Gintigayon sang Romeo Nanta Command-NPA, South Central Negros Guerrilla Front ang punitibong aksyon batok kay Rey Norquiana, isa ka intel aset sang 94th IB, sang Pebrero 17, alas 3 sang hapon, sa Sitio Solbud, Barangay Santol, Binalbagan.

Lawig na nga panahon nga nagserbe nga aset si Norquiana sa pasistang militar sa amo nga banwa. Siya man ang isa sa mga tagtukod sang intel network partikular na sa Barangay Santol. Kabaylo sang kwarta, ginakumbinsi niya ang mga pumuluyo nga magreport sa iya isip siya ang handler sini.

Bangud aktibong miyembro si Norquiana sa simbahan, gintinguhaan sang mga Pulang hangaway nga maistorya siya tuig 2018 agud mapaathag sa iya ang kaso nga gin-atubang niya sa korte sa pumuluyo. Matapos nga gin-eksplikar sa iya ang epekto sang iya obra indi lang sa mga Pulang hangaway kundi sa pangabuhi man sa mga pumuluyo, ginhatagan siya sang tsansa nga magbag-o apang ginpaandaman sini nga kon liwat sini nga himuon ang iya obra sadto, ipatuman gid sa mga Pulang hangaway ang maabot nga desisyon sa korte sa pumuluyo.

Nangin malapit sa mga kaupod si Norquiana ilabina sang nakabenepisyo ini sa anti-pyudal nga paghimakas nga ginlunsar sang pumuluyo. Apang tuig 2023, nagbalik naman siya sa iya anti-rebolusyonaryong mga kahimoan. Paagi sa maid-id nga imbestigasyon, nalab-ot sang yunit ang iya mga gin-handle nga mga aset sa lugar kag sa dalagan sa pag-usisa sang iya kaso, napamatud-an nga siya man ang nagpa-reyd sa isa ka yunit nga naghulag sa ila lugar sa amo gihapon nga tuig.

Ginapangabay sang Romeo Nanta Command-NPA nga magpakig-angot sa pinakalapit nga yunit sang NPA ang tanan nga lokal aset sa erya. Bukas man ang nagkalain-lain nga yunit sa NPA nga mag-akomodar sang mga indibidwal nga wala pa sang mabug-at nga kaso nga nakomiter batuk sa pumuluyo kag sa rebolusyonaryong kahublagan. Dugang diri, paandam man sa mga masupog nga makinaryas sang AFP-PNP/NTF-Elcac ang ginlunsar nga punitibong aksyon. Tinguhaan sang RNC-NPA nga malab-ot ang ini nga mga kriminal agud mapasabat sang ila mga kaso.

The post Punitibong aksyon ginlunsar sang RNC-NPA, intel aset patay appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.