Dili momenos sa lima ang napatay sa tulo ka engkwentro nga nahitabo sa Sityo Canggabi, Barangay Santo Niño, Tanjay City, Negros Oriental niadtong Pebrero 15, 2026. Giatake sa pasistang 11th IB ang lugar samtang nagpahigayon og imbestigasyon ang usa ka yunit sa Rachelle Mae Palang Command-New People’s Army (RMPC-NPA) sa mga problema sa katawhan sa mao nga barangay.
Nahitabo ang unang engkwentro sa alas 5:30 sa buntag, ang ikaduha sa alas 6:30, ug ikatulo sa alas 7:00. Kining tanan nga nagtunhay nga engkwentro, gipakyas sa mga Pulang manggugubat ang sulay nga pag-atake paagi sa pagkontra-opensiba ug pag-ilog sa inisyatiba sa maong panagsangka.
Sa unang engkwentro, dili momenos sa usa ang patay, samtang sa ikaduha usa ang patay ug usa ang samaron sa hanay sa 11th IB samtang luwas nga nakamaniobra ang yunit human sa aktibong pagdepensa.
Kini nga panghitabo usa ka dakong tamparos sa 11th IB, 302nd IBde ug tibuok Armed Forces of the Philippines (AFP) sa ilahang ilusyon nga naguba na kuno ang larangan gerilya sa Southeast Negros.
Gipamatud-an sa kasaysayan nga motumaw ang pagsukol samtang magapadayon ang hut-onganong banggianay nga nag-ugat sa imperyalismo, pyudalismo, ug burukrata kapitalismo.
Samtang adunay pagpanghimulos ug pagpanglupig sa katawhang mag-uuma ug mamumuo, padayon nga mapanday ang kusog sa sundalo sa kabus.
Gani, magpadayon ang NPA nga magtukod sa Pulang gahum sa katawhan gikan sa kabukiran padulong sa kasyudaran bisan pa sa walay hunong nga militarisasyon, nga mao mismo ang nagatukmod sa katawhan nga mag-armas ug mosukol sa usa ka sistemang dugay ra silang giulipon ug gitamastamasan.
Dili mapugngan ang pagsulong sa gubat sa katawhan tungod lang sa pipila ka mga traydor sa rebolusyon nga nadala sa pagpangilad ug pagpanglumay sa AFP ug NTF-Elcac. Hangtod karon, ang kinabag-ang masa padayon nga nagsuporta sa iyahang hukbo, mao nga dili kini mapildi ug mahurot tungod sa makasaysayanon ug hustong basehan sa rebolusyonaryong pagsukol.
The post 5 patay sa kontra-opensiba sa RMPC-NPA sa Tanjay City appeared first on PRWC | Philippine Revolution Web Central.
From PRWC | Philippine Revolution Web Central via This RSS Feed.