Mabaskog nga ginakondenar sang Leonardo Panaligan Command-New People’s Army (LPC-NPA) ang ginhimo nga pagmasaker sang mga pasistang 47th IB upod upod sa mga traidor sa rebolusyon nga sanday Renante Mission @Tibor/Karding/Eman kag Renalyn Omboy @Mulan/Dayna sa mag-asawa nga sila Pedro Gemodo, 61 anyos, kag Juliana Arculo Gemodo, 63 anyos, sang Sityo Agpapataw, Barangay Binobohan, Guihulngan City, Negros Oriental, alas 7:00 sang aga, Enero 31.

Ang mag-asawa nga Gemodo lunsay mga senior citizen kag masakiton. Si Pedro ang malawig na nga naga-antus sa kidney disorder kasubong man sang iya asawa nga si Juliana. Sila lunsay nga mga katapo sang Kapunungan sa Gagmay’ng Mag-uuma sa Oriental Negros (KAUGMAON-Guihulngan Chapter) sadtong ulihi nga bahin sang dekada ’90 tubtob 2010.

Nag-agum sila sang wala untat nga pagpamahug sa ila kabuhi matapos nga ginredtag kag ginpasibangdan sila sang Armed Forces of the Philippines (AFP) nga mga katapo sang NPA matapos ang natabo nga engkwentro sa Sityo Agpapataw sadtong Hunyo 18, 2010.

Gikan 2017, pilit sila nga ginapasurender sang AFP, PNP kag NTF-Elcac sa nasambit nga syudad.

Nagapahuway ang mag-asawa nga Pedro kag Juliana sa payag gikan sa malawig nga pagpanglakaton bangud sang wala untat nga operasyon militar. Gulpi nga ginpaarakan sang berdugong 47th IB ang payag nga gintineran sang duha rason sang pagkasamad ni Pedro kag Juliana. Bisan pilason, naninguha nga magpalagyo ang mag-asawa sa volume of fire gikan sa militar.

Buhi kag pilason ang mag-asawa sang liwat nga naabtan sang pasistang militar. Wala kaluoy kag brutal ini nga ginpangtiro tubtob nga nadulaan sang kabuhi ang mga biktima.

Si Juliana kag Pedro ang naka-agum sang madamo nga kapilasan sa ila mga lawas nga nagapaligo sang ila kaugalingon nga dugo bunga sang hatok-hatok sang bala sang berdugong militar.

Wala sila sang ikasarang nga magbato bangud pilason, masakiton kag lunsay mga senior citizen. Biktima sila sang indi patas nga pagtratar sa mga hangaway sang magkatimbang nga bahin sandig sa kasugtanan sa international humanitarian law.

Sa pihak nga bahin, ang mag-asawa nga Gemodo ang tunay nga baganihan sang masang mangunguma kag rebolusyon. Maisog nga nagtindog sang ila tawhanon nga kinamatarung kag padayon nga naghimakas sa paghilway sang sahing mangunguma sa pyudal kag malapyudal nga pagpanghimulos sang mga despotikong agalon may duta.

Maisog nga gin-atubang nila ang kapintas sang reaksyonaryong estado kag idu-ido nga AFP, PNP, paramilitar kag NTF-Elcac. Sila ang mga rebolusyonaryong martir nga nagsulay sa unos sang pasismo sa prenteng gerilya para angkunon ang pungsodnon nga kahilwayan kag demokrasya.

Hustisya para kay Pedro kag Juliana Gemodo!
Hustisya para sa mga pamilya kag biktima sang pasismo sang estado! Mabuhay ang mga martir sang rebolusyon Pilipino!

The post Binobohan masaker, ginakondenar sang NPA appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.