nga pakigbisog agud kab-uton an tinuod nga hustisya ngan panmaihaan nga kamurayawan para ha katawhan Pilipino.
The post Kundenaron an pag-istraping ngan pagpatay han 3rd IB ha parag-uma ha San Jorge! appeared first on PRWC | Philippine Revolution Web Central.
From PRWC | Philippine Revolution Web Central via This RSS Feed.