Muling nagtungo ang mga myembro ng Taidoc Technology Labor Union (TTLU) sa Ministry of Labor noong Pebrero 16 upang kundenahin ang nagpapatuloy na pagsasabotahe ng kumpanyang Taidoc sa kanilang unyon. Nanawagan sila sa ahensya na tumindig sa panig ng mga manggagawa. Ito ang ika-apat na protestang isinagawa ng unyon sa harap ng kagawaran. Kasama sa pagkilos ang National Autonomous Labor Alliance, Migrante -Taiwan, NTU Labor Society, Serve the People Association at grupo ng mga kabataang estudyante.

Sa protesta, inihayag ng unyon ang plano nito na maglunsad ng welga upang maigiit ang kanilang panawagan, kabilang ang pagbalik sa trabaho sa mga upisyal ng unyon na sinisante ng kumpanya. Wala itinakdang petsa ang unyon upang mapigilan ang kumpanya na tanggalin sa trabaho ang mga lalahok sa welga.

Noong Pebrero 9, naglunsad ng press conference ang kumpanyang Taidoc pagkatapos ng kilos protesta ng unyon. Pinaratangan nito ang TTLU na minamanipula ng ibang grupo at maari maging usapin ng “pambansang seguridad” ang pagkilos ng mga manggagawa. Nagpatawag din ang kumpanya ng pulong at inanunsyo na may panibago nang mga upisyal ang unyon. Hindi ito dumaan sa ligal na proseso o kinilala ng TTLU. Tinangka pa ng kumpanya na pilitin ang unyon na ibigay ang kanilang upisyal na selyo.

Dulot ng walang patid na pananabotahe ng kumpanya, napilitang maglabas ng pahayag noong Pebrero 11 ang ministro sa paggawa ng Taiwan para magbabala sa kumpanya na “huwag hamunin ang desisyon ng kagawaran sa pagprotekta nito sa karapatan ng mga manggagawa.” Pinagbawalan din ang kumpanya na magtanggal sa trabaho o magdagdag ng panibagong migranteng manggagawa habang dinidinig ang reklamo ng unyon sa kumpanya.

Sa kabila ng babala, tuluy-tuloy pa rin ang masasamang iskema ng kumpanya. Pinilit ng kumpanya ang mga mangagawa na bumuo ng hiwalay na grupo na nagpapakilala bilang upisyal na unyon ng kumpanya. Gumawa rin ng pekeng Facebook page ang kumpanya gamit ang pangalan ng unyon upang linlangin ang publiko. Sa page na ito, inilabas ng kumpanya ang isang bidyo kung saan kunwa’y nagpahayag na masaya ang mga manggagawa sa trabaho at nagkukundena sa “pangingialam ng ibang grupo.” Gumagawa rin ng intriga ang kumpanya upang maging watak-watak ang mga lokal at migranteng manggagawa. Noong katapusan ng Enero, nagpakalat ng internal na memo ang kumpanya na sinisisi ang protesta ng unyon sa pagbawas sa bonus ng mga manggagawa.

“Tinangka nilang pasukin ang unyon ng mga maka-kumpanya na myembro upang mapahina ang aming panawagan at makontrol ang unyon mula sa loob,” paliwanag ni Joanna Rose De Los Santos, direktor ng TTLU.

“Kapag hinayaan ang Taidoc na yurakan ang awtonomiya ng unyon at baliwalain ang mga parusa ng ahensya nang walang pananagutan, gagayahin ito ng iba pang mapang-abusong kumpanya,” pahayag ng unyon.

Muling nanawagan ang unyon sa mamamayan ng Taiwan na suportahan ang kanilang protesta sa harap ng gate ng New Taipei City Government sa Pebrero 23.

The post Pananabotahe ng Taidoc Technology sa unyon ng mga manggagawa, kinundena appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.