Ginahatagan sang pinakamataas nga rebolusyonaryong pagpasidungog sang Romeo Nanta Command-New People’s A rmy (RNC-NPA) sanday Reynalde “Ka Amek” Erecre, nagapanguna nga kadre militar kag sekretaryo sang Partido sa rehiyon sang Negros, kag “Ka Joem” Golez, isa ka medical staff sang Apolinario Gatmaitan Command-Regional Operations Command (AGC-NPA). Napatay ang duha ka mga Pulang hangaway sa Sityo Apitong, Barangay Bi-ao, Binalbagan Negros Occidental sadtong Enero 30.

Natabo ang unang hugna sa engkwentro alas-2:00 sang aga nga nagresulta sa pagkapatay ni Ka Joem. Nasundan ini pagka alas-4:00 sang hapon kon diin natultol sang tropa militar sang 94th IB ang namaniobrahan ni Ka Amek nga indi man malayo sa lugar nga natabuan. Makabig na nga hors-de-combat si Ka Amek nga wala na sang ikasarang magbato apang wala na sa konsepto sang mga pasistang militar nga dakpon pa siya nga buhi. Gani, brutal nila ini nga ginpatay. Nakaagum sang daghan nga igo sang bala ang iya ulo nga nagresulta sa pagkawasak sini kag indi na makilal-an ang iya hitsura.

Si Ka Amek halin sang sahing lower petiburges nga nagdako sa Maco, Davao De Oro. Nagkuha siya sang kursong Bachelor of Science in Education apang bangud sa problema sa pinansya, napugos ini nga mag-untat. Nangin mamumugon siya sa isa ka pabrika sang plywood.

Tuig 1996, nag-fulltime sa NPA si Ka Amek. Nangin miyembro siya sang Komite sa Larangan (KL) sa tuig 1999 kag na-appoint isip Komiteng Tigpatumna sa Komiteng Rehiyunal (KTKR) sa Central Visayas sadtong 2004.

Nangin parte siya sang partisan yunit sa Cebu kag Bohol. Magluwas diri, isa man siya sa nagpanguna sang pag-raid sang headquarters sang Regional Mobile Force sa Bohol nga nakakuha sang sobra 80 ka armas.

Sa dalagan, nadeploy si Ka Amek sa isla sang Negros sang tuig 2006 nga nangin kumander sa kumpaniya kag Deputy Secretary sa larangan sang Southeast Negros. Sang 2013, siya ang nagtindog nga platoon commander sang Regional Sentro de Grabidad (RSDG) kag company commander sini nga yunit pag 2016. Sini nga mga panahon, nangin matingkad ang mga taktikal nga opensiba sa rehiyon sa iya pagpanguna.

Tuig 2019, siya ang nangin kumander sa AGC-NPA kag sa mga masunod nga tinuig, nangin parte siya sang Kalihiman (KH) sang KR sa Negros.

Sang 2023, nag-akto siya bilang Sekretaryo sang Partido sa rehiyon sa Negros.

Sa bilog panahon ni Ka Amek sa Negros, dako ang nangin amot niya sa pagpasulong sa armadong paghimakas sa isla labina sa rehiyon. Isa siya ka sulundon nga kadre sang militar.

Dugang diri, isa si Ka Amek sa nagapaninundugan nga malunsar ang ika-3 nga kahublagan panadlong sa isla. Sa paninguha niya kag sa mga kaupod, amat-amat nga napangibabawan sa mga larangang gerilya ang mga internal nga kahuyangan kag kakulangan kag nabalik ang kapagsikon sa pagtungod sa hilikuton expansion kag recovery.

Paagi sang hustong pag-analisa sa konkretong kahimtangan, nakita niya ang mga nagakaangay nga tikang para sa pagpangibabaw sang sakit sang pagpakitid sa kaugalingon kag sobra nga konsentrasyon.

Dasig lang ma-unite ni Ka Amek ang mga kaupod bangud dasig lang man siya nga mapalapitan kag mag-alinyar sa ila. Sa paghatag sang puna, iya man ginasiguro nga maayo ang porma sini agud mauyatan sang mga kauban ang esensya sang iya ginapaabot. Gani, indi matahap ang mga kaupod sa pagpuna man sa iya bangud ginadawat niya ini kon insakto kag gina-struggle kon sipyat tubtub nga mahiliusa.

Si Ka Amek ang tipo nga tawo nga kon may mga kabudlayan sa iya responsibilidad, wala niya ini ginakabig nga sablag sa iya kundi hangkat agud mangin mas maayo sa pagpatuman sang mga rebolusyonaryong hilikuton.

Samtang si ‘Ka Joem’ Golez halin man sang sahing mangunguma sa Sityo Kuyawyaw, Barangay Quintin Remo, Moises Padilla, Negros Occidental antes nga nagsulod sa NPA.

Bilang halin sang sandigan nga sahi, na-eksperyensya ni Ka Joem ang tuman kabudlay nga pagpangabuhi nga nag-ugat sang mala-pyudal kag mala-kolonyal nga sistema sang pungsod. Ang kawad-on sang dutang ginatikad kag suporta sang reaksyonaryong gobyerno ang nagtulod sa iya nga mag-fulltime sa NPA sadtong 2016.

Antes nadeploy, isa ka finance and logistics officer (FLO) si Ka Joem kag nangin medical staff sang AGC-NPA sa ulihi.

Kilala si Ka Joem sa mga kaupod nga hipuson. Wala ini nagapili sa mga hilikuton basta masarangan lang niya. Malapit man si Ka Joem sa mga masa bangud mahilig ini magpartisipar sa produksyon kag nagaatipan sa mga pumuluyo nga may mga sakit kag indi kasarang magpa-hospital.

Ginhalad ni Ka Amek kag Ka Joem ang ila mga kabuhi para pangapinan ang interes sa malapad nga masa ilabina sa mga pumuluyo sa isla sang Negros nga labing apektado sa pagsulod sang mga maki-dumuluong nga mga proyekto kag pagpatuman sang mga neoliberal nga mga palisiya.

Ang ila mga sakripisyo uyatan sang mga nabilin kag mas magadugang ang mga Pulang hangaway nga maga-usoy sa padayon nga pagsulong sa pungsudnong demokratikong rebolusyon.

The post Rebolusyonaryong pagpasidungog nanday Reynalde “Ka Amek” Erecre kag “Ka Joem” Golez appeared first on PRWC | Philippine Revolution Web Central.

From PRWC | Philippine Revolution Web Central via This RSS Feed.