Nakikig-usa an mga rebolusyunaryo nga pwersa ha Eastern Visayas ha mga kaurupdan ngan tagsuporta han mga biktima han madugo nga gerra kontra druga han rehimen US-Duterte. Ginsusuportahan naton an ira pira katuig nga paningkamot nga iduso an pagpapabaton kan Rodrigo Duterte ha International Criminal Court ngan ibuksas ha bug-os nga kalibutan an iya mga krimen, kahuman hira pakyason han sistema han hustisya ha Pilipinas nga nagseserbe la nga panalipdan an interes han pipira nga naghahadi nga klase.
Bisan ano nga buwa ngan pagtatahub an himuon ni Duterte ngan han iya mga binaydan nga abugado, diri hini madidiwara an nangunguna nga baratunon niya ha buwa nga gerra kontra druga nga sistematiko nga nagpatay ha kinabuhi han diri mamenos ha 30,000 katawo. Hi Duterte mismo nga numero uno nga drug lord an nagdisenyo ngan nagmando han pagpapatuman han Oplan Tokhang ha bug-os nga nasud, agud “nyutralisahon” an gudti ngan kablas nga pusher ngan user, payukbuon an mga karibal niya ha negosyo ngan monopolisahon an merkado han iligal nga druga. Gin-aghat niya an mga pulis nga magpatay pinaagi han sistema nga pahalipay ngan han iya haros kada adlaw nga panunulsol ha ira nga “sagot ko kayo” ngan darahugon an katawhan.
Hul-os karayhak nga ginpadayon han sinunod nga rehimen US-Marcos an madarahug nga gerra kontra druga. Sukwahi ha ginpapagawas ni Marcos Jr nga “bloodless” an drug war, naawas pa gihapon an dugo ilarum han iya rehimen. Ha lista han Dahas Project han UP Third World Studies Center, 269 an napatay hadton 2025. Kadam-an ha ira gudti nga pusher ngan nagamit han iligal nga druga. Tulo ha ira menor de edad.
An estilo nga Tokhang ha extrajudicial killings brutal nga ginpatuman ni Duterte diri la ha gerra kontra druga kundi bisan ha kampanya kontra-insurhensiya. Tikang han igpatuman han rehimen Duterte an Memorandum Order 32 ha Samar hadton 2018, niruniyan nga nangingistraping ngan napatay an mga pasista nga tropa han 8th Infantry Division ngan pulis han mga parag-uma ngan mga indibidwal nga diri armado, nga pagpapatuman han palisiya nga “shoot-to-kill” kontra ha mga gindududahan nga Pula nga mangaraway. Padayon naman ini nga ginmamando ni Marcos ha iya mga pasista nga sundalo, diin hadton Pebrero 2 la napatay ha pangistraping han 3rd Infantry Battalion an usa nga sibilyan ha bungto han San Jorge.
Kundi an sugad hini nga kamadarahug pangilal-an diri han kusog han naghahadi nga rehimen, kundi han desperasyon hini nga puypuyon an naglalarab nga kangalas han katawhan nga nakikigbisog para ha pagbabag-o. Padayon nga magpupursige an mga rebolusyunaryo nga pwersa ha Eastern Visayas ngan ha bug-os nga nasud nga ipasulong an gerra han katawhan agud mahitukod an usa nga demokratiko nga gubyerno nga magseseguro han hustisya ngan due process para ha katawhan.
Ngani, hinay-hinay na ini nga nahihimo ha mga lugar diin nahitukod na an liso han demokratiko nga gubyerno han katawhan. Dinhi kaangayan nga napapatok an rebolusyunaryo nga hustisya kontra ha mga pinakalunod-patay nga traydor nga sobra nga ginkakangalsan han masa tungod ha pagtraydor nira han impormasyon.
The post Papagbatunon an numero uno nga drug lord nga hi Duterte ha mga krimen kontra ha katawhan! appeared first on PRWC | Philippine Revolution Web Central.
From PRWC | Philippine Revolution Web Central via This RSS Feed.